ಹೊಸದಿಲ್ಲಿ: ದೇಶದಲ್ಲಿ ಇದೇ ಮೊದಲ ಬಾರಿಗೆ, ಅಪ್ರಾಪ್ತ ವಯಸ್ಸಿನ ಮಕ್ಕಳ ಪಾಲನೆ ಹಾಗೂ ಪೋಷಣೆಯಲ್ಲಿ ವಿಚ್ಛೇದಿತರಿಗೆ ಸಮಾನ ಅವಕಾಶ ಕಲ್ಪಿಸುವ ಸಂಬಂಧ ಕಾನೂನು ಆಯೋಗ ಪ್ರಸ್ತಾವನೆ ಸಲ್ಲಿಸಿದೆ.
ಮಕ್ಕಳ ಪಾಲನೆ ಮತ್ತು ಪೋಷಣೆಗೆ ಸಂಬಂಧಿಸಿದ ಈಗಿನ ಕಾನೂನಿಗೆ ತಿದ್ದುಪಡಿಗಳನ್ನು ಸೂಚಿಸಿ ಕಾನೂನು ಆಯೋಗ ತನ್ನ ಕರಡು ಪ್ರಸ್ತಾವನೆಯನ್ನು ಶುಕ್ರವಾರ ಸರಕಾರಕ್ಕೆ ಸಲ್ಲಿಸಿದೆ. ‘ಈಗಿನ ಕಾನೂನಿನಲ್ಲಿ ಮಕ್ಕಳ ಪಾಲನೆ ಹಕ್ಕಿನಲ್ಲಿ ಅಸಮಾನತೆ ಇದ್ದು, ಅದನ್ನು ಸರಿಪಡಿಸುವ ಪ್ರಯತ್ನವಾಗಿ ಮಕ್ಕಳ ಜಂಟಿ ಪಾಲನೆ ಪರಿಕಲ್ಪನೆಯನ್ನು ಪ್ರಸ್ತಾಪಿಸಲಾಗಿದೆ,’ ಎಂದು ಕಾನೂನು ಆಯೋಗದ ಅಧ್ಯಕ್ಷ ನ್ಯಾಯಮೂರ್ತಿ ಎಪಿ ಶಾ ಹೇಳಿದ್ದಾರೆ.
ಸದ್ಯ ಪಾಲನೆ ಹಕ್ಕಿನ ಬಗ್ಗೆ ನಿರ್ದಿಷ್ಟ ನಿಯಮಗಳಿಲ್ಲ. ಮಕ್ಕಳ ಯೋಗಕ್ಷೇಮವನ್ನು ಗಮನದಲ್ಲಿಟ್ಟುಕೊಂಡು ನಿರ್ಣಯಗಳನ್ನು ಕೈಗೊಳ್ಳಲಾಗುತ್ತಿತ್ತು . ಈ ಎಲ್ಲ ಅಂಶಗಳನ್ನು ಪರಿಗಣಿಸಿ ಕಾನೂನು ಆಯೋಗ ಕಾಯಿದೆಗೆ ಕೆಲವು ತಿದ್ದುಪಡಿಗಳನ್ನು ಸೂಚಿಸಿದೆ. ‘ಬದಲಾದ ಸಾಮಾಜಿಕ ವ್ಯವಸ್ಥೆಗೆ ಹೊಂದಿಕೊಳ್ಳಲು ಕಾನೂನಿಗೆ ತಿದ್ದುಪಡಿ ತರುವುದು ಅನಿವಾರ್ಯ,’ ಎಂದು ಆಯೋಗ ಹೇಳಿದೆ.
‘ಮಕ್ಕಳಿಗೆ ಯಾರ ಆರೈಕೆ ಮುಖ್ಯ ಎಂದು ನಿರ್ಧರಿಸುವ ವಿಚಾರದಲ್ಲಿ ಗೊಂದಲವಿದೆ, ನ್ಯಾಯಾಂಗದಲ್ಲೂ ಈ ಬಗ್ಗೆ ಒಮ್ಮತ ಮೂಡಿಲ್ಲ. ಪರಿಣಾಮವಾಗಿ ಮಕ್ಕಳ ಪಾಲನೆ ಹಕ್ಕಿಗಾಗಿ ಕಾನೂನು ಸಮರಗಳು ನಡೆಯುತ್ತಿವೆ. ಇಂಥ ನಿರ್ಧಾರಗಳಿಂದ ಮಕ್ಕಳ ಹಿತಾಸಕ್ತಿ ಕಾಯುವ ಖಾತ್ರಿ ಇಲ್ಲ,’ ಎಂದು ನ್ಯಾಯಮೂರ್ತಿ ಶಾ ಹೇಳಿದ್ದಾರೆ.
ಮಗುವಿಗೆ 18 ವರ್ಷ ತುಂಬುವವರೆಗೆ ಕಾಲಮಿತಿ ಇಲ್ಲದೇ ಜತೆಯಲ್ಲಿ ಬೇಕಾದಷ್ಟು ಸಮಯ ಕಳೆಯುವ ಅವಕಾಶ ಹಾಗೂ ಬುದ್ಧಿಮಾಂಧ್ಯ ಹಾಗೂ ಅಂಗವಿಕಲ ಮಕ್ಕಳಿಗೆ ಜೀವನ ಪರ್ಯಂತ ಬೆಂಬಲ ನೀಡುವ ಅವಕಾಶ. ಅದಲ್ಲದೇ, ಅಜ್ಜಿ, ತಾತನ ಜತೆ ಸಂಪರ್ಕದಲ್ಲಿರುವ ಹಾಗೂ ಇನ್ನಿತರ ನಿರ್ಣಯಗಳನ್ನು ಕೈಗೊಳ್ಳುವ ವಿಷಯಗಳ ಬಗ್ಗೆಯೂ ಪ್ರಸ್ತಾಪಿಸಲಾಗಿದೆ.
1890ರ ಮಕ್ಕಳ ಮತ್ತು ಪೋಷಕರ ಕಾಯಿದೆ ಅನ್ವಯ ಮಕ್ಕಳ ಪಾಲನೆಯ ಸ್ವಾಭಾವಿಕ ಹಕ್ಕು ತಂದೆಗಿದೆ. 1956ರ ಹಿಂದೂ ಅಲ್ಪಸಂಖ್ಯಾತ, ಪಾಲನೆ ಕಾಯಿದೆಯಲ್ಲೂ ಮಹಿಳೆಗೆ ಸಮಾನ ಅವಕಾಶ ಇಲ್ಲ. ಈಗಿನ ಪ್ರಸ್ತಾವನೆಯಲ್ಲಿ ಪಾಲನೆಯ ಹಕ್ಕು ಹಾಗೂ ಇತರ ನಿರ್ಣಯಗಳ ಬಗ್ಗೆ ಸ್ಪಷ್ಟ ವಿವರಣೆ ಇದೆ. ಮಕ್ಕಳ ಹಾಗೂ ಇತರರ ವಿಚಾರವಾಗಿ ಪೋಷಕರ ನಡುವೆ ಸಂಘರ್ಷ ಏರ್ಪಟ್ಟರೆ ಅದನ್ನು ನಿರ್ವಹಿಸುವ ಬಗ್ಗೆಯೂ ಅವಲೋಕಿಸಲಾಗಿದೆ.
