350 ಕೋಟಿ ಬಜೆಟ್. ನ್ಯಾಷನಲ್ ಸ್ಟಾರ್ ಪ್ರಭಾಸ್. 2 ವರ್ಷಗಳ ಸಾಹಸ. ಹಾಲಿವುಡ್ ರೇಂಜ್ನ ಇಂಡಿಯನ್ ಬಿಗ್ಗೆಸ್ಟ್ ಆ್ಯಕ್ಷನ್ ಥ್ರಿಲ್ಲರ್. ಅಬ್ಬಬ್ಬಾ ಸಾಹೋ, ಸ್ಪೆಷಾಲಿಟಿಗಳನ್ನೆಲ್ಲಾ ನೋಡಿದ್ಮೇಲೆ, ಸಿನಿಮಾ ಇನ್ಯಾವ ರೇಂಜಿಗಿರುತ್ತೋ ಅಂತ ಪ್ರೇಕ್ಷಕರು ಕಾಯ್ತಿದ್ರು. ಫೈನಲಿ ಸಿಲ್ವರ್ ಸ್ಕ್ರೀನ್ ಮೇಲೆ ಸಾಹೋ ಆರ್ಭಟ ಶುರುವಾಗಿದೆ.. ಸಾಹೋ ಕಥೆಯೇನು..? ಡಾರ್ಲಿಂಗ್ ಪ್ರಭಾಸ್ ಪರಾಕ್ರಮ ನೋಡಿದ ಪ್ರೇಕ್ಷಕರು ಏನಂದ್ರು..? ಸಿನಿಮಾ ಪ್ಲಸ್ ಪಾಯಿಂಟ್ಸ್ ಏನು..? ಮೈನಸ್ ಪಾಯಿಂಟ್ಸ್ ಏನು..? ಇಲ್ಲಿದೆ ನೋಡಿ ಡಿಟೈಲ್ಡ್ ರಿಪೋರ್ಟ್.
ಬಾಹುಬಲಿ ಸೂಪರ್ ಸಕ್ಸಸ್ ನಂತ್ರ ಡಾರ್ಲಿಂಗ್ ಪ್ರಭಾಸ್, ಅಭಿನಯದ ಸಿನಿಮಾ ಸಾಹೋ. ಇದೊಂದು ಸಂಗತಿ ಸಾಕಾಗಿತ್ತು, ಸಾಹೋ ಸಿನಿಮಾ ಮೇಲೆ ನಿರೀಕ್ಷೆ ಹುಟ್ಟಿಕೊಳ್ಳೋಕ್ಕೆ. ಇನ್ನು ಸಿನಿಮಾ ರಿಲೀಸ್ ವೇಳೆಗೆ ನಿರೀಕ್ಷೆ ಎವರೆಸ್ಟ್ ಶಿಖರದಷ್ಟು ಎತ್ತರಕ್ಕೆ ಬೆಳೆದು ನಿಂತಿತ್ತು. ಥೇಟ್ ಬಾಹುಬಲಿಯಂತೆ ನಿರೀಕ್ಷೆಯ ಭಾರ ಹೊತ್ತು, ಸಾಹೋ ಥಿಯೇಟರ್ ಅಂಗಳಕ್ಕೆ ಬಂದಿದ್ದಾನೆ. ಸಾಹೋ ಫೀವರ್ಗೆ ತಕ್ಕಂತೆ ಅಡ್ವಾನ್ಸ್ ಟಿಕೆಟ್ ಜೋರಾಗಿತ್ತು. ಹಲವೆಡೆ ಮಧ್ಯರಾತ್ರಿಯಿಂದ್ಲೇ ಸಾಹೋ ಆರ್ಭಟ ಶುರುವಾದ ಕಾರಣ, ಚಿತ್ರಕ್ಕೆ ಫಸ್ಟ್ ಡೇ ಭರ್ಜರಿ ಓಪನಿಂಗ್ ಸಿಕ್ಕಿದೆ.
ಪ್ರಪಂಚದ ಟಾಪ್ ಗ್ಯಾಂಗ್ಸ್ಟರ್ಸ್ ಇರೋ ವಾಜಿ ಸಿಟಿಯಲ್ಲಿ, ಅಂಡರ್ವರ್ಲ್ಡ್ ಉತ್ತರಾಧಿಕಾರಕ್ಕಾಗಿ ರಾಯ್ ಮತ್ತು ಪೃಥ್ವಿರಾಜ್ ನಡುವೆ ಪೈಪೋಟಿ ಶುರುವಾಗುತ್ತೆ. ಮುಂಬೈನಲ್ಲಿ ರಾಯ್, ಅನುಮಾನಾಸ್ಪದವಾಗಿ ರಸ್ತೆ ಅಪಘಾತದಲ್ಲಿ ಸಾಯ್ತಾನೆ. ಅದೇ ಸಮಯದಲ್ಲಿ ಲಕ್ಷ ಕೋಟಿಯನ್ನ ಹೊತ್ತು ಬರೋ ಶಿಪ್ ಸ್ಫೋಟವಾಗುತ್ತೆ.. ಆಗ ರಾಯ್ ವಾರಸ್ದಾರನಾಗಿ ವಿಶ್ವಕ್ ಗ್ಯಾಂಗ್ಸ್ಟರ್ ಸಾಮ್ರಾಜ್ಯಕ್ಕೆ ಎಂಟ್ರಿ ಕೊಡ್ತಾನೆ. ಮತ್ತೊಂದ್ಕಡೆ ಮುಂಬೈನಲ್ಲಿ 2 ಸಾವಿರ ಕೋಟಿ ದರೋಡೆಯಾಗುತ್ತೆ. ಈ ದರೋಡೆ ಪ್ರಕರಣ ಭೇದಿಸೋಕ್ಕೆ ಅಂಡರ್ ಕವರ್ ಕಾಪ್ ಅವತಾರದಲ್ಲಿ ಅಶೋಕ್ ಚಕ್ರವರ್ತಿ, ಪ್ರಭಾಸ್ ಎಂಟ್ರಿಯಾಗುತ್ತೆ.
ಕ್ರೈಂ ಬ್ರಾಂಚ್ ಆಫೀಸರ್ ಅಮೃತಾ ನಾಯರ್, ಅರ್ಥಾತ್ ಶ್ರದ್ಧಾ ಕಪೂರ್ ಜೊತೆ ಅಶೋಕ್ ಚಕ್ರವರ್ತಿ ಇನ್ವೆಸ್ಟಿಗೇಷನ್ ಸ್ಟಾರ್ಟ್ ಆಗುತ್ತೆ. ಜೊತೆ ಜೊತೆಗೆ ಇಬ್ಬರ ಲವ್ ಸ್ಟೋರಿ ಸಾಗುತ್ತೆ. ಅತ್ತ ವಾಜಿ ಸಿಟಿಯಲ್ಲಿ ಮಿಸ್ಟೀರಿಯಸ್ ಬ್ಲ್ಯಾಕ್ ಬಾಕ್ಸ್ಗಾಗಿ ಗ್ಯಾಂಗ್ಸ್ಟರ್ಸ್ ಮಧ್ಯೆ ಕಾದಾಟ ಶುರುವಾಗುತ್ತೆ. ಇತ್ತ ಅಸಲಿ ಅಶೋಕ್ ಚಕ್ರವರ್ತಿ ಯಾರು ಅನ್ನೋದು ಗೊತ್ತಾಗೋ ಹೊತ್ತಿಗೆ ಇಂಟರ್ವಲ್. ಅಷ್ಟಕ್ಕೂ ಬ್ಲ್ಯಾಕ್ ಬಾಕ್ಸ್ ಮಿಸ್ಟರಿ ಏನು..? ಅದನ್ನ ಹೀರೋ ಹೇಗೆ ಭೇದಿಸ್ತಾನೆ..? ಕೊನೆಗೆ ಅಂಡರ್ವರ್ಲ್ಡ್ ಡಾನ್ ಯಾರಾಗ್ತಾರೆ ಅನ್ನೋದೇ ಸಾಹೋ ಕಥೆ.
ಮೈಜುಮ್ ಅನ್ಸೋ ಆ್ಯಕ್ಷನ್, ಹೈ ಪ್ರೊಡಕ್ಷನ್ ವ್ಯಾಲ್ಯೂಸ್, ಸ್ಟನ್ನಿಂಗ್ ವಿಷ್ಯುವಲ್ಸ್, ಖಡಕ್ ವಿಲನ್ಸ್, ಫಾರಿನ್ ಲೊಕೇಶನ್ಸ್. ಯಂಗ್ ರೆಬೆಲ್ ಸ್ಟಾರ್ ಕಿಲ್ಲಿಂಗ್ ಲುಕ್ಸ್. ಸ್ಯಾಂಪಲ್ಗಳಲ್ಲಿ ಇದು ಏಕ್ದಮ್ ಹಾಲಿವುಡ್ ರೇಂಜ್ ಸಿನಿಮಾ ಸಾಹೋ. ಪ್ರಭಾಸ್ ಮೈನವಿರೇಳಿಸೋ ಆ್ಯಕ್ಷನ್, ಸ್ಟ್ರಾಂಗ್ ಸ್ಕ್ರೀನ್ ಪ್ರಸೆನ್ಸ್, ಡೈಲಾಗ್ ಡೆಲಿವರಿ ಎಲ್ಲವೂ ಸಿಂಪ್ಲಿ ಸೂಪರ್. ಒಂದೇ ಮಾತಲ್ಲಿ ಹೇಳ್ಬೇಕು ಅಂದ್ರೆ, ಸಾಹೋ, ಪ್ರಭಾಸ್ ಒನ್ ಮ್ಯಾನ್ ಶೋ. ಆ್ಯಕ್ಷನ್ ಪ್ರಿಯರಿಗಂತೂ ಈ ಆ್ಯಕ್ಷನ್ ಥ್ರಿಲ್ಲರ್ ಹಬ್ಬದೂಟವೇ ಸರಿ.
ಇನ್ನು ಖಳನಟರಾಗಿ ಜಾಕಿ ಶ್ರಾಫ್, ಅರುಣ್ ವಿಜಯ್, ಮಂದಿರಾ ಬೇಡಿ, ಟಿನು ಆನಂದ್, ಚಂಕಿ ಪಾಂಡೆ ಹೀಗೆ ದೊಡ್ಡ ತಾರಾಗಣವೇ ಸಿನಿಮಾದಲ್ಲಿದೆ. ಗ್ಯಾಂಗ್ಸ್ಟರ್ಸ್ ಅವತಾರದಲ್ಲಿ ಇವ್ರ ಲುಕ್ಸ್, ಪ್ರಸೆನ್ಸ್ ಸೊಗಸಾಗಿದೆ. ಶ್ರದ್ಧಾ ಕಪೂರ್ ಬರೀ ಹಾಡುಗಳಲ್ಲಿ ಮಾತ್ರವಲ್ಲ, ಆ್ಯಕ್ಷನ್ ಸೀಕ್ವೆನ್ಸ್ನಲ್ಲೂ ಅಬ್ಬರಿಸಿ, ಫುಲ್ ಮಾರ್ಕ್ಸ್ ಗಿಟ್ಟಿಸಿಕೊಂಡಿದ್ದಾರೆ.
ಅಬ್ಬಬ್ಬಾ ಅನ್ಸೋ ಮೇಕಿಂಗ್ನಿಂದ ಗೆದ್ದಿರೋ ಯುವ ನಿರ್ದೇಶಕ ಸುಜಿತ್, ಪ್ರೇಕ್ಷಕರನ್ನ ರಂಜಿಸುವಲ್ಲಿ ಎಡವಿದ್ದಾರೆ.. ಗ್ಯಾಂಗ್ಸ್ಟರ್ ಸಿನಿಮಾಗಳಿಗೆ ಆ್ಯಕ್ಷನ್, ಟ್ವಿಸ್ಟ್ಗಳು ಇಂಪಾರ್ಟೆಂಟ್. ಆ ವಿಚಾರದಲ್ಲಿ ಗೆದ್ದಿದ್ರು, ಅದನ್ನ ಪ್ರೇಕ್ಷಕರಿಗೆ ಅರ್ಥ ಮಾಡಿಸುವಲ್ಲಿ ಸೋತಿದ್ದಾರೆ. ಆರಂಭದಿಂದ ಕೊನೆವರೆಗೆ ಡಜನ್ಗಟ್ಟಲೇ ಗ್ಯಾಂಗ್ಸ್ಟರ್ಸ್, ಬಂದೂಕು, ಬಾಂಬಿನ ಸದ್ದು, ಛೇಸಿಂಗ್ ಸೀಕ್ವೆನ್ಸ್, ಎಲ್ಲವೂ ಅಬ್ಬಬ್ಬಾ ಅನ್ನಿಸಿದ್ರು, ಎಲ್ಲವನ್ನ ಮೈಂಡ್ ಡೈಜೆಸ್ಟ್ ಮಾಡಿಕೊಳ್ಳೋದು ಕಷ್ಟವಾಗಿಬಿಡುತ್ತೆ. ರೊಟೀನ್ ಕ್ರೈಂ ಫಾರ್ಮುಲಾ ಕಥೆ ತಗೊಂಡಿರೋ ಸುಜಿತ್, ಅದನ್ನ ಪ್ರೆಸೆಂಟ್ ಮಾಡುವಲ್ಲಿ ಮುಗ್ಗರಿಸಿದ್ದಾರೆ. ಇದೇ ಕಾರಣಕ್ಕೆ ಸಿನಿಮಾ ನಿರಾಸೆ ಮೂಡಿಸಿದೆ.
350 ಕೋಟಿ ಬಜೆಟ್ನ ಸಾಹೋ ಚಿತ್ರದ ಪ್ರತಿ ಫ್ರೇಮ್ನಲ್ಲೂ ಅದ್ದೂರಿತನ ಎದ್ದು ಕಾಣ್ತಿದೆ. ಆರ್. ಮಧೀ ಕ್ಯಾಮರಾ ವರ್ಕ್ ಚಿತ್ರದ ಮತ್ತೊಂದು ಪ್ಲಸ್ ಪಾಯಿಂಟ್. ಗಿಬ್ರನ್ ಬ್ಯಾಕ್ಗ್ರೌಂಡ್ ಸ್ಕೋರ್ ಬೊಂಬಾಟಾಗಿದೆ. ಆದ್ರೆ, ಹಾಡುಗಳು ನೋಡೋಕ್ಕೆ ಚೆಂದ ಅನ್ನಿಸಿದ್ರು, ಕೇಳೋಕ್ಕೆ ಮಜಾ ಕೊಡೋದಿಲ್ಲ. ಇದ್ದಿದ್ದರಲ್ಲಿ, ಪ್ರಭಾಸ್, ಜಾಕ್ವೆಲಿನ್ ಸ್ಪೆಷಲ್ ನಂಬರ್, ಹೈಲೆಟ್.
ಸಾಹೋ ಪ್ಲಸ್ ಪಾಯಿಂಟ್ಸ್
⦁ ಆ್ಯಕ್ಷನ್ ಸೀನ್ಸ್
⦁ ಪ್ರಭಾಸ್ ಪರ್ಫಾರ್ಮೆನ್ಸ್
⦁ ಕ್ಯಾಮರಾ ವರ್ಕ್ & ಹಿನ್ನೆಲೆ ಸಂಗೀತ
ಸಾಹೋ ಮೈನಸ್ ಪಾಯಿಂಟ್ಸ್
⦁ ಸ್ಟೋರಿ, ಸ್ಕ್ರೀನ್ ಪ್ಲೇ
⦁ ಸಿನಿಮಾ ಕಾಲಾವಧಿ
⦁ ಎಡಿಟಿಂಗ್
ಸಾಹೋ ಚಿತ್ರವನ್ನ ಕನ್ನಡದ ಕೆಜಿಎಫ್ ಚಿತ್ರಕ್ಕೆ ಹೋಲಿಕೆ ಮಾಡಿ ಮಾತನಾಡ್ತಿದ್ರು. ಆದ್ರೆ, ಕೆಜಿಎಫ್ಗೆ ಕಂಪೇರ್ ಮಾಡಿದ್ರೆ, ಸಾಹೋ ಕೆಟ್ಟ ಪ್ರಯತ್ನ ಅನ್ನಿಸಿಬಿಡುತ್ತೆ. ಕೆಜಿಎಫ್ ಸಿನಿಮಾದಲ್ಲಿದ್ದ ಮ್ಯಾಜಿಕ್, ಮಜಾ ಸಾಹೋದಲ್ಲಿ ಸಿಗೋದಿಲ್ಲ. 80 ಕೋಟಿ ಕೆಜಿಎಫ್ ಮಾಡಿದ ಮ್ಯಾಜಿಕ್ 350 ಕೋಟಿ ಸಾಹೋ ಮಾಡ್ಲೇಯಿಲ್ಲ. ಅದೇ ಕಾರಣಕ್ಕೆ ಚಿತ್ರಕ್ಕೆ ನೀರಸ ಪ್ರತಿಕ್ರಿಯೆ ಸಿಕ್ಕಿದೆ. ಮೇಕಿಂಗ್, ಆ್ಯಕ್ಷನ್ ಬಿಟ್ರೆ, ಮತ್ಯಾವ್ದೆ ವಿಚಾರದಲ್ಲಿ ಸಾಹೋ ಇಷ್ಟವಾಗಲ್ಲ. ಅದೇ ಕಾರಣಕ್ಕೆ ಒಂದು ಒಳ್ಳೆ ಅವಕಾಶವನ್ನ ಚಿತ್ರತಂಡ ಹಾಳು ಮಾಡಿಕೊಂಡುಬಿಡ್ತು ಅನ್ಸುತ್ತೆ.
ಪ್ರಭಾಸ್ ಮೇಲಿನ ಪ್ರೀತಿಯಿಂದ ನಿರ್ಮಾಪಕರು, ಅಗತ್ಯಕ್ಕಿಂತ ಹೆಚ್ಚು ಖರ್ಚು ಮಾಡಿದ್ದಾರೆ. ಸಿನಿಮಾ ನೋಡೋಕ್ಕೆ ಅದ್ಭುತ ಅನ್ನಿಸಿದ್ರು, ಎಲ್ಲೋ ಮಿಸ್ ಹೊಡೆಯೋ ಫೀಲ್ ಬರುತ್ತೆ. ಹಾಗಾಗಿ ಪ್ರೇಕ್ಷಕನಿಗೆ ಸಾಹೋ ಪ್ರಭಾಸ್ ಜೊತೆ ಜರ್ನಿ ಮಜಾ ಕೊಡಲ್ಲ.
ಒಟ್ಟಾರೆ ಅಡ್ವಾನ್ಸ್ ಟಿಕೆಟ್ ಬುಕ್ಕಿಂಗ್ನಿಂದ ಸಾಹೋ ಫಸ್ಟ್ ಡೇ ಕಲೆಕ್ಷನ್ ಜೋರಾಗಿದೆ. ಆದ್ರೆ, ಮಿಕ್ಸ್ಡ್ ರೆಸ್ಪಾನ್ಸ್, ನೆಗೆಟಿವ್ ಮೌತ್ ಪ್ರಮೋಷನ್ನಿಂದ ಸಿನಿಮಾ ಬಾಕ್ಸಾಫೀಸ್ನಲ್ಲಿ ಮುಗ್ಗರಿಸೋ ಸೂಚನೆ ಸಿಕ್ತಿದೆ. ಸಾಹೋ ಬಾಕ್ಸಾಫೀಸ್ ಲೆಕ್ಕಾಚಾರ ಏನಾಗುತ್ತೋ ಕಾದು ನೋಡ್ಬೇಕು.
Comments are closed.