ಬೈರುತ್: ‘ಜಿಹಾದಿ ಜಾನ್’ ಎಂದೇ ಪ್ರಸಿದ್ಧನಾಗಿದ್ದ ಐಸಿಸ್ ಸಂಘಟನೆಯ ಪ್ರಮುಖ ಉಗ್ರ ಮೊಹಮ್ಮದ್ ಎಮ್ವಜಿ ಡ್ರೋಣ್ ದಾಳಿಯಲ್ಲಿ ಮೃತಪಟ್ಟಿದ್ದಾನೆ ಎಂದು ಐಸಿಸ್ ಸಂಘಟನೆ ಖಚಿತಪಡಿಸಿದೆ.
ಕಳೆದ ವರ್ಷ ನವೆಂಬರ್ನಲ್ಲಿ ಸಿರಿಯಾದ ಐಸಿಸ್ ಉಗ್ರರ ಪ್ರಾಬಲ್ಯದ ರಖಾದಲ್ಲಿ ಜಿಹಾದಿ ಜಾನ್ ತೆರಳುತ್ತಿದ್ದ ಕಾರ್ ಮೇಲೆ ಅಮೆರಿಕ ಸೈನಿಕರು ಡ್ರೋಣ್ ದಾಳಿ ನಡೆಸಿದ್ದರು. ದಾಳಿಯಲ್ಲಿ ‘ಜಿಹಾದಿ ಜಾನ್’ ಮೃತಪಟಿದ್ದಾನೆ ಎಂದು ವರದಿಯಾಗಿತ್ತು. ಆದರೆ ಇದುವರೆಗೂ ಐಸಿಸ್ ಉಗ್ರರು ಈ ವಿಷಯವನ್ನು ಸ್ಪಷ್ಟಪಡಿಸಿರಲಿಲ್ಲ.
ಜಿಹಾದಿ ಜಾನ್ ಐಸಿಸ್ ಉಗ್ರರು ಬಿಡುಗಡೆ ಮಾಡುತ್ತಿದ್ದ ಬಹುತೇಕ ವಿಡಿಯೋಗಳಲ್ಲಿ ಕಾಣಿಸಿಕೊಂಡಿದ್ದ. ಈತ ಒತ್ತೆಯಾಳುಗಳ ಶಿರಚ್ಛೇದನ ಮಾಡುತ್ತಿದ್ದ ದೃಶ್ಯಾವಳಿಗಳಿಂದಾಗಿಯೇ ವಿಶ್ವದಾದ್ಯಂತ ಕುಖ್ಯಾತನಾಗಿದ್ದ.
