ಹೊಸದಿಲ್ಲಿ: ಮ್ಯಾಗಿ ಕರ್ಮಕಾಂಡ ಬಯಲಾದಾಗಿನಿಂದ ದೇಶದಲ್ಲಿ ಸಿದ್ಧ ಆಹಾರ ಪದಾರ್ಥಗಳ ಮೇಲೆ ಸಂದೇಹ ಹೆಚ್ಚಾಗುತ್ತಿದೆ. ಆದರೆ, ವರ್ಷಗಳ ಹಿಂದೆಯೇ ಭಾರತದಿಂದ ಆಮದಾಗುವ ಅರ್ಧಕ್ಕೂ ಹೆಚ್ಚು ಸ್ನ್ಯಾಕ್ಸ್‌ಗಳನ್ನು ಅಮೆರಿಕ ನಿರ್ಬಂಧಿಸಿದೆ.
‘ಮೇಡ್ ಇನ್ ಇಂಡಿಯಾ’ ಎಂದು ಬರೆದಿರುವ ನೂರಾರು ಪದಾರ್ಥಗಳು ಮಾರಾಟಕ್ಕೆ ಯೋಗ್ಯವಲ್ಲ ಎಂದು ಅಮೆರಿಕದ ಆಹಾರ ಮತ್ತು ಔಷಧ ಸುರಕ್ಷತಾ ಮಂಡಳಿಯಾದ ಎಫ್‌ಡಿಎ ವರ್ಷಗಳ ಹಿಂದೆಯೇ ಷರಾ ಬರೆದಿದೆ.
ಈ ವರ್ಷದ ಆರಂಭದಲ್ಲಿ ಮಾರಾಟ ಪರವಾನಗಿ ಕೇಳಿದ ಭಾರತದ ಅರ್ಧಕ್ಕೂ ಹೆಚ್ಚು ಆಹಾರ ಪದಾರ್ಥಗಳನ್ನು ಬ್ಲಾಕ್ ಲಿಸ್ಟ್‌ನಲ್ಲಿ ಹಾಕಲಾಗಿದೆ ಎಂದು ತಿಳಿದುಬಂದಿದೆ.
”ಭಾರತದಿಂದ ಆಮದಾಗುವ ಆಹಾರ ಪದಾರ್ಥಗಳಲ್ಲಿ ಕೀಟನಾಶಕಗಳ ಅಂಶ ಹೆಚ್ಚಿರುತ್ತದೆ. ಪ್ಯಾಕೇಜಿಂಗ್ ಹಂತದಲ್ಲಿ ಮುತುವರ್ಜಿ ವಹಿಸುವುದಿಲ್ಲ. ಪದಾರ್ಥಗಳು ಕೊಳಕು ಮತ್ತು ಕೊಳೆತ ಪದಾರ್ಥಗಳಿಂದ ಕೂಡಿರುತ್ತದೆ,”ಎಂದು ಎಫ್‌ಡಿಎ ಹೇಳಿದೆ.
ಅಂದಹಾಗೆ ನಿರ್ಬಂಧಕ್ಕೊಳಗಾಗುತ್ತಿರುವ ಆಹಾರ ಪದಾರ್ಥಗಳನ್ನು ರಫ್ತು ಮಾಡುತ್ತಿರುವ ದೇಶಗಳಲ್ಲಿ ಭಾರತ ನಂಬರ್ 1 ಸ್ಥಾನದಲ್ಲಿದೆ. ಮೆಕ್ಸಿಕೊ, ದಕ್ಷಿಣ ಕೊರಿಯಾ ಕ್ರಮವಾಗಿ ಎರಡು ಹಾಗೂ ಮೂರನೇ ಸ್ಥಾನದಲ್ಲಿದೆ. ಭಾರತಕ್ಕಿಂತ ಹತ್ತು ಪಟ್ಟು ಹೆಚ್ಚು ಆಹಾರೋತ್ಪನ್ನಗಳನ್ನು ಅಮೆರಿಕಕ್ಕೆ ರಫ್ತು ಮಾಡುತ್ತಿರುವ ಚೀನಾ ಎಂಟನೇ ಸ್ಥಾನದಲ್ಲಿದೆ.
ಭಾರತದಿಂದ ಆಹಾರ ಪದಾರ್ಥಗಳು, ಸೌಂದರ‌್ಯ ವರ್ಧಕಗಳು, ಔಷಧಗಳು ಹಾಗೂ ಪಿಂಗಾಣಿ ವಸ್ತುಗಳನ್ನು ಆಮದು ಮಾಡಿಕೊಳ್ಳುತ್ತಿರುವ ಅಂಗಡಿಗಳನ್ನೂ ಎಫ್‌ಡಿಎ ಬಂದ್ ಮಾಡಿಸಿದೆ ಎಂದು ವಾಲ್‌ಸ್ಟ್ರೀಟ್ ಜರ್ನಲ್ ವರದಿ ಮಾಡಿದೆ.
”ಈ ವರ್ಷ ಫೆಬ್ರವರಿಯಲ್ಲಿ ಗುಜರಾತ್‌ನ ಆಹಾರ ಪದಾರ್ಥವೊಂದು ಅಮೆರಿಕದ ಲ್ಯಾಬ್‌ಗಳಲ್ಲಿ ಪರೀಕ್ಷೆಗೆ ಒಳಗಾಗಿತ್ತು. ಅದರ ಪ್ಯಾಕೆಟ್ ಮೇಲೆ ‘ಸ್ನ್ಯಾಕ್ಸ್ ಅಥವಾ ಆಹಾರ ಪದಾರ್ಥ’ ಎಂದು ಎಲ್ಲೂ ಬರೆದಿರಲಿಲ್ಲ. ಆ ಪದಾರ್ಥವನ್ನು ಪರೀಕ್ಷೆಗೆ ಒಳಪಡಿಸಿದಾಗ ಅದು ಸೇವನೆಗೆ ಯೋಗ್ಯವಲ್ಲದ ತಿನಿಸು ಎಂದು ತಿಳಿದುಬಂತು,” ಎಂದು ಎಫ್‌ಡಿಎ ಹೇಳಿದೆ.
ಮಾನವ ಸಂಪನ್ಮೂಲ ಕಡಿಮೆ: ಮ್ಯಾಗಿಯಲ್ಲಿ ಮೋನೊ ಸೋಡಿಯಂ ಗ್ಲುಟಮೇಟ್ ಮತ್ತು ಸೀಸದ ಅಂಶವಿದೆ ಎಂಬ ವಿಷಕಾರಿ ಅಂಶವಿದೆ ಎಂದು ತಿಳಿದುಬಂದ ನಂತರ ಭಾರತದ ಇತರೇ ಸಿದ್ಧ ಆಹಾರ ಪದಾರ್ಥಗಳನ್ನು ಪರೀಕ್ಷೆಗೆ ಒಳಪಡಿಸಬೇಕೆಂದು ಕೇಂದ್ರ ಸರಕಾರ ಆದೇಶಿಸಿದೆ ಆದರೆ, ಲಕ್ಷಗಟ್ಟಲೆ ಪದಾರ್ಥಗಳನ್ನು ಪರೀಕ್ಷೆಗೆ ಒಳಪಡಿಸಲು ಮಾನವ ಸಂಪನ್ಮೂಲ ಕಡಿಮೆ ಇದೆ ಎಂಬ ಜವಾಬು ದೊರೆತಿದೆ.
”ಆಹಾರ ಸುರಕ್ಷತೆಯನ್ನು ಮುಂದುವರಿದ ದೇಶಗಳಲ್ಲಿ ಸೂಕ್ಷ್ಮವಾಗಿ ಪರಿಗಣಿಸಲಾಗುತ್ತದೆ. ಅದರಲ್ಲೂ ಅಮೆರಿಕದಲ್ಲಿ ಅತ್ಯಾಧುನಿಕ ತಂತ್ರಜ್ಞಾನವಿದೆ. ಆದರೆ, ಭಾರತದಲ್ಲಿ ಮೂಲಭೂತ ಸೌಕರ‌್ಯಗಳ ಕೊರತೆ ಇದೆ,” ಎಂದು ಭಾರತೀಯ ಆಹಾರ ಸುರಕ್ಷತಾ ಮಂಡಳಿಯ ಮುಖ್ಯಸ್ಥ ಯದುವೀರ್ ಸಿಂಗ್ ಮಾಲಿಕ್ ತಿಳಿಸಿದ್ದಾರೆ.
ಹಲ್ದಿರಾಮ್‌ಗೂ ಗೇಟ್ ಪಾಸ್ ನಾಗ್‌ಪುರ ಮೂಲದ ಹಲ್ದಿ ರಾಮ್ ಸಂಸ್ಥೆಯ ಕೆಲವು ಉತ್ಪನ್ನಗಳೂ ಅಮೆರಿಕದಲ್ಲಿ ನಿರ್ಬಂಧಕ್ಕೊಳಗಾಗಿವೆ. ಅಲ್ಲಿನ ಕಾನೂನಿನ ಪ್ರಕಾರ ನಿರ್ಬಂಧಕ್ಕೊಳಪಟ್ಟ ಉತ್ಪನ್ನಗಳನ್ನು ಮಾರಾಟಮಾಡುವುದು ಶಿಕ್ಷಾರ್ಹ ಅಪರಾಧ. ಹಲ್ದಿರಾಮ್‌ನ ಸಕ್ಕರೆ ಮಿಟಾಯಿಗಳು, ಉಪ್ಪು ಮಿಶ್ರಿತ ಸ್ನ್ಯಾಕ್ಸ್‌ಗಳು ನಿರ್ಬಂಧಕ್ಕೊಳಗಾದ ಆಹಾರ ಪದಾರ್ಥಗಳ ಪಟ್ಟಿಯಲ್ಲಿವೆ.
”ನಮ್ಮ ಆಹಾರ ಪದಾರ್ಥಗಳು ನೂರಕ್ಕೆ ನೂರು ಪ್ರತಿಶತ ಸುರಕ್ಷಿತ. ಭಾರತ ಹಾಗೂ ಅಮೆರಿಕದಲ್ಲಿ ಸುರಕ್ಷತಾ ಮಾನದಂಡಗಳ ವ್ಯತ್ಯಾಸವಿದೆ. ಭಾರತದಲ್ಲಿ ಅನುಮತಿ ಪಡೆದಿರುವ ಕೆಲವು ಕೀಟ ನಾಶಕಗಳನ್ನು ಅಮೆರಿಕ ನಿರ್ಬಂಧಿಸಿದೆ. ಅದೇ ರೀತಿ ಆಹಾರ ಪದಾರ್ಥಗಳನ್ನೂ ನೋಡಲಾಗುತ್ತದೆ,” ಎಂದು ಹಲ್ದಿರಾಮ್ ಕಂಪನಿಯ ಉಪಾಧ್ಯಕ್ಷ ಎ ಕೆ ತ್ಯಾಗಿ ತಿಳಿಸಿದ್ದಾರೆ.
ಬ್ರಿಟಾನಿಯಾ ಈ ವರ್ಷ ಅಮೆರಿಕದ ಲ್ಯಾಬೊರೇಟರಿಗಳಲ್ಲಿ ಪರೀಕ್ಷೆಗೊಳಗಾದ ಭಾರತದ 217 ಆಹಾರ ಪದಾರ್ಥಗಳು ನಿರ್ಬಂಧಕ್ಕೊಳಗಾಗಿವೆ. ಈ ಪೈಕಿ ಬ್ರಿಟಾನಿಯಾ ಕಂಪನಿಯ ಬಿಸ್ಕತ್‌ಗಳೂ ಇವೆ ಎಂದು ಎಫ್‌ಡಿಎ ತನ್ನ ವೆಬ್‌ಸೈಟ್‌ನಲ್ಲಿ ಹೇಳಿದೆ. ”ಬಿಸ್ಕತ್ ತಯಾರಿಕೆಗೆ ಯಾವ ಪದಾರ್ಥಗಳನ್ನು ಎಷ್ಟು ಪ್ರಮಾಣದಲ್ಲಿ ಬಳಸಲಾಗಿದೆ. ಉತ್ಪನ್ನಗಳಲ್ಲಿ ಇರುವ ಪೋಷಕಾಂಶಗಳು ಎಷ್ಟು ಎಂಬುದನ್ನು ಪ್ಯಾಕೆಟ್ ಮೇಲೆ ಬರೆದಿಲ್ಲ,” ಎಂದು ಎಫ್‌ಡಿಎ ತನ್ನ ವೆಬ್‌ಸೈಟ್‌ನಲ್ಲಿ ಬರೆದಿದೆ.
