ಅಪ್ರಾಪ್ತರ ಮರಣದಂಡನೆ ಶಿಕ್ಷೆ ರದ್ದು: ಸೌದಿ ಅರೇಬಿಯಾ ಐತಿಹಾಸಿಕ ನಿರ್ಧಾರ

ದುಬೈ: ಅಪ್ರಾಪ್ತರು ಮಾಡಿದ ತಪ್ಪುಗಳಿಗೆ ಮರಣದಂಡನೆ ವಿಧಿಸುವುದನ್ನು ಸೌದಿ ಅರೇಬಿಯಾ ನಿಲ್ಲಿಸಿದೆ ಎಂದು ಉನ್ನತ ಮೂಲದ ಅಧಿಕಾರಿಗಳು ಬಹಿರಂಗಪಡಿಸಿದ್ದಾರೆ.

ತಮ್ಮ ಸಾಮಾಜ್ಯದ ನಿರ್ಬಂಧವನ್ನು ಸಡಿಲ ಮಾಡುವಲ್ಲಿ ಸೌದಿ ದೊರೆ ಸಲ್ಮಾನ್ ಅವರ ಮಗ ಮತ್ತು ಭವಿಷ್ಯದ ಉತ್ತರಾಧಿಕಾರಿ ಮೊಹಮ್ಮದ್ ಬಿನ್ ಸಲ್ಮಾನ್ ಅವರು ಪ್ರಮುಖರಾಗಿದ್ದಾರೆ ಎನ್ನಲಾಗಿದೆ. ಅಪ್ರಾಪ್ತರಿಗೆ ಮರಣದಂಡನೆ ನೀಡಬಾರದು. ಅದರ ಬದಲಾಗಿ ಸೆರೆವಾಸ, ದಂಡ ಮತ್ತು ಸಮುದಾಯದ ಸೇವೆ ಮಾಡುವ ಶಿಕ್ಷೆಯನ್ನು ನೀಡಬೇಕು ಎಂದು ಆದೇಶ ಹೊರಡಿಸಲಾಗಿದ್ದು, ಹೀಗಾಗಿ ನ್ಯಾಯಾಲಯ ಭವಿಷ್ಯದಲ್ಲಿ ಇದೇ ಆದೇಶವನ್ನು ಪಾಲಿಸಬೇಕಾಗಿದೆ. ಈ ಮೂಲಕ ಐತಿಹಾಸಿಕ ವಿವಾದಿತ ಶಿಕ್ಷೆಗೆ ರಾಜಾಡಳಿತ ಅಂತ್ಯ ಹಾಡಿದೆ. ಇಷ್ಟು ಮಾತ್ರವಲ್ಲ ಇನ್ನು ಮುಂದೆ ಪ್ರಕರಣಗಳನ್ನು ಸ್ಪಷ್ಟವಾಗಿ ಪರಿಶೀಲನೆ ಮಾಡಬೇಕೆಂದೂ, ಜತೆಗೆ 10 ವರ್ಷ ಶಿಕ್ಷೆ ಪೂರ್ಣಗೊಳಿಸಿದವರ ಶಿಕ್ಷೆಯನ್ನು ಕೈಬಿಡುವಂತೆಯೂ ರಾಜ ಮನೆತನ ಹೇಳಿದೆ.

ಈ ಹಿಂದೆ ಅಪ್ರಾಪ್ತರು ಮಾಡಿದ ಅಪರಾಧಗಳಿಗೆ ಸೌದಿಯಲ್ಲಿ ಮರಣದಂಡನೆ ಅಥವಾ ಕಲ್ಲುಗಳಿಂದ ಹೊಡೆಯುವ ಶಿಕ್ಷೆ ವಿಧಿಸಲಾಗುತ್ತಿತ್ತು. ಸದ್ಯ ಅದನ್ನು ರದ್ದು ಮಾಡಲಾಗಿದ್ದು, ಈಗಾಗಲೇ ಮರಣದಂಡನೆ ಶಿಕ್ಷೆಗೆ ಗುರಿಯಾಗಿರುವ ಅಲ್ಪಸಂಖ್ಯಾತ ಶಿಯಾ ಸಮುದಾಯದ ಕನಿಷ್ಠ ಆರು ಅಪ್ರಾಪ್ತರ ಪ್ರಾಣ ಉಳಿಯಲಿದೆ ಎಂದು ಅಭಿಪ್ರಾಯ ವ್ಯಕ್ತವಾಗಿದೆ. ಅರಬ್ ದಂಗೆಯ ಸಮಯದಲ್ಲಿ ಈ ಆರು ಮಂದಿ 18 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರಾಗಿದ್ದರು ಸರಕಾರಿ ವಿರೋಧಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದಾರೆ ಎಂದು ಆರೋಪಿಸಿ ಮರಣ ದಂಡನೆ ಶಿಕ್ಷೆ ವಿಧಿಸಲಾಗಿತ್ತು. ಈ ಕೃತ್ಯದ ಆಧಾರವಾಗಿ ಅಪ್ರಾಪ್ತರಿಗೆ ಮರಣ ದಂಡನೆ ಶಿಕ್ಷೆಯನ್ನು ನೀಡದಂತೆ ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ತಜ್ಞರು ಕಳೆದ ವರ್ಷ ಸೌದಿ ಅರೇಬಿಯಾಕ್ಕೆ ತುರ್ತು ಮನವಿ ಕೂಡ ಮಾಡಿದ್ದರು. ಭಯೋತ್ಪಾದನೆ, ಹತ್ಯೆ, ಅತ್ಯಾಚಾರ, ಸಶಸ್ತ್ರ ದರೋಡೆ ಮತ್ತು ಮಾದಕವಸ್ತು ಕಳ್ಳಸಾಗಣೆಗೆ ವಿಚಾರಕ್ಕೆ ಸಂಬಂಧಿಸಿ ಇಲ್ಲಿ ಈವರೆಗೆ ಅತೀ ಹೆಚ್ಚು ಮರಣದಂಡನೆ ಶಿಕ್ಷೆ ವಿಧಿಸಲಾಗಿದೆ. ಇದರಿಂದಾಗಿ ವಿಶ್ವದಲ್ಲಿಯೇ ಅತಿ ಹೆಚ್ಚು ಮರಣದಂಡನೆ ನೀಡಿರುವ ದೇಶಗಳ ಪಟ್ಟಿಯಲ್ಲಿ ಸೌದಿ ದೇಶ ಉನ್ನತ ಸ್ಥಾನದಲ್ಲಿದೆ.

ಸೌದಿ ರಾಜನ ಉತ್ತರಾಧಿಕಾರಿ ಮೊಹಮ್ಮದ್ ಬಿನ್ ಸಲ್ಮಾನ್ ದೇಶವನ್ನು ಆಧುನಿಕತೆಯತ್ತ ಕೊಂಡೊಯ್ಯುತ್ತಿದ್ದು, ವಿದೇಶಿ ಬಂಡವಾಳ ಹೂಡಿಕೆ, ಮಹಿಳಾ ಹಕ್ಕುಗಳ ಹೋರಾಟಗಾರರು, ಸಮಾಜ ಸುಧಾರಕರು, ಬರಹಗಾರರ ಕಡೆ ಹೆಚ್ಚಿನ ಗಮನ ನೀಡುತ್ತಿದ್ದು, ದೇಶದ ಅಭಿವೃದ್ಧಿಗೆ ಶ್ರಮಿಸುತ್ತಿದ್ದಾರೆ. ಈ ಹಿಂದೆ ಪತ್ರಕರ್ತ ಜಮಾಲ್ ಕಶೋಗ್ಗಿ ಅವರ ಹತ್ಯೆ ಬಳಿಕ ಸೌದಿ ರಾಜಮನೆತನ ಜಗತ್ತಿನಾದ್ಯಂತ ವ್ಯಾಪಕ ಟೀಕೆಗೆ ಗುರಿಯಾಗಿತ್ತು. ಆದರೆ ಈ ಕೊಲೆಯ ಹಿಂದೆ ರಾಜಮನೆತನದವರ ಕೈವಾಡವಿಲ್ಲ ಎಂದು ಸ್ಪಷ್ಟಪಡಿಸಿತ್ತು.