ಮೂಡಬಿದ್ರೆ,ಜ.08 : ವಿದ್ಯಾಗಿರಿಯ ಆಳ್ವಾಸ್ ಕ್ಯಾಂಪಸ್ನ ಪ್ಯಾಲೇಸ್ ಗ್ರೌಂಡ್ನಲ್ಲಿ ನಡೆಯಲಿರುವ 21ನೇ ಆಳ್ವಾಸ್ ವಿರಾಸತ್ ರಾಷ್ಟ್ರೀಯ ಸಾಂಸ್ಕೃತಿಕೋತ್ಸವಕ್ಕೆ ಸಕಲ ಸಿದ್ಧತೆಗಳು ಅಂತಿಮಗೊಂಡಿದ್ದು ವೇದಿಕೆ ಸಜ್ಜುಗೊಂಡಿದೆ.
ಜ. 8 ರಿಂದ ಜ. 11ರ ವರೆಗೆ ನಾಲ್ಕು ದಿನಗಳ ಕಾಲ ನಡೆಯುವ ಈ ಸಾಂಸ್ಕೃತಿಕೋತ್ಸವದಲ್ಲಿ 8 ಕಲಾತಂಡಗಳ ಸುಮಾರು 400ಕ್ಕೂ ಅಧಿಕ ಶ್ರೇಷ್ಠ ಕಲಾವಿದರು ಶಾಸ್ತ್ರೀಯ ಸಂಗೀತ, ನತ್ಯ, ಜಾನಪದ ಸಂಗೀತ ನೃತ್ಯದ ವೈಭವ ಅನಾವರಣಗೊಳಿಸಲಿದ್ದಾರೆ. ಸುಮಾರು 20 ಸಾವಿರಕ್ಕೂ ಅಧಿಕ ಆಸನ ವ್ಯವಸ್ಥೆಯನ್ನು ಕಲ್ಪಿಸಲಾಗಿದ್ದು ಸಾವಿರಾರು ವಾಹನಗಳ ಪಾರ್ಕಿಂಗ್ಗೆ ಸ್ಥಳಾವಕಾಶ ಕಲ್ಪಿಸಲಾಗಿದೆ. ಜಿಲ್ಲೆ ಹಾಗೂ ಹೊರ ಜಿಲ್ಲೆಗಳಿಂದ ಪ್ರತೀ ದಿನ ಸುಮಾರು 10 ಸಾವಿರಕ್ಕೂ ಅಧಿಕ ಮಂದಿ ಭಾಗವಹಿಸುವ ನಿರೀಕ್ಷೆಯಿದೆ. ಆವರಣದಲ್ಲಿ ಸುಮಾರು ನೂರಕ್ಕೂ ಅಧಿಕ ಪೂಕರೆ ಮಾದರಿಯ ವಿದ್ಯುತ್ ದೀಪಾಲಂಕಾರದ ಕಂಬಗಳನ್ನು ಅಳವಡಿಸಲಾಗಿದ್ದು ಪ್ರೇಕ್ಷಕರ ಮನಸ್ಸಿಗೆ ಮುದ ನೀಡಲಿದೆ. ವೇದಿಕೆಯ ಇಕ್ಕೆಲಗಳಲ್ಲಿ ನೀರ ಝರಿಗಳು ಹರಿಯಲಿದ್ದು ಮನಸ್ಸಿಗೆ ಮುದ ನೀಡಲಿದೆ. ಸಭಾಂಗಣದ ಸನಿಹದಲ್ಲೇ ವಿವಿಧ ತಿಂಡಿ ತಿನಿಸುಗಳ ಫುಡ್ಕೋರ್ಟ್ ನಿರ್ಮಿಸಲಾಗಿದೆ. ಮೊದಲ ದಿನವಾದ ಶುಕ್ರವಾರ ಕಾರ್ಯಕ್ರಮ ಪ್ರಾರಂಭಕ್ಕೂ ಮುನ್ನ 15 ಕಲಾ ತಂಡಗಳ ಸುಮಾರು 200 ಕ್ಕೂ ಅಧಿಕ ಕಲಾವಿದರನ್ನೊಳಗೊಂಡ ಆಕರ್ಷಕ ಮೆರವಣಿಗೆ ನಡೆಯಲಿದೆ. ಕೊಂಬು, ಕಹಳೆ, ದೇವರ ವೇಷಗಳು ಡೊಳ್ಳು ಕುಣಿತ, ಕೊರಗರ ಡೋಲು, ಆಟಿ ಕಳೆಂಜ, ತ್ಯೆಯಂ, ಪಂಜಾಬ್ನ ಬ್ಯಾಂಡ್ ವಾದನ, ಹೊನ್ನಾವರದ ಬ್ಯಾಂಡ್, ಯಕ್ಷಗಾನದ ವೇಷಗಳು, ಶೃಂಗಾರಿ ಮೇಳಗಳು ಮೆರವಣಿಗೆಗೆ ಮೆರುಗು ನೀಡಲಿದೆ.
ಸಿಸಿಟಿವಿ ಕಣ್ಗಾವಲು: ಆಳ್ವಾಸ್ ವಿರಾಸತ್ನ ಸಭಾಂಗಣದಲ್ಲಿ ಇದೇ ಮೊದಲ ಬಾರಿಗೆ ಸಿಸಿಟಿವಿಯ ಕಣ್ಗಾವಲು ಅಳವಡಿಸಲಾಗಿದೆ. ವಿದ್ಯಾಗಿರಿಯ ಆವರಣದಲ್ಲಿ ಈಗಾಗಲೇ ಸುಮಾರು ನೂರಕ್ಕೂ ಅಧಿಕ ಸಿಸಿ ಟಿವಿಗಳಿದ್ದು ವಿರಾಸತ್ಗೆ ಭದ್ರತೆಯನ್ನು ಹೆಚ್ಚಿಸುವ ನಿಟ್ಟಿನಲ್ಲಿ ಸಿಸಿಟಿವಿಗಳನ್ನು ಅಳವಡಿಸಲಾಗಿದೆ. ಅಲ್ಲದೆ ಕಾಲೇಜಿನ ಎನ್ಸಿಸಿ, ಎನ್ಎಸ್ಎಸ್ ತಂಡಗಳನ್ನು ಭದ್ರತೆಗೆ ನಿಯೋಜಿಸಲಾಗಿದೆ.
