ಸಿನಿಮಾ ಸಾಹಸ ಸನ್ನಿವೇಶಗಳಲ್ಲಿ ಇತ್ತೀಚೆಗೆ ಭಾರಿ ವಾಹನಗಳನ್ನು ಒಂದೇ ಕೈಯಲ್ಲಿ ಮೇಲಕ್ಕೆತ್ತುವ, ಗಾಳಿಯಲ್ಲಿ ಹಾರಿಸುವ, ಅಲ್ಲೇ ಗಿರಿಕಿ ಹೊಡೆಯುವಂತೆ ಚಿತ್ರೀಕರಿಸುವುದನ್ನು ನೋಡುತ್ತಿದ್ದೇವೆ. ಅದರಲ್ಲೂ ಮುಖ್ಯವಾಗಿ ಮಹಿಂದ್ರಾ ಕಂಪೆನಿಯ ವಾಹನಗಳೇ ಇದಕ್ಕೆ ಹೆಚ್ಚಾಗಿ ಬಳೆಕೆಯಾಗುತ್ತಿವೆ. ಈ ಬಗ್ಗೆ ಸ್ವತಃ ಮಹಿಂದ್ರಾ ಗ್ರೂಪ್ನ ಮುಖ್ಯಸ್ಥ ಆನಂದ್ ಮಹಿಂದ್ರಾ ಪ್ರತಿಕ್ರಿಯಿಸಿದ್ದಾರೆ.
ಸಿನಿಮಾ ಹೀರೋಗಳು ಭಾರಿ ವಾಹನಗಳನ್ನು ಕಾಲ್ಜೆಂಡಿನಂತೆ ಒದೆಯುವ ಮತ್ತು ವಾಹನಗಳನ್ನು ಎತ್ತಿ ಬಿಸಾಕುವಂತಹ ಸನ್ನಿವೇಶಗಳಲ್ಲಿ ಅಟ್ಟಹಾಸ ಮೆರೆಯುತ್ತಿರುವುದನ್ನು ಕಾಣುತ್ತಿದ್ದೇವೆ. ಈ ರೀತಿಯ ಸಾಹಸ ಸನ್ನಿವೇಶಗಳು ಟಾಲಿವುಡ್, ಬಾಲಿವುಡ್, ಕಾಲಿವುಡ್ ಸಿನಿಮಾಗಳಲ್ಲಿ ಸ್ವಲ್ಪ ಹೆಚ್ಚೇ ಎಂದು ಹೇಳಬೇಕು.
ಇತ್ತೀಚೆಗೆ ತೆರೆಕಂಡ ನಂದಮೂರಿ ಬಾಲಕೃಷ್ಣ ಅಭಿನಯದ ‘ಜೈಸಿಂಹ’ ಎಂಬ ಸಿನಿಮಾದಲ್ಲಿ ಬೊಲೆರೋ ವಾಹವನ್ನು ಒಂದೇ ಕೈಯಲ್ಲಿ ಎತ್ತಿ ಹಿಡಿಯುವ ಸನ್ನಿವೇಶ ಸಾಕಷ್ಟು ಚರ್ಚೆಗೆ ಗ್ರಾಸವಾಗಿದೆ. ಅತಿರೇಕ ಎನ್ನುವಂತಹ ಈ ರೀತಿಯ ಸನ್ನಿವೇಶಗಳ ಬಗ್ಗೆ ಸ್ವತಃ ಮಹಿಂದ್ರಾ ಗ್ರೂಪ್ ಮುಖ್ಯಸ್ಥ ಆನಂದ್ ಮಹಿಂದ್ರಾ ಹಾಸ್ಯಚಟಾಕಿ ಸಿಡಿಸಿದ್ದಾರೆ.
‘ಇನ್ನು ಮುಂದೆ ಬೊಲೆರೋ ವಾಹನಗಳನ್ನು ಚೆಕ್ ಮಾಡಲು ಸರ್ವೀಸ್ ವರ್ಕ್ಶಾಪ್ಗಳಲ್ಲಿ ಹೈಡ್ರಾಲಿಕ್ ಲಿಫ್ಟ್ಗಳನ್ನು ಉಪಯೋಗಿಸಬೇಕಾದ ಅಗತ್ಯವಿಲ್ಲ’ ಎಂದು ಅವರು ಟ್ವೀಟ್ ಮಾಡಿದ್ದಾರೆ. ಬಾಲಯ್ಯನ ವೀಡಿಯೋ ಒಂದನ್ನು ಆನಂದ್ ಮಹಿಂದ್ರಾ ಅವರಿಗೆ ಟ್ಯಾಗ್ ಮಾಡಿದ ಟ್ವಿಟ್ಟರಿಗರೊಬ್ಬರು, ‘ಸಾರ್ ಇದನ್ನೊಮ್ಮೆ ನೋಡಿ’ ಎಂದು ಅವರ ಗಮನಸೆಳೆದಿದ್ದರು. ಅದಕ್ಕೆ ಅವರು ಮೇಲಿನಂತೆ ಟ್ವೀಟ್ ಮಾಡಿದ್ದಾರೆ.
Comments are closed.