‘ರಕ್ತ ಕಣ್ಣೀರು’ ಎಂದರೆ ಎಲ್ಲರಿಗೂ ಉಪೇಂದ್ರ ಅಭಿನಯದ ಸಿನಿಮಾ ಕಣ್ಮುಂದೆ ಬರುತ್ತದೆ. ನೆತ್ತರ ಕಣ್ಣೀರು ಎಂಬುದು ಒಂದು ಕಲ್ಪನೆ ಎಂದು ಹೆಚ್ಚಿನವರು ಭಾವಿಸಿದ್ದಾರೆ. ಆದರೆ ಇಂಗ್ಲೆಂಡ್ನಲ್ಲಿ ವ್ಯಕ್ತಿಯೊಬ್ಬರು ರಕ್ತ ಕಣ್ಣೀರು ಸುರಿಸಿದ್ದಾರೆ. ಅದು ಸತತ ಒಂದು ಗಂಟೆಗಳ ಕಾಲ. ಅಚ್ಚರಿಯಾದರೂ ಇದು ಸತ್ಯ.
52 ವರ್ಷದ ವ್ಯಕ್ತಿಯೊಬ್ಬರ ಕಣ್ಣಿಂದ ಇದ್ದಕ್ಕಿದಂತೆ ನೆತ್ತರು ಸುರಿಯಲು ಆರಂಭಿಸಿದೆ. ಮೊದಲಿಗೆ ಇದನ್ನು ಗಮನಿಸಿದ ಈ ವ್ಯಕ್ತಿ ಸೀದಾ ಕೋಣೆಗೆ ಹೋಗಿ ಪರೀಕ್ಷಿಸಿದ್ದಾರೆ. ಈ ವೇಳೆ ಕಣ್ಣಿಂದ ರಕ್ತ ಸುರಿಯುತ್ತಿರುವುದು ಗೊತ್ತಾಗಿದೆ. ಆದರೆ ರಕ್ತ ಬರುವಾಗ ಯಾವುದೇ ನೋವು ಆಗುತ್ತಿರಲಿಲ್ಲ. ಕಣ್ಣಿನ ಗುಡ್ಡೆಗಳು ಚಲಿಸುತ್ತಿದ್ದಂತೆ ಕಣ್ಣಲ್ಲಿ ರಕ್ತ ಚಿಮ್ಮುತ್ತಿತ್ತು. ಒಂದು ಗಂಟೆಗಳ ಕಾಲ ಈ ರೀತಿಯ ಸಮಸ್ಯೆ ಕಾಣಿಸಿಕೊಂಡಿದೆ.
ಈ ಬಗ್ಗೆ ವೈದ್ಯರಿಗೆ ತಿಳಿಸಿದಾಗ ವೈದ್ಯರು ಕೂಡ ಒಂದು ಬಾರಿ ದಂಗಾಗಿದ್ದಾರೆ. ನಂತರ ಹೆಚ್ಚಿನ ಪರೀಕ್ಷೆಗೆ ಒಳಪಡಿಸಿದಾಗ ವ್ಯಕ್ತಿಯ ಕಣ್ಣುಗಳಿಗೆ ಅಪರೂಪದ haemolacria ಖಾಯಿಲೆಗೆ ತುತ್ತಾಗಿರುವುದು ಪತ್ತೆಯಾಯಿತು. ಕಣ್ಣಿನ ಸೋಂಕುಗಳು, ಉರಿಯೂತ ಅಥವಾ ಸುತ್ತಲಿನ ರಚನೆಗಳ ಗೆಡ್ಡೆಗಳಿಂದ ಈ ರೀತಿಯಾಗಿ ರಕ್ತಸ್ರಾವವಾಗುತ್ತದೆ. ಇದೇ ಸಮಸ್ಯೆಯಿಂದ ರಕ್ತ ಕಣ್ಣೀರು ಸುರಿಯುತ್ತಿದೆ ಎಂಬುದನ್ನು ವೈದ್ಯರು ಪತ್ತೆ ಹಚ್ಚಿದ್ದಾರೆ ಎಂದು ಇಂಗ್ಲೆಂಡ್ ಜರ್ನಿ ಆಫ್ ಮೆಡಿಸಿನ್ನಲ್ಲಿ ಪ್ರಕಟಿಸಲಾದ ವರದಿಯಲ್ಲಿ ತಿಳಿಸಲಾಗಿದೆ.
ಈ ಖಾಯಿಲೆಗೆ ಸರಿಯಾದ ಚಿಕಿತ್ಸೆ ಪಡೆಯದಿದ್ದರೆ ಕಣ್ಣಿನ ಕ್ಯಾನ್ಸರ್ ಉಂಟಾಗುವ ಸಾಧ್ಯತೆ ಕೂಡ ಇದೆಯಂತೆ. ಸದ್ಯ ರಕ್ತ ಕಣ್ಣೀರಿನ ವ್ಯಕ್ತಿಗೆ ಐ ಡ್ರಾಪ್ಸ್ಗಳನ್ನು ನೀಡಲಾಗಿದ್ದು, ಈ ಔಷಧಗಳಿಂದ ಕಣ್ಣಿನ ಒತ್ತಡ ಕಡಿಮೆಯಾಗುತ್ತದೆ. ಅಲ್ಲದೆ ಒಂದು ವರ್ಷದವರೆಗೆ ಚಿಕಿತ್ಸೆ ಮುಂದುವರೆಸಿದರೆ ಈ ಸಮಸ್ಯೆಯು ಬಗೆಹರಿಸಿಕೊಳ್ಳಬಹುದು ಎಂದು ತನ್ನ ವೈದ್ಯರು ತಿಳಿಸಿದ್ದಾರೆ.
Comments are closed.