ಗೆಳೆಯನ ಮಗುವನ್ನು ಮುಳುಗಿಸಿ ಸಾಯಿಸಿದ ಗರ್ಭಿಣಿ

ಚೆನ್ನೈ: ಗರ್ಭಿಣಿಯೊಬ್ಬಳು ತನ್ನ ಗೆಳೆಯನ ನಾಲ್ಕು ವರ್ಷದ ಮಗುವನ್ನು ಬಕೆಟ್‌ನಲ್ಲಿ ಮುಳುಗಿಸಿ ಸಾಯಿಸಿದ ಘಟನೆ ಕುಂಡ್ರತ್ತೂರ್‌ನಲ್ಲಿ ನಡೆದಿದೆ. 30 ವರ್ಷದ ಆಶಾ ಈ ಕೃತ್ಯ ಎಸೆದವಳು.

ಆಶಾಗೆ ಮೃತ ಮಗುವಿನ ತಂದೆ ಧರ್ಮಲಿಂಗಂ ಜತೆಗೆ ಸಂಬಂಧವಿತ್ತು. ಈ ಮಗು ಬದುಕಿದ್ದರೆ ತನಗೆ ಹುಟ್ಟುವ ಮಗುವಿಗೆ ಆಸ್ತಿ ಸಿಗುವುದಿಲ್ಲವೆಂದು ಯಾರೂ ಇಲ್ಲದ ಹೊತ್ತಿನಲ್ಲಿ ಮಗುವನ್ನು ಬಕೆಟ್‌ನಲ್ಲಿ ಮುಳುಗಿಸಿ ಸಾಯಿಸಿದ್ದಾಳೆ.

ಧರ್ಮಲಿಂಗಂ, ಪತ್ನಿ ಜಯಂತಿಗೆ ವಿಚ್ಛೇದನ ನೀಡಿದ ಬಳಿಕ ಆಶಾ ಜತೆ ಸಂಬಂಧದಲ್ಲಿದ್ದರು. ಧರ್ಮಲಿಂಗ-ಜಯಂತಿ ದಂಪತಿ ಪುತ್ರಿಯಾದ ದೋಶಿಕಾ ಸೋಮವಾರದಿಂದ-ಶುಕ್ರವಾರದವರೆಗೆ ತಾಯಿ ಜತೆ, ವೀಕೆಂಡ್‌ನಲ್ಲಿ ತಂದೆ ಜತೆ ಇರುವಂತೆ ಒಪ್ಪಂದವಾಗಿತ್ತು. ಹಾಗಾಗಿ ವಾರಾಂತ್ಯದಲ್ಲಿ ಮಗು ತಂದೆಯ ಜತೆ ಬರುತ್ತಿತ್ತು.

ಆಶಾಗೆ ಮೊದಲಿನ ಪತಿಯಿಂದ ಒಬ್ಬ ಮಗನಿದ್ದಾನೆ. ಈ ಕೃತ್ಯ ಮಾಡುವಾಗ ಮಗನನ್ನು ತನ್ನ ಅಣ್ಣನ ಜತೆ ಶಾಪಿಂಗ್‌ಗೆ ಕಳುಹಿಸಿದ್ದಳು.

ಧರ್ಮಲಿಂಗಂ ಮನೆಗೆ ಬಂದಾಗ ಮಗಳು ಕಾಣದಿದ್ದಾಗ ಕೇಳಿದ್ದಾನೆ, ಆಗ ಹುಡುಕಾಟ ಪ್ರಾರಂಭಿಸಿದ್ದಾರೆ, ಈಕೆಯೂ ಹುಡುಕುವ ನಾಟಕ ಆಡಿದ್ದಾಳೆ. ಧರ್ಮಲಿಂಗಂಗೆ ಬಕೆಟ್‌ನಲ್ಲಿ ಮಗಳ ತಲೆ ಕಾಣುತ್ತದೆ, ಕೂಡಲೇ ಆಸ್ಪತ್ರೆಗೆ ಎತ್ತಿಕೊಂಡು ಓಡುತ್ತಾನೆ, ಈಕೆಯೂ ಆತನ ಜತೆ ಆಸ್ಪತ್ರೆಗೆ ಬರುತ್ತಾಳೆ. ಆದರೆ ವೈದ್ಯರು ಮಗುವನ್ನು ತರುವಾಗಲೇ ಮೃತವಾಗಿತ್ತು ಎಂದು ತಿಳಿಸುತ್ತಾರೆ.

ಮಗುವಿನ ತಾಯಿಗೆ ಸಂಶಯ ಬಂದು ಪೊಲೀಸ್‌ ದೂರು ನೀಡುತ್ತಾರೆ, ಆಗ ಪ್ರಕರಣ ಬೆಳಕಿಗೆ ಬಂದಿದೆ.