ಹೊಸದಿಲ್ಲಿ: ಅತ್ಯಾಧುನಿಕ ‘ಎಸ್-400 ಟ್ರಯಂಫ್ ವಾಯುರಕ್ಷಣಾ ಕ್ಷಿಪಣಿ ವ್ಯವಸ್ಥೆ’ಯ ಖರೀದಿಗಾಗಿ ಭಾರತ-ರಷ್ಯಾ 39,000 ಕೋಟಿ ರೂ.ಗಳ ಒಪ್ಪಂದಕ್ಕೆ ಅಂತಿಮ ಮಾತುಕತೆ ಆರಂಭಿಸಿವೆ. ಈ ಕ್ಷಿಪಣಿ ರಕ್ಷಣಾ ವ್ಯವಸ್ಥೆಯು ಶತ್ರುಗಳ ಕ್ಷಿಪಣಿಗಳು, ಬಾಂಬರ್ಗಳು, ಗುಪ್ತ ಹೋರಾಟಗಾರರು, ಬೇಹು ವಿಮಾನಗಳು ಮತ್ತು ಡ್ರೋನ್ಗಳನ್ನು 400 ಕಿ.ಮೀ ದೂರ ಹಗೂ 30 ಕಿ.ಮೀ ಎತ್ತರದಲ್ಲೇ ಗುರುತಿಸಿ ನಾಶಪಡಿಸುತ್ತದೆ.
2018-19ರ ವಿತ್ತವರ್ಷದಲ್ಲಿ ನಡೆಯಬೇಕಿರುವ ಈ ಒಪ್ಪಂದದ ಅಂತಿಮ ರೂಪುರೇಷೆಗಳನ್ನು ಸಿದ್ಧಪಡಿಸಲು ಭಾರತ ಬಯಸಿದೆ. ಮೊದಲ ಹಂತದಲ್ಲಿ ನೆಲದಿಂದ ಬಾನಿಗೆ ಚಿಮ್ಮಬಲ್ಲ (ಸರ್ಫೇಸ್ ಟು ಏರ್ ಮಿಸೈಲ್- ಎಸ್ಎಎಂ) ಕ್ಷಿಪಣಿ ಎಸ್-400 ಕ್ಷಿಪಣಿಗಳ ಖರೀದಿಗೆ ಭಾರತ ಉತ್ಸುಕವಾಗಿದೆ.
ಎಲ್ಲ ಭೌಗೋಳಿಕ ಪ್ರದೇಶಗಳಲ್ಲೂ ಸಂಚರಿಸಬಲ್ಲ ಕ್ಷಿಪಣಿ ವಾಹಕ-ಉಡಾವಣಾ ವಾಹನಗಳು, ಅತ್ಯಾಧುನಿಕ ರಾಡಾರ್ಗಳು ಈ ಕ್ಷಿಪಣಿ ವ್ಯವಸ್ಥೆಯಲ್ಲಿ ಸೇರಿವೆ. ಒಪ್ಪಂದಕ್ಕೆ ಸಹಿ ಹಾಕಿದ ಎರಡು ವರ್ಷದೊಳಗಾಗಿ ಎಲ್ಲ ಕ್ಷಿಪಣಿಗಳನ್ನು ರಷ್ಯಾ ಪೂರೈಸಬೇಕಿದೆ. ಇಂತಹ ಒಟ್ಟು 5 ಕ್ಷಿಪಣಿಗಳನ್ನು ಭಾರತ ಖರೀದಿಸಲಿದೆ.
‘ಎಲ್ಲ 5 ಎಸ್-400 ಕ್ಷಿಪಣಿಗಳು ಮಧ್ಯಮ ವ್ಯಾಪ್ತಿಯ ಬ್ಯಾಲಿಸ್ಟಿಕ್ ಕ್ಷಿಪಣಿಗಳನ್ನು, ಕ್ರೂಯಿಸ್ ಕ್ಷಿಪಣಿಗಳನ್ನು ನಾಶಪಡಿಸಬಲ್ಲವು. 54 ತಿಂಗಳುಗಳೊಳಗೆ ಎಲ್ಲ ಕ್ಷಿಪಣಿಗಳು ಪೂರೈಕೆಯಾಗಲಿವೆ. ಇವುಗಳು ನಮ್ಮ ಬತ್ತಳಿಕೆ ಸೇರಿದ ಬಳಿಕ ದೇಶದ ವಾಯುರಕ್ಷಣಾ ಸಾಮರ್ಥ್ಯ ದುಪ್ಪಟ್ಟಾಗಲಿದೆ’ ಎಂದು ರಕ್ಷಣಾ ಸಚಿವಾಲಯದ ಮೂಲವೊಂದು ತಿಳಿಸಿದೆ.
Comments are closed.