ಗೌರಿ ಲಂಕೇಶ್ ಹತ್ಯೆ ಪ್ರಕರಣದಲ್ಲಿ ಗುಂಡಿಕ್ಕಿದಾತನ ಬಂಧನ !

ಬೆಂಗಳೂರು: ರಾಜ್ಯವಷ್ಟೇ ಅಲ್ಲ ಸಂಪೂರ್ಣ ದೇಶಾದ್ಯಂತ ಆತಂಕ ಸೃಷ್ಟಿಸಿದ್ದ ಪತ್ರಕರ್ತೆ, ವಿಚಾರವಾದಿ ಗೌರಿ ಲಂಕೇಶ್ ಹತ್ಯೆಯ ಶಂಕಿತ ಹಂತಕನನ್ನು ಎಸ್ಐಟಿ ಪೊಲೀಸರು ಮಹಾರಾಷ್ಟ್ರದಲ್ಲಿ ಬಂಧಿಸಿದ್ದಾರೆ.

ಬಂಧಿತ ವ್ಯಕ್ತಿ ಮರಾಠಿ ಭಾಷಿಗನಾಗಿದ್ದು ಗೌರಿಗೆ ಗುಂಡಿಕ್ಕಿದವನ ಚಹರೆ ಈತನಿಗೆ ಹೋಲುತ್ತದೆ ಎಂದಿರುವ ಪೊಲೀಸರು ಬಂಧನವಾದ ಸ್ಥಳವನ್ನು ಬಹಿರಂಗ ಪಡಿಸಲು ನಿರಾಕರಿಸಿದ್ದಾರೆ.

ಶಂಕಿತ ಕೊಲೆಗಾರನನ್ನು ವಶಕ್ಕೆ ಪಡೆದಿದ್ದೇವೆ. ವಯಸ್ಸು 30 ದಾಟಿರಬಹುದಾದ ಆತನ ಎತ್ತರ 5’1”.ಆತನ ಬಳಿ ಯಾವುದೇ ಪಿಸ್ತೂಲ್ ಅಥವಾ ಯಾವುದೇ ಬಂದೂಕು ಕಂಡುಬಂದಿಲ್ಲ. ಯಾವುದೇ ಹೇಳಿಕೆ ನೀಡುವ ಮೊದಲು ಆತನನ್ನು ವಿಚಾರಣೆಗೊಳಪಡಿಸಬೇಕಾಗಿದೆ, ಎಂದು ಎಸ್ಐಟಿ ಅಧಿಕಾರಿಗಳು ತಿಳಿಸಿದ್ದಾರೆ.

ಹತ್ಯೆಯಾದ ಸ್ಥಳದಲ್ಲಿದ್ದ ಸಿಸಿ ಕ್ಯಾಮರಾ ದೃಶ್ಯಾವಳಿಗಳ ಅಧ್ಯಯನ ಮಾಡಿದ್ದ ವಿಧಿವಿಜ್ಞಾನ ಪ್ರಯೋಗಾಲಯದ ವರದಿಯ ಪ್ರಕಾರ ಬೈಕ್‌ನಲ್ಲಿ ಬಂದಿದ್ದ ಸುಮಾರು 5’2” ಅಥವಾ 5’1” ಎತ್ತರದ, ಸುಮಾರು 70 ರಿಂದ 80 ಕೆಜಿ ತೂಕದ ವ್ಯಕ್ತಿ ಗೌರಿಗೆ ಗುಂಡಿಕ್ಕಿದ್ದ. ಸಿಸಿ ಟಿವಿ ಫೂಟೇಜ್ ಮತ್ತು ವಿಚಾರಣೆ ಸಂದರ್ಭದಲ್ಲಿ ಸಂಗ್ರಹಿಸಿದ ಮಾಹಿತಿಯ ಆಧಾರದ ಮೇಲೆ ಎಸ್ಐಟಿ ಅಧಿಕಾರಿಗಳು ನಾಲ್ವರು ಶಂಕಿತರ ರೇಖಾಚಿತ್ರಗಳನ್ನು ಸಿದ್ಧಪಡಿಸಿದ್ದರು. ಗೌರಿ ಹಂತಕರಿಗೆ ಮಾರಕಾಸ್ತ್ರ ಪೂರೈಸಿದ ಆರೋಪದ ಮೇಲೆ ಬಂಧಿತನಾಗಿರುವ ಕೆ.ಟಿ. ನವೀನ್ ಕುಮಾರ್ ಸ್ನೇಹಿತ ಶ್ರೀರಂಗಪಟ್ಟಣದ ಅನಿಲ್ ಕುಮಾರ್ ನೀಡಿರುವ ಮಾಹಿತಿ ಸಹ ಈ ರೇಖಾಚಿತ್ರ ಸಿದ್ಧಪಡಿಸಲು ನೆರವಾಗಿದೆ.