ಅಪಹೃತ ಮಹಿಳೆ ಪಾಕ್‌ನಿಂದ ಭಾರತಕ್ಕೆ ಆಗಮಿಸಲು ಸುಷ್ಮಾ ನೆರವು

ಹೊಸದಿಲ್ಲಿ: ಪಾಕಿಸ್ತಾನ ವ್ಯಕ್ತಿಯೊಬ್ಬನಿಂದ ಅಪಹರಿಸಲ್ಪಟ್ಟ ಮಹಿಳೆಯನ್ನು ಭಾರತಕ್ಕೆ ಕರೆಯಿಸಿಕೊಳ್ಳಲು ತಗಲುವ ವೆಚ್ಚವನ್ನು ಭರಿಸಲು ವಿದೇಶಾಂಗ ಸಚಿವೆ ಸುಷ್ಮಾ ಸ್ವರಾಜ್ ಮುಂದಾಗಿದ್ದಾರೆ.

1996ರಲ್ಲಿ ಮೊಹ್ಮದಿ ಬೇಗಮ್ ಅವರನ್ನು ಮೊಹ್ಮದ್ ಯೂನಸ್ ವರಿಸಿದ್ದರು. ಆಕೆಯನ್ನು ಒಮನ್‌ನಲ್ಲಿ ಇರಿಸುವುದಾಗಿ ಹೇಳಲಾಗಿತ್ತು. ಆದರೆ, ಯೂನಸ್ ಪಾಕಿಸ್ತಾನ ನಿವಾಸಿಯೆಂದು ನಂತರ ಈ ಮಹಿಳೆಗೆ ತಿಳಿದಿದ್ದು, ಸುಳ್ಳು ಗುರುತು ನೀಡಿ ಮದುವೆಯಾಗಿದ್ದ. ಪಾಕಿಸ್ತಾನಕ್ಕೆ ತೆರಳಿದ ನಂತರ ಬೇಗಮ್‌ಗೆ ತಮ್ಮ ಪೋಷಕರನ್ನೂ ಭೇಟಿಯಾಗಲು ಬಿಡದ ಯೂನಸ್, ದೌರ್ಜನ್ಯವೆಸಗುತ್ತಿದ್ದ ಎನ್ನಲಾಗಿದೆ.

ಈ ವಿಚಾರವಾಗಿ ಬೇಗಮ್ ತಂದೆ ಅಕ್ಬರ್ ಕೇಂದ್ರ ಸರಕಾರವನ್ನು ಸಂಪರ್ಕಿಸಿದ್ದರು. ಆಗ ಮಹಿಳೆಯನ್ನು ಬಿಡುಗಡೆಗೊಳಿಸುವುದಾಗಿ ಸುಷ್ಮಾ ಭರವಸೆ ನೀಡಿದ್ದರು. ಬೇಗಮ್‌ ಭಾರತಕ್ಕೆ ಆಗಮಿಸಲು ಅನುಮತಿಯನ್ನೂ ನೀಡಲಾಗಿತ್ತು.

ವೀಸಾ ಅವಧಿ ಮುಗಿಯುತ್ತಿದ್ದರೂ, ಬೇಗಮ್‌ಗೆ ಭಾರತಕ್ಕೆ ಆಗಮಿಸುವ ಟಿಕೆಟ್ ವೆಚ್ಚ ಭರಿಸಲು ಆಕೆಯ ಪತಿ ಮುಂದಾಗಲಿಲ್ಲ. ಅಲ್ಲದೇ, ಪೋಷಕರೂ ಈ ವೆಚ್ಚ ಭರಿಸುವ ಸ್ಥಿತಿಯಲ್ಲಿ ಇರಲಿಲ್ಲ. ಈ ಹಿನ್ನೆಲೆಯಲ್ಲಿ ಸುಷ್ಮಾ ಭಾರತೀಯ ಹೆಣ್ಣು ಮಗಳನ್ನು ಮರಳಿ ಕರೆ ತರುವ ವೆಚ್ಚವನ್ನೂ ಭರಿಸಲು ಮುಂದಾಗಿದ್ದಾರೆ.