ರಾಷ್ಟ್ರೀಯ

200ಕ್ಕೂ ಹೆಚ್ಚು ಸರಕಾರಿ ವೆಬ್‌ಸೈಟ್‌ಗಳಿಂದ ಆಧಾರ್‌ ವಿವರ ಬಹಿರಂಗ: ಯುಐಡಿಎಐ

Pinterest LinkedIn Tumblr


ಹೊಸದಿಲ್ಲಿ: ಕೇಂದ್ರ ಹಾಗೂ ರಾಜ್ಯ ಸರಕಾರಗಳ 200ಕ್ಕೂ ಹೆಚ್ಚು ವೆಬ್‌ಸೈಟ್‌ಗಳು ಕೆಲವು ಆಧಾರ್‌ ಫಲಾನುಭವಿಗಳ ಹೆಸರು ಮತ್ತು ವಿಳಾಸಗಳಂತಹ ವಿವರಗಳನ್ನು ಸಾರ್ವಜನಿಕವಾಗಿ ಪ್ರದರ್ಶಿಸಿವೆ ಎಂದು ಭಾರತೀಯ ವಿಶಿಷ್ಟ ಗುರುತು ಪ್ರಾಧಿಕಾರ (ಯುಐಎಡಿಐ) ಹೇಳಿದೆ.

ಆರ್‌ಟಿಐ ಪ್ರಶ್ನೆಯೊಂದಕ್ಕೆ ಉತ್ತರಿಸಿರುವ ಆಧಾರ್‌ ವಿತರಣಾ ಸಂಸ್ಥೆ, ಈ ವಿಚಾರ ಗಮನಕ್ಕೆ ಬಂದ ತಕ್ಷಣ ಆ ವೆಬ್‌ಸೈಟ್‌ಗಳಿಂದ ಎಲ್ಲ ಡೇಟಾಗಳನ್ನು ತೆಗೆದುಹಾಕಲಾಗಿದೆ ಎಂದು ತಿಳಿಸಿದೆ.

ಯಾವಾಗ ಈ ಪ್ರಮಾದ ನಡೆದಿದೆ ಎಂಬುದನ್ನು ಅದು ಬಹಿರಂಗಪಡಿಸಿಲ್ಲ. ಯುಐಡಿಎಐ ವತಿಯಿಂದ ಯಾವತ್ತೂ ಆಧಾರ್‌ ಮಾಹಿತಿ ಸೋರಿಕೆಯಾಗಿಲ್ಲ ಎಂದು ಅದು ಸ್ಪಷ್ಟಪಡಿಸಿದೆ.

‘ಹಾಗಿದ್ದರೂ, ಕೇಂದ್ರ ಹಾಗೂ ರಾಜ್ಯ ಸರಕಾರಗಳ ಸುಮಾರು 210 ವೆಬ್‌ಸೈಟ್‌ಗಳು (ಶಿಕ್ಷಣ ಸಂಸ್ಥೆಗಳೂ ಸೇರಿದಂತೆ) ಹೆಸರು, ವಿಳಾಸ, ಇತರ ವಿವರಗಳು ಮತ್ತು ಆಧಾರ್‌ ಸಂಖ್ಯೆಗಳ ಸಹಿತ ಫಲಾನುಭವಿಗಳ ಪಟ್ಟಿಯನ್ನು ಸಾರ್ವಜನಿಕ ಮಾಹಿತಿಯಾಗಿ ಪ್ರಕಟಿಸಿರುವುದು ಪತ್ತೆಯಾಗಿತ್ತು’ ಎಂದು ಯುಐಎಡಿಐ ಹೇಳಿದೆ.

ಈ ವಿಚಾರ ಗಮನಕ್ಕೆ ಬಂದ ಕೂಡಲೇ ಯುಐಎಡಿಐ ಆ ವೆಬ್‌ಸೈಟ್‌ಗಳಿಂದ ಎಲ್ಲ ಆಧಾರ್‌ ಮಾಹಿತಿಗಳನ್ನು ತೆಗೆದುಹಾಕಿದೆ ಎಂದು ಪ್ರಾಧಿಕಾರ ಉತ್ತರಿಸಿದೆ.

ಹಲವು ಸಮಾಜ ಕಲ್ಯಾಣ ಯೋಜನೆಗಳ ಫಲಾನುಭವಿಗಳಿಗೆ ಆಧಾರ್‌ ಜೋಡಣೆಯನ್ನು ಕೇಂದ್ರ ಸರಕಾರ ಕಡ್ಡಾಯಗೊಳಿಸಿದೆ.

‘ಯುಐಡಿಎಐ ನಾಗರಿಕರ ಮಾಹಿತಿಗಳ ರಕ್ಷಣೆಗೆ ಬಹು ಸ್ತರದ ಭದ್ರತೆ ಹೊಂದಿದೆ. ಅಲ್ಲದೆ ನಿರಂತರವಾಗಿ ಈ ವ್ಯವಸ್ಥೆಯನ್ನು ಮೇಲ್ದರ್ಜೆಗೇರಿಸಲಾಗುತ್ತಿದೆ’ ಎಂದು ಆರ್‌ಟಿಐ ಉತ್ತರದಲ್ಲಿ ತಿಳಿಸಿದೆ.

Comments are closed.