ರಾಷ್ಟ್ರೀಯ

ಮಾರ್ಪಾಡು ಮಾಡಿದರೆ ಯೋಗಕ್ಕೆ ಮುಸ್ಲಿಮರ ತಕರಾರಿಲ್ಲ: ಮದನಿ

Pinterest LinkedIn Tumblr

madani

ಹೊಸದಿಲ್ಲಿ: ಯೋಗದಲ್ಲಿ ಒಂದಿಷ್ಟು ಬದಲಾವಣೆಗಳನ್ನು ಮಾಡಿದರೆ ಅದನ್ನು ಅಭ್ಯಾಸ ಮಾಡುವುದಕ್ಕೆ ಮುಸ್ಲಿಮರಿಗೆ ಯಾವುದೇ ಸಮಸ್ಯೆ ಇಲ್ಲ ಎಂದು ಜಮಾಯಿತ್ ಉಲೇಮಾ ಎ ಹಿಂದ್ ನಾಯಕ ಮೌಲಾನಾ ಮೊಹಮ್ಮದ್ ಮದನಿ ಹೇಳಿದ್ದಾರೆ.

ಆದರೆ ಯೋಗಕ್ಕೆ ನಿರ್ದಿಷ್ಟ ಬಣ್ಣ ಬಳಿಯಲು ಕೆಲವರು ಪಟ್ಟು ಬಿಡದೆ ಯತ್ನಿಸುತ್ತಿದ್ದಾರೆ. ಇದರಿಂದ ಸಮಸ್ಯೆಗಳು ಉಂಟಾಗುತ್ತಿವೆ ಎಂದು ಅವರು ತಿಳಿಸಿದ್ದಾರೆ.

”ಮುಸ್ಲಿಮರಾದ ನಮಗೆ ಯೋಗದ ಬಗ್ಗೆ ಯಾವುದೇ ತಕರಾರೂ ಇಲ್ಲ. ದೈಹಿಕ ಕಸರತ್ತು ಹಾಗೂ ಜೀವನ ಮಾರ್ಗವಾಗಿ ಯೋಗವನ್ನು ಕಂಡರೆ ಅದರಿಂದ ತುಂಬ ಲಾಭವಿದೆ. ಆದರೆ ಇದಕ್ಕೆ ಧರ್ಮವನ್ನು ಗಂಟು ಹಾಕಬಾರದು,” ಎಂದು ಪ್ರತಿಪಾದಿಸಿದ್ದಾರೆ.

”ಕೆಲವೊಂದು ಮಾರ್ಪಾಡುಗಳನ್ನು ಮಾಡಿದರೆ ಹೆಚ್ಚು ಹೆಚ್ಚು ಮಂದಿ ಯೋಗವನ್ನು ಮಾಡುತ್ತಾರೆ. ಇದೊಂದು ಜನರನ್ನು ಒಗ್ಗೂಡಿಸುವ ಮಾಧ್ಯಮ,” ಎಂದು ಅವರು ಅಭಿಪ್ರಾಯಪಟ್ಟಿದ್ದಾರೆ.

”ಸೂರ್ಯ ನಮಸ್ಕಾರ ಎಂಬುದು ಸೂರ್ಯನನ್ನು ದೇವರು ಎಂದು ಭಾವಿಸುತ್ತದೆ. ಇದು ಇಸ್ಲಾಂ ತತ್ತ್ವಕ್ಕೆ ವಿರುದ್ಧ. ಇದನ್ನು ಸರಕಾರ ಏರ್ಪಡಿಸುವ ಸಮಾರಂಭಗಳಲ್ಲಿ ಮಾಡಬಾರದು,” ಎಂದು ಅವರು ಹೇಳಿದ್ದಾರೆ.

ಈಗಾಗಲೇ ಸರಕಾರ ಈ ಕುರಿತು ಸುತ್ತೋಲೆ ಹೊರಡಿಸಿದ್ದು, ಜೂನ್ 21ರಂದು ಆಚರಿಸುವ ಯೋಗ ದಿನದಂದು ಸೂರ್ಯನಮಸ್ಕಾರವನ್ನು ಕಡ್ಡಾಯಗೊಳಿಸಬಾರದು ಎಂದಿದೆ.

Write A Comment