ರಿಯಾದ್‌/ತೆಹ್ರಾನ್‌: ಮಧ್ಯ ಪೂರ್ವ ದೇಶಗಳಲ್ಲಿ ಕೊರೊನಾ ಅಬ್ಬರಿಸುತ್ತಿದೆ. ಹಲವು ದೇಶಗಳಲ್ಲಿ ರೋಗಿಗಳಿಗೆ ಕೊರೊನಾ ಇರುವುದು ದೃಢಪಟ್ಟಿದ್ದು, ಸೌದಿ ಅರೇಬಿಯಾ ಪವಿತ್ರ ಹಜ್‌ ಯಾತ್ರೆಗೆ ಕಠಿಣ ನಿರ್ಬಂಧಗಳನ್ನು ಹೇರಿದೆ.
ಸೌದಿ ಅರೇಬಿಯಾ ಸರಕಾರ ಕೊರೊನಾ ವೈರಸ್‌ನ ಭಯದಲ್ಲಿ ದೇಶದಲ್ಲಿರುವ ಮುಸ್ಲಿಮರ ಪವಿತ್ರ ಸ್ಥಳಗಳಾದ ಮೆಕ್ಕಾ ಮತ್ತು ಕಾಬಾಗೆ ವಿದೇಶಿಯರ ಪ್ರವೇಶವನ್ನು ನಿರ್ಬಂಧಿಸಿದೆ. ಹಜ್‌ ಯಾತ್ರೆ ಆರಂಭವಾಗಲು ಕೇವಲ ತಿಂಗಳ ಅವಧಿ ಬಾಕಿ ಇದ್ದು, ಗುರುವಾರ ಈ ನಿರ್ಬಂಧ ಹೊರಬಿದ್ದಿದೆ.
ಮದೀನಾದಲ್ಲಿರುವ ಪ್ರವಾದಿ ಮಹಮ್ಮದ್‌ರ ಮಸೀದಿಗೂ ಈ ನಿರ್ಬಂಧ ಅನ್ವಯಿಸಲಿದೆ. ಇದರ ಜೊತೆಗೆ ಕೊರೊನಾ ವೈರಸ್ ದೃಢಪಟ್ಟಿರುವ ದೇಶಗಳ ಜನರಿಗೆ ಪ್ರವಾಸಿ ವೀಸಾ ನೀಡದಿರಲೂ ಅಲ್ಲಿನ ಸರಕಾರ ನಿರ್ಧರಿಸಿದೆ.
ಇರಾನ್‌ನಲ್ಲಿ 22 ಸಾವು
ಮಧ್ಯ ಪೂರ್ವ ಏಷ್ಯಾದಲ್ಲಿ ಇರಾನ್ ಕೊರೊನಾ ವೈರಸ್‌ನಿಂದ ಭಾರಿ ಹೊಡೆತಕ್ಕೆ ಸಿಲುಕಿದ್ದು 26 ಜನರು ಸಾವನ್ನಪ್ಪಿದ್ದಾರೆ. ದೇಶದಲ್ಲಿ 245 ಕೊರೊನಾ ವೈರಸ್ ಪ್ರಕರಣಗಳು ದೃಢಪಟ್ಟಿದೆ. ಚೀನಾದಿಂದ ಹೊರತುಪಡಿಸಿ ಇರಾನ್‌ನಲ್ಲಿ ಕೊರೊನಾಗೆ ಅತೀ ಹೆಚ್ಚಿನ ಜನರು ಬಲಿಯಾಗಿದ್ದಾರೆ.
ಇರಾನ್‌ನ ಉಪ ಆರೋಗ್ಯ ಸಚಿವ, ಸಂಸದ, ಇರಾನ್ ಸಂಸತ್‌ನ ರಾಷ್ಟ್ರೀಯ ಭದ್ರತೆ ಮತ್ತು ವಿದೇಶಾಂಗ ನೀತಿ ಸಮಿತಿಯ ಅಧ್ಯಕ್ಷರಿಗೂ ಸೋಂಕು ತುಗಲಿದೆ. ಇದೇ ವೇಳೆ ಇರಾನ್ ಸೋಂಕು ಪೀಡಿತರ ಸಂಖ್ಯೆಯನ್ನು ಕಡಿಮೆ ಹೇಳುತ್ತಿರಬಹುದು ಎಂಬುದಾಗಿಯೂ ತಜ್ಞರು ಅನುಮಾನಿಸಿದ್ದಾರೆ.
ಇನ್ನು ಪುಟಾಣಿ ರಾಷ್ಟ್ರ ಕುವೈತ್‌ನಲ್ಲಿ ಕೊರೊನಾ ಪೀಡಿತರ ಸಂಖ್ಯೆ ಗುರುವಾರದ ವೇಳೆಗೆ 43ಕ್ಕೆ ಏರಿಕೆಯಾಗಿದೆ. ಬಹ್ರೇನ್‌ನಲ್ಲಿ 33 ಪ್ರಕರಣಗಳು ವರದಿಯಾಗಿದ್ದರೆ, ಇರಾಕ್‌ನಲ್ಲಿ 6 ಜನರಿಗೆ ಸೋಂಕು ತಗುಲಿದೆ. ಈ ಘಟನೆಗಳ ಬೆನ್ನಿಗೆ ಅರಬ್‌ ರಾಷ್ಟ್ರಗಳು ಪರಸ್ಪರ ದೇಶಗಳ ನಡುವೆ ವಿಮಾನಯಾನಕ್ಕೆ ನಿರ್ಬಂಧಗಳನ್ನು ಹೇರಿವೆ.
Comments are closed.