ಯುವತಿಗೆ ಅಶ್ಲೀಲ ವಿಡಿಯೊ ತೋರಿಸಿ, ಕಾರು ನಿಲ್ಲಿಸದೇ ದೌರ್ಜನ್ಯ ಎಸಗಿದ ಓಲಾ ಚಾಲಕ

ಬೆಂಗಳೂರು : ಓಲಾ ಕ್ಯಾಬ್‌ನಲ್ಲಿ ಕಚೇರಿಗೆ ಹೋಗುತ್ತಿದ್ದ ಯುವತಿಗೆ ಅಶ್ಲೀಲ ವಿಡಿಯೊ ತೋರಿಸಿ ಮುಜುಗರ ಉಂಟು ಮಾಡಿದ್ದಲ್ಲದೆ, ಹೇಳಿದ ಜಾಗದಲ್ಲಿ ಕಾರು ನಿಲ್ಲಿಸದೇ ದೌರ್ಜನ್ಯ ಎಸಗಿದ ಚಾಲಕನ ವಿರುದ್ಧ ಕಬ್ಬನ್‌ ಪಾರ್ಕ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.

ಸಾರ್ವಜನಿಕ ಸ್ಥಳದಲ್ಲಿ ದೌರ್ಜನ್ಯ, ಲೈಂಗಿಕ ದೌರ್ಜನ್ಯ ಎಸಗಿದ ಆರೋಪದ ಮೇಲೆ ಪ್ರಕರಣ ದಾಖಲಾಗಿದ್ದು ಆರೋಪಿ ಪತ್ತೆಗೆ ಬಲೆ ಬೀಸಿದ್ದಾರೆ. ಘಟನೆ ಆ.23ರಂದು ನಡೆದಿದ್ದು, ಮೊದಲಿಗೆ ಯುವತಿ ಓಲಾ ಸಂಸ್ಥೆಗೆ ದೂರು ನೀಡಿದ್ದರು. ಆದರೆ, ಅವರು ಕ್ರಮ ಕೈಗೊಳ್ಳದ ಹಿನ್ನೆಲೆಯಲ್ಲಿ ಆ.25ರಂದು ಕಬ್ಬನ್‌ ಪಾರ್ಕ್‌ ಠಾಣೆಯಲ್ಲಿ ಪ್ರಕರಣ ದಾಖಲಿಸಲಾಗಿದೆ.

ಯುವತಿ ಆ.23ರ ಬೆಳಗ್ಗೆ 6.28ಕ್ಕೆ ಯಲಹಂಕ ನ್ಯೂ ಟೌನ್‌ನಿಂದ ಜೆ.ಪಿ.ನಗರದಲ್ಲಿರುವ ತನ್ನ ಕಚೇರಿಗೆ ಹೋಗಲು ಒಲಾ ಬುಕ್‌ ಮಾಡಿದ್ದರು. ಕೆಲ ಹೊತ್ತಿನಲ್ಲಿ ಕ್ಯಾಬ್‌ ಬಂದಿತ್ತು. ಕ್ಯಾಬ್‌ ವಿಧಾನಸೌಧ ಸಿಗ್ನಲ್‌ ದಾಟಿದ ಬಳಿಕ ಚಾಲಕ ರಿಯರ್‌ ಮಿರರ್‌ ಅನ್ನು ಯುವತಿ ಮುಖ ಕಾಣುವಂತೆ ಹೊಂದಿಕೆ ಮಾಡಿ, ಪದೇಪದೇ ನೋಡಿ ಮುಜುಗರ ತಂದಿದ್ದ. ಸ್ವಲ್ಪ ಮುಂದಕ್ಕೆ ಹೋದ ಬಳಿಕ ಮೊಬೈಲ್‌ನಲ್ಲಿ ಅಶ್ಲೀಲ ವಿಡಿಯೊ ಪ್ಲೇ ಮಾಡಿ ಎಡ ಕೈಯಲ್ಲಿ ಹಿಡಿದು ಮಹಿಳೆಗೆ ಕಾಣುವಂತೆ ಹಿಡಿದಿದ್ದಾನೆ. ಆತನೆ ವರ್ತನೆ ಮುಂದುವರಿದಾಗ ಕಾರು ನಿಲ್ಲಿಸುವಂತೆ ಯುವತಿ ಸೂಚಿಸಿದ್ದಾಳೆ. ಆದರೆ, ಚಾಲಕ ‘ನೀವು ಬುಕ್‌ ಮಾಡಿರುವ ಸ್ಥಳ ಇನ್ನೂ ದೂರ ಇದೆ. ಅಲ್ಲೇ ಡ್ರಾಪ್‌ ಮಾಡುತ್ತೇನೆ,” ಎಂದು ಹೇಳಿ ಹೇಳಿದ್ದ. ಕಚೇರಿ ಹತ್ತಿರ ಬರುತ್ತಿದ್ದಂತೆ ‘ತನ್ನ ಕಚೇರಿ’ ಎಂದು ಬೇರೆ ಕಟ್ಟಡವನ್ನು ತೋರಿಸಿದ ಯುವತಿ, ಕಾರಿನಿಂದ ಇಳಿದು ಪಾರಾಗಿದ್ದಳು ಎನ್ನಲಾಗಿದೆ.

ಘಟನೆ ಬಗ್ಗೆ ಯುವತಿ ಜತೆ ಮಾತನಾಡಿದ್ದು ”ನಾನು ಹೆಚ್ಚಾಗಿ ಓಲಾ ಕ್ಯಾಬ್‌ನಲ್ಲೇ ಕಚೇರಿಗೆ ಹೋಗುತ್ತೇನೆ. ಆದರೆ, ಅಂದು ಚಾಲಕ ತೋರಿದ ವರ್ತನೆಯಿಂದ ಭೀತಿಗೆ ಒಳಗಾದೆ. ಕಿರುಚಿಕೊಂಡು ಪಾರಾಗೋಣ ಎಂದರೆ ಅವತ್ತು ರಸ್ತೆಗಳು ಬಹುತೇಕ ನಿರ್ಜನವಾಗಿತ್ತು. ಬನ್ನೇರುಘಟ್ಟ ರಸ್ತೆ ಬರುತ್ತಿದ್ದಂತೆ ಕಾರು ನಿಲ್ಲಿಸಲು ಹೇಳಿದರೂ ನಿಲ್ಲಿಸದೇ ಹಿಂಸೆ ಕೊಟ್ಟ,” ಎಂದು ಹೇಳಿದ್ದಾರೆ.

ಪೊಲೀಸ್‌ ಅಧಿಕಾರಿಯೊಬ್ಬರು ಮಾಹಿತಿ ನೀಡಿ ”ಯುವತಿ ನೀಡಿದ ದೂರಿನ ಮೇರೆಗೆ ಕೇಸು ದಾಖಲಿಸಿ ತನಿಖೆ ತೀವ್ರಗೊಳಿಸಲಾಗಿದೆ. ಆರೋಪಿಯನ್ನು ಬಂಧಿಸುವವರೆಗೆ ಹೆಚ್ಚಿನ ವಿವರಣೆ ನೀಡಲು ಸಾಧ್ಯವಿಲ್ಲ. ಅದು ಆತನಿಗೆ ತಪ್ಪಿಸಿಕೊಳ್ಳಲು ನೆರವಾಗಬಹುದು,” ಎಂದರು.

ಆ್ಯಪ್‌ನಲ್ಲಿ ಇದ್ದ ಮುಖವೇ ಬೇರೆ
”ಬುಕ್‌ ಮಾಡಿದಾಗ ಕೆಎ-53, ಸಿ-9192 ನಂಬರಿನ ಕ್ಯಾಬ್‌ ಎಂದು ಆ್ಯಪ್‌ನಲ್ಲಿ ತೋರಿಸಿತ್ತು. ಚಾಲಕನ ಹೆಸರು ದೇವಸಮೋಲಿಯಾ ಎಂದು ತೋರಿಸಿತ್ತು. ಆದರೆ, ಕಾರಿನಲ್ಲಿ ಬಂದವ ಬೇರೆಯಾಗಿದ್ದ. ನಾನು ಆತನ ಬಳಿ ಎಲ್ಲಿಯವನು ಎಂದು ವಿಚಾರಿಸಿದಾಗ ‘ಮಧ್ಯಪ್ರದೇಶ’ ಎಂದಿದ್ದ. ಇದನ್ನು ಪೊಲೀಸರಿಗೆ ತಿಳಿಸಿದ್ದೇನೆ,” ಎಂದು ಯುವತಿ ಹೇಳಿದ್ದಾಳೆ.

ಚಾಳಿಗೆ ಬಿದ್ದ ಆರೋಪಿಯಾ?
ಅಪರಾಧ ವಿಭಾಗದ ಪೊಲೀಸರು ಈ ಬಗ್ಗೆ ಮಾತನಾಡಿ”ಚಾಳಿ ಬಿದ್ದ ಆರೋಪಿಗಳು ಯಾರದ್ದೋ ಹೆಸರಿನಲ್ಲಿ ಲೈಸೆನ್ಸ್‌ ಮಾಡಿಸಿ ದುಷ್ಕೃತ್ಯ ಎಸಗುತ್ತಾರೆ. ಅಥವಾ ನೋಂದಣಿಯಾದ ಚಾಲಕನಿಗೆ ಆರೋಗ್ಯ ಸರಿ ಇಲ್ಲದಾಗ ಸ್ನೇಹಿತನನ್ನು ಬದಲಿಗೆ ಕಳುಹಿಸುತ್ತಾರೆ. ಆದರೆ, ಆರೋಪಿಗಳು ಪೊಲೀಸರಿಂದ ತಪ್ಪಿಸಿಕೊಳ್ಳಲು ಸಾಧ್ಯವೇ,” ಇಲ್ಲ ಎಂದಿದ್ದಾರೆ.