ಮುಂಬೈ: ನಟ ಅಕ್ಷಯ್ ಕುಮಾರ್ ಸ್ವಸಾಮರ್ಥ್ಯದಿಂದ ಬೆಳೆದವರು, “ನನಗಿಂತಲೂ ಯಶಸ್ವಿ ನಟ” ಎಂದಿದ್ದಾರೆ ‘ಗರಂ ಮಸಾಲ’, ‘ಹೌಸ್ ಫುಲ್-೨’ ಮತ್ತು ‘ದೇಸಿ ಬಾಯ್ಸ್’ ಸಿನೆಮಾಗಳಲ್ಲಿ ಅಕ್ಷಯ್ ಜೊತೆಗೆ ನಟಿಸಿದ್ದ ಬಾಲಿವುಡ್ ನಟ ಜಾನ್ ಅಬ್ರಹಾಂ.
“ಸಿನೆಮಾ ರಂಗದಲ್ಲಿ ಅಕ್ಷಯ್ ಕುಮಾರ್ ಅವರ ಪಯಣ ಬಹಳ ಸ್ಫೂರ್ತಿದಾಯಕ. ಅವರು ಸ್ವಸಾಮರ್ಥ್ಯದಿಂದ ಬೆಳೆದವರು. ಅವರು ೧೯೮೫ರಲ್ಲಿ ಸಿನೆಮಾರಂಗಕ್ಕೆ ಬಂದವರು ನಾನು ೨೦೦೩ರಲ್ಲಿ, ಆದರೆ ನಮ್ಮಿಬ್ಬರ ಪಯಣ ಒಂದೇ ರೀತಿಯದ್ದು. ನನಗಿಂತಲೂ ಯಶಸ್ವಿ ನಟ ಅವರು ಅದನ್ನು ನಾನು ಗೌರವಿಸುತ್ತೇನೆ” ಎಂದು ಟಿವಿ ವಾಹಿನಿಯೊಂದರ ಕಾರ್ಯಕ್ರಮದಲ್ಲಿ ಜಾನ್ ಹೇಳಿದ್ದಾರೆ.
ಅಕ್ಷಯ್ ಅವರಿಂದಲೇ ನಾನು ಹಾಸ್ಯ ಕಲಿತಿದ್ದು ಎಂದಿದ್ದಾರೆ ಜಾನ್. ನಾವು ಮೂರು ಸಿನೆಮಾಗಳನ್ನು ಒಟ್ಟಿಗೆ ಮಾಡಿದ್ದೇವೆ. ‘ಗರಂ ಮಸಾಲ’, ‘ಹೌಸ್ ಫುಲ್-೨’ ಮತ್ತು ‘ದೇಸಿ ಬಾಯ್ಸ್’. ಸಿನೆಮಾದಲ್ಲಿ ಹಾಸ್ಯ ಪ್ರಾಕಾರ ನನಗೆ ಇಷ್ಟ. ನಾನೇನಾದರೂ ಹಾಸ್ಯ ಕಲಿತಿದ್ದರೆ ಅದು ಅವರಿಂದಲೇ. ಅದಕ್ಕೇ ನಾನು ಅವರನ್ನು ‘ಗುರೂಜಿ’ ಎಂದೇ ಕರೆಯುವುದು ಅವರು ನನ್ನನ್ನು ‘ಸುಂದಿ’ ಎನ್ನುತ್ತಾರೆ” ಎಂದು ಕೂಡ ತಿಳಿಸಿದ್ದಾರೆ. ಜಾನ್ ಅಭಿನಯದ ‘ರಾಕಿ ಹ್ಯಾಂಡ್ಸಂ’ ಶುಕ್ರವಾರ ಬಿಡುಗಡೆಯಾಗಲಿದೆ.
