ಹೊಸದಿಲ್ಲಿ: ಸಣ್ಣ, ಅತಿಸಣ್ಣ ಮತ್ತು ಮಧ್ಯಮ ಗಾತ್ರದ ಉದ್ಯಮಗಳ ವಲಯದಲ್ಲಿ ಉದ್ಯೋಗ ಹರಸುವವರಿಗಾಗಿ ಕೇಂದ್ರ ಸರಕಾರ, ಆನ್‌ಲೈನ್ ಜಾಬ್ ಪೋರ್ಟಲ್ ಅನಾವರಣಗೊಳಿಸಿದೆ.
ಕೇಂದ್ರ ಸರಕಾರ ಅನಾವರಣಗೊಳಿಸಿರುವ www.eex.dcmsme.gov.in ಪೋರ್ಟಲ್, ಕೌಶಲ್ಯಯುತ ಮಾನವ ಸಂಪನ್ಮೂಲವನ್ನು ಶೋಧಿಸಲು ಎಂಎಸ್‌ಎಂಇ ವಲಯಕ್ಕೆ ನೆರವಾಗಲಿದೆ. ಜತೆಗೆ, ಕೌಶಲ್ಯಯುತ ವೃತ್ತಿಪರರಿಗೆ ಇದೊಂದು ಜೀವನಾಧಾರ ವೇದಿಕೆಯಾಗಲಿದೆ.
ಪ್ರಧಾನ ಮಂತ್ರಿಗಳ ಡಿಜಿಟಲ್ ಇಂಡಿಯಾ, ಸ್ಕಿಲ್ ಇಂಡಿಯಾ ಮತ್ತು ಮೇಕ್ ಇನ್ ಇಂಡಿಯಾ ದೃಷ್ಟಿಕೋನಕ್ಕೆ ಸಮನಾಗಿ ನಮ್ಮ ಸಚಿವಾಲಯ ಉದ್ಯೋಗ ಪೋರ್ಟಲ್ ಅಭಿವೃದ್ಧಿಪಡಿಸಿದೆ. ಈ ಪೋರ್ಟಲ್ ಎಂಎಸ್‌ಎಂಇ ವಲಯ ಮತ್ತು ಉದ್ಯೋಗಾಕಾಂಕ್ಷಿಗಳಿಗೆ ಸಂಪೂರ್ಣ ನೆರವಾಗಲಿದೆ ಎಂದು ಎಂಎಸ್‌ಎಂಇ ಸಚಿವ ಕಲ್‌ರಾಜ್ ಮಿಶ್ರಾ, ಪೋರ್ಟಲ್ ಅನಾವರಣಗೊಳಿಸಿ, ತಿಳಿಸಿದ್ದಾರೆ.
ತಯಾರಿಕಾ ರಂಗದಲ್ಲಿ ಸೂಕ್ತ ಉದ್ಯೋಗಾವಕಾಶಗಳು ಇರುವ ಬಗ್ಗೆ ಮಾಹಿತಿಯೇ ಸಿಗುವುದಿಲ್ಲ ಎಂದು ನಿರುದ್ಯೋಗಿ ಯುವ ಸಮುದಾಯ ಹಾಗೂ ಸಣ್ಣಪುಟ್ಟ ಕೆಲಸಗಳನ್ನು ಮಾಡ್ತುತಿರುವ ಉದ್ಯೋಗಿಗಳು ಪದೇಪದೆ ಕಳವಳ ವ್ಯಕ್ತಪಡಿಸುತ್ತಿದ್ದ ಹಿನ್ನೆಲೆಯಲ್ಲಿ, ಅಂಥವರಿಗೆ ಸೂಕ್ತ ವೇದಿಕೆ ಸೃಷ್ಟಿಸುವ ಕ್ರಮವಾಗಿ ಆನ್‌ಲೈನ್ ಜಾಬ್ ಪೋರ್ಟಲ್ ಸಿದ್ಧಪಡಿಸಲಾಗಿದೆ ಎಂದು ಸಚಿವರು ತಿಳಿಸಿದರು.
ಕೌಶಲ್ಯಯುತ ವೃತ್ತಿಪರರನ್ನು ಶೋಧಿಸಲು ಆಗುತ್ತಿರುವ ಸಮಯ ಮತ್ತು ವೆಚ್ಚ ತಡೆಯಲು ಈ ಪೋರ್ಟಲ್ ಸಹಾಯಕ ಎಂದು ಅವರು ತಿಳಿಸಿದರು.
ಎಂಎಸ್‌ಎಂಇ ಸತಿವಾಲಯದ ವಿಶೇಷ ಕಾರ್ಯದರ್ಶಿ ಅಮರೇಂದ್ರ ಸಿನ್ಹಾ, ಮುಂದಿನ ದಿನಗಳಲ್ಲಿ ಪೋರ್ಟಲ್‌ಗೆ ಹೆಚ್ಚಿನ ವಿಶೇಷತೆಗಳನ್ನು ಸೇರಿಸಲಾಗುವುದು. ಉದ್ಯಮ ಮತ್ತು ಉದ್ಯಮಮಶೀಲರ ಸ್ನೇಹಿಯಾಗಿ ಪೋರ್ಟಲ್ ರೂಪಿಸಲಾಗುವುದು ಎಂದರು.
ಈ ಪೋರ್ಟಲ್ ಎಂಎಸ್‌ಎಂಇ ವಲಯದ ಬದಲಾವಣೆಗೆ ನಾಂದಿ ಹಾಡಲಿದೆ. ಪೋರ್ಟಲ್ ಅಭಿವೃದ್ಧಿಗೆ ಒಂದು ವರ್ಷ ಹಿಡಿದಿದೆ. ಸದ್ಯಕ್ಕೆ ಅದು ತಯಾರಿಕಾ ರಂಗಕ್ಕೆ ಮಾತ್ರ ಅಭಿವೃದ್ಧಿಪಡಿಸಲಾಗಿದೆ. ಉದ್ಯೋಗಾಕಾಂಕ್ಷಿಗಳು ಯಾವುದೇ ಶುಲ್ಕ ನೀಡುವ ಅಗತ್ಯವಿಲ್ಲ. ಆದರೆ, ಎಂಎಸ್‌ಎಂಇ ಉದ್ಯಮ ಶುಲ್ಕ ನೀಡಬೇಕಾಗುತ್ತದೆ. ಸೇವಾ ವಲಯಕ್ಕೂ ಪೋರ್ಟಲ್ ಸೌಲಭ್ಯ ಒದಗಿಸುವ ಚಿಂತನೆ ಇದೆ ಎಂದು ಅವರು ತಿಳಿಸಿದರು.
