ಬ್ಲ್ಯಾಕ್ ಕೋಬ್ರಾ ಕಚ್ಚಿದ ಪರಿಣಾಮ 3 ಮಂದಿ ಸಾವು

ರಾಂಪುರ: ಉತ್ತರ ಪ್ರದೇಶದ ಪರಮ್ ಗ್ರಾಮದಲ್ಲಿ ವಿಷಸರ್ಪಗಳ ಕಾಟ ಹೆಚ್ಚಾಗಿದ್ದು, ಬ್ಲ್ಯಾಕ್ ಕೋಬ್ರಾವೊಂದು 52 ಮಂದಿಗೆ ಕಚ್ಚಿದ ಪರಿಣಾಮ ಮೂರು ಜನರು ಸಾವನ್ನಪ್ಪಿರುವ ಘಟನೆ ನಡೆದಿದೆ.

ನನ್ನ ಪತಿ ನೀರು ತರಲೆಂದು ಹೋಗಿದ್ದರು. ಈ ವೇಳೆ ಹಾವು ಕಚ್ಚಿತ್ತು. ನಂತರ ಆಸ್ಪತ್ರೆಗೆ ಕರೆದುಕೊಂಡು ಹೋಗಲಾಗಿತ್ತು. ಆದರೆ, ವಿಷ ದೇಹ ಪೂರ್ತಿ ಆವರಿಸಿದ್ದರಿಂದ ನನ್ನ ಪತಿ ಮೃತಪಟ್ಟಿದ್ದರು. ಹಾವುಗಳ ಭಯದಿಂದ ಇದೀಗ ನನ್ನ ಮಕ್ಕಳು ಶಾಲೆಗೆ ಹೋಗುತ್ತಿಲ್ಲ. ಸರ್ಕಾರದಿಂದಲೂ ನಮಗೆ ಯಾವುದೇ ಸಹಾಯವಾಗಿಲ್ಲ ಎಂದು ಮೃತ ವ್ಯಕ್ತಿಯ ಪತ್ನಿಯೊಬ್ಬರು ಹೇಳಿಕೊಂಡಿದ್ದಾರೆ.

ರಸ್ತೆಗಳಲ್ಲಿ ಬಹಿರಂಗವಾಗಿಯೇ ವಿಷಸರ್ಪಗಳು ಓಡಾಡುತ್ತಿರುತ್ತವೆ. ಇದರಿಂದಾಗಿ ಗ್ರಾಮದ ಜನರು ಭಯದಲ್ಲಿಯೇ ಜೀವನ ನಡೆಸುತ್ತಿದ್ದಾರೆಂದು ಸ್ಥಳೀಯ ಮೊಹಮ್ಮದ್ ನಬಿ ಅವರು ಹೇಳಿದ್ದಾರೆ.

ನನ್ನ ಮಗಳು ಆಟವಾಡಿ ಮನೆಗೆ ಬಂದು ಮಲಗಿದ್ದಳು. ಈ ವೇಳೆ ಹಾವು ಕಚ್ಚಿತ್ತು. ಹಾವು ಕಚ್ಚಿದ ಕೆಲವೇ ನಿಮಿಷಗಳಲ್ಲಿ ಮಗಳು ಸಾವನ್ನಪ್ಪಿದ್ದಳು ಎಂದು ಮೃತಪಟ್ಟ ಸಂಧ್ಯಾ ಎಂಬ ಯುವತಿಯ ತಾಯಿ ಹೇಳಿಕೊಂಡಿದ್ದಾರೆ.

ಇನ್ನು ಹಾವುಗಳ ಕಾಟ ಕುರಿತಂತೆ ಮಾತನಾಡಿರುವ ಜಿಲ್ಲಾಧಿಕಾರಿ ಅಮಿತ್ ಕಿಶೋರ್ ಅವರು, ಉತ್ತರಖಾಂಡದ ಕಾಶಿಪುರದಲ್ಲಿಂದ ಹಾವುಗಾರರನ್ನು ಕರೆತರುವ ಪ್ರಯತ್ನಗಳನ್ನು ಮಾಡಲಾಗುತ್ತಿದೆ. ಶೀಘ್ರದಲ್ಲೇ ಸಮಸ್ಯೆಯನ್ನು ಬಗೆಹರಿಸಲಾಗುತ್ತದೆ ಎಂದು ಹೇಳಿದ್ದಾರೆ.