ದಮಾಮ್, ಡಿ. 12: ಸುದ್ದಿಯ ವಸ್ತುನಿಷ್ಠ ವಿಶ್ಲೇಷಣೆಯ ಮೂಲಕ ಮಾಧ್ಯಮ ಕ್ಷೇತ್ರದಲ್ಲಿ ಸಾಮಾಜಿಕ ಕಳಕಳಿಯ ಮ್ಯಾಗಝಿನ್ ಎನಿಸಿಕೊಂಡಿರುವ ‘ಪ್ರಸ್ತುತ ಪಾಕ್ಷಿಕ’ದ ‘ಪ್ರಸ್ತುತ ಕ್ಯಾಲೆಂಡರ್-2015’ ಬಿಡುಗಡೆ ಸಮಾರಂಭವು ಡಿಸೆಂಬರ್ 12ರಂದು ಜುಬೈಲ್‌ನ ಗಲ್ಫ್ ಏಶಿಯನ್ ಮೆಡಿಕಲ್ ಸೆಂಟರ್ ಸಭಾಂಗಣದಲ್ಲಿ ನಡೆಯಿತು.
ಸಮಾರಂಭದ ಅಧ್ಯಕ್ಷತೆ ವಹಿಸಿದ್ದ ಗಲ್ಫ್ ಏಶಿಯನ್ ಮೆಡಿಕಲ್ ಸೆಂಟರ್‌ನ ನಿರ್ದೇಶಕ ಅಬ್ದುಲ್ಲಾ ಇಬ್ರಾಹಿಮ್ ಅವರು ‘ಪ್ರಸ್ತುತ ಕ್ಯಾಲೆಂಡರ್-2015’ ಬಿಡುಗಡೆಗೊಳಿಸಿ ಶುಭಹಾರೈಸಿದರು.ಮುಖ್ಯ ಅತಿಥಿಗಳಾಗಿ ಇಂಡಿಯನ್ ಸೋಶಿಯಲ್ ಪೋರಮ್‌ನ ಕೇಂದ್ರ ಸಮಿತಿ ಕಾರ್ಯದರ್ಶಿ ಶರೀಫ್ ಜೋಕಟ್ಟೆ, ಜಮೀಯ್ಯತುಲ್ ಫಲಾಹ್ ಅಧ್ಯಕ್ಷ ಯು.ಫಯಾಝ್ ಅಹ್ಮದ್ ಉಪಸ್ಥಿತರಿದ್ದರು.
ಪ್ರಸ್ತುತ ಪಾಕ್ಷಿಕದ ಮಾಜಿ ಸಂಪಾದಕ ಫಯಾಝ್ ಎನ್. ಅವರು ಪ್ರಾಸ್ತಾವಿಕವಾಗಿ ಮಾತನಾಡಿ, ಮಾಧ್ಯಮ ಕ್ಷೇತ್ರದಲ್ಲಿ ಪ್ರಸ್ತುತ ಪಾಕ್ಷಿವು ನಿರ್ವಹಿಸುತ್ತಿರುವ ಪಾತ್ರದ ಬಗ್ಗೆ ವಿವರಿಸಿದರು. ಪ್ರಸ್ತುತ ರೀಡರ್ಸ್ ಫೋರಮ್ ಆಯೋಜಿಸಿದ್ದ ಈ ಕಾರ್ಯಕ್ರಮವನ್ನು ಅಬ್ದುಲ್ ಸಮತ್ ನಿರೂಪಿಸಿದರು.
ಪ್ರಸ್ತುತ ಪಾಕ್ಷಿಕ ಕ್ಯಾಲೆಂಡರ್-2015ರ ಜಾಹೀರಾತುದಾರರಾಗಿ ಅಲ್‌ಫಲಾಹ್ ಸಂಸ್ಥೆ, ಗಲ್ಫ್ ಏಶಿಯನ್ ಮೆಡಿಕಲ್ ಸೆಂಟರ್, ಫತೇಹ್ ಅಲ್ ಜುಬೈಲ್, ವೈಮಾರ್ಕ್ ಮಾರ್ಕೆಟಿಂಗ್ ಹಾಗೂ ಸೌದಿ ಎಕ್ಸ್‌ಪ್ಲೋರರ್ ಮುಂತಾದ ಕಂಪೆನಿಗಳು ಸಹಕರಿಸಿದ್ದವು.
