ಚಂದ್ರನಲ್ಲಿ ಅಧ್ಯಯನ ನಡೆಸಲು ಸಾಗಿದ ವಿಕ್ರಂ ಲ್ಯಾಂಡರ್ ಇಸ್ರೋ ಸಂಪರ್ಕ ಕಳೆದುಕೊಂಡಿದೆ. ಆದರೆ ಚಂದ್ರಯಾನ 2 ಯೋಜನೆ ಶೇ.95 ರಷ್ಟು ಯಶಸ್ವಿಯಾಗಿದೆ ಎಂದು ಇಸ್ರೋ ವಿಜ್ಞಾನಿಗಳು ಅಭಿಪ್ರಾಯಪಟ್ಟಿದ್ದಾರೆ.
ಆದರೆ ಈ ಯೋಜನೆ ಮೂಲಕ ಭಾರತ ಹೊಸ ಮುನ್ನುಡಿಯನ್ನು ಬರೆದಿದೆ. ಚಂದ್ರನ ದಕ್ಷಿಣ ಧ್ರುವ ತಲುಪುವುದು ಅತ್ಯಂತ ಕ್ಲಿಷ್ಟಕರ ಎಂದೇ ವಿವರಿಸಲಾಗಿತ್ತು. ಈ ವರೆಗೆ ಚಂದ್ರನ ಅಂಗಳಕ್ಕಿಳಿದ ಅಮೆರಿಕ, ರಷ್ಯಾ ಹಾಗೂ ಚೀನಾ ದೇಶಗಳು ಚಂದ್ರನ ಅಂಗಳಕ್ಕಿಳಿದಿವೆಯಾದರೂ, ದಕ್ಷಿಣ ಧ್ರುವದ ಭಾಗದಲ್ಲಿ ಅಧ್ಯಯನ ನಡೆಸಿಲ್ಲ. ಈ ಭಾಗದಲ್ಲಿ ಇನ್ನೂ ಏನಿದೆ, ಏನಿರಬಹುದು ಎಂಬುದು ಪ್ರಶ್ನಾರ್ಥಕವೇ! ಈ ಪ್ರಶ್ನೆಗಳಿಗೆ ಉತ್ತರ ಕಂಡುಕೊಳ್ಳಲೆಂದೇ ವಿಕ್ರಂ ಲ್ಯಾಂಡರ್ನಲ್ಲಿ ಪ್ರಜ್ಞಾನ್ ರೋವರ್ನನ್ನು ಇರಿಸಿ ಚಂದ್ರಯಾನ 2 ಆರ್ಬಿಟರ್ನ ಮೂಲಕ ದಕ್ಷಿಣ ಧ್ರುವದತ್ತ ಇಳಿಸಲು ಯೋಜನೆ ದಾರಿ ಮಾಡಲಾಗಿತ್ತು.
ಸೌತ್ ಪೋಲ್ ವಿಶೇಷತೆ ಏನು?
ದಕ್ಷಿಣ ಧ್ರುವ ಪ್ರದೇಶದ ಅನೇಕ ಪ್ರದೇಶಗಳಿಗೆ ಸೂರ್ಯನ ಬೆಳಕೇ ಬೀಳುವುದಿಲ್ಲ. ಅಲ್ಲದೆ ಅಲ್ಲಿನ ವಾತಾವರಣ -230 ಡಿಗ್ರಿ ಸೆಲ್ಸಿಯಸ್ ವರೆಗೂ ಇಳಿಯುವ ಸಾಧ್ಯತೆಗಳಿರುತ್ತದೆ. ಧ್ರುವ ಪ್ರದೇಶದ ಮೇಲ್ಮೈಯೂ ನಮ್ಮ ಊಹೆಗೂ ನಿಲುಕದ್ದು. ಸೂರ್ಯನ ಬೆಳಕಿನ ಕೊರತೆ ಹಾಗೂ ಅತ್ಯಂತ ಕಡಿಮೆ ತಾಪಮಾನ, ವಿಷಮ ವಾತಾವರಣದಲ್ಲಿ ಉಪಕರಣಗಳು ಕೆಲಸ ಮಾಡುವುದೇ ಕಷ್ಟಕರ. ಅಲ್ಲದೆ ಕಿಲೋಮೀಟರ್ಗಟ್ಟಲೆ ದೊಡ್ಡದಾಗಿರಬಹುದಾದ ಕುಳಿಗಳು ವಿಕ್ರಂ ಲ್ಯಾಂಡಿಂಗ್ಗೆ ಬಹುದೊಡ್ಡ ಚಾಲೆಂಜ್ ಎನ್ನಲಾಗಿತ್ತು. ಈ ಎಲ್ಲ ಕ್ಲಿಷ್ಟತೆಯ ಕಾರಣದಿಂದಲೇ ಚಂದ್ರನ ದಕ್ಷಿಣ ಧ್ರುವದ ಬಗ್ಗೆ ಈ ವರೆಗೆ ಅಧ್ಯಯನಗಳು ವಿರಳವಾಗಿತ್ತು.
ವಿವಿಧ ದೇಶಗಳು ನಡೆಸಿದ ಬಾಹ್ಯ ಅಧ್ಯಯನದ ಪ್ರಕಾರ, ಚಂದ್ರನ ದಕ್ಷಿಣ ಧ್ರುವ ಅತ್ಯಂತ ಶ್ರೀಮಂತ ಹಾಗೂ ನೀರಿನ ಅಂಶಗಳಿರುವ ಸಾಧ್ಯತೆಗಳೇ ಹೆಚ್ಚು ಎಂಬುದನ್ನು ಪ್ರತಿಪಾದಿಸಿದ್ದವು. ಆದರೆ ಅತ್ಯಂತ ಕಡಿಮೆ ತಾಪಮಾನದಲ್ಲಿ ಉಪಕರಣಗಳು ಫ್ರೀಜ್ ಆಗುವುದರಿಂದ ಇಲ್ಲಿನ ಅನ್ವೇಷಣೆ ಸವಾಲಿನ ಸಂಗತಿಯಾಗಿತ್ತು. ಈ ಎಲ್ಲ ವಿಚಾರಗಳ ಬಗ್ಗೆ ಜಗತ್ತಿಗೆ ತಿಳಿಸುವ ಉದ್ಧೇಶವೇ ಇಸ್ರೋದ ಗುರಿಯಾಗಿತ್ತು. ಇದಕ್ಕಾಗಿಯೇ ಉದ್ಧೇಶ ಪೂರ್ವಕವಾಗಿಯೇ ಚಂದ್ರನ ದಕ್ಷಿಣ ಧ್ರುವದ ಕಡೆಗೆ ವಿಕ್ರಂನನ್ನು ಕಳುಹಿಸಿತ್ತು.
ನಾಸಾದ ಸರ್ವೇಯರ್ 7 ಚಂದ್ರನ ದಕ್ಷಿಣದ 40 ಡಿಗ್ರಿ ಲಾಂಜಿಟ್ಯೂಡ್ನಲ್ಲಿ ಇಳಿದಿತ್ತು. ಚೀನಾದ ಪ್ರಯಾಣ ಉತ್ತರ ಧ್ರುವದ ಸನಿಹಕ್ಕೆ ಸಾಗಿದ್ದರೆ, ರಷ್ಯಾ ಹಾಗೂ ನಾಸಾದ ಇನ್ನಿತರ ಚಂದ್ರಾನ್ವೇಷಣೆಯ ಯೋಜನೆಗಳು ದಕ್ಷಿಣ ಧ್ರುವ ಪ್ರದೇಶವನ್ನು ಮುಟ್ಟುವ ಪ್ರಯತ್ನ ಮಾಡೇ ಇಲ್ಲ. ಇಸ್ರೋ ಈ ಸಾಧನೆಗೆ ಹೆಜ್ಜೆ ಇಟ್ಟಿತ್ತು!
ಕೊನೆ ಕ್ಷಣದ ವರೆಗೂ ಎಲ್ಲವೂ ಅಂದುಕೊಂಡಂತೆಯೇ ಸಾಗಿದ್ದ ವಿಕ್ರಂ ಲ್ಯಾಂಡರ್ನ ಪ್ರಯಾಣ, ನಿಗದಿತ ಲ್ಯಾಂಡಿಂಗ್ನ ಭಾಗದಿಂದ ಸುಮಾರು 2.1 ಕಿಮೀ ಎತ್ತರದಲ್ಲಿರುವಾಗ ಇಸ್ರೋದೊಂದಿಗಿನ ಸಂಪರ್ಕ ಕಳೆದುಕೊಂಡಿತು.
Comments are closed.