ವಿಶ್ವದ ಅತ್ಯಂತ ಶ್ರೀಮಂತ ಕ್ರಿಕೆಟ್ ಲೀಗ್ ಎಂಬ ಖ್ಯಾತಿಗೆ ಇಂಡಿಯನ್ ಪ್ರೀಮಿಯರ್ ಲೀಗ್ ಭಾಜನವಾಗಿದ್ದು, ಈ ಲೀಗ್’ನಲ್ಲಿ ದೇಶಿಯ ಹಾಗು ವಿದೇಶಿ ಆಟಗಾರರು ಕೋಟಿಗಟ್ಟಲೆ ಹಣ ಗಳಿಸುತ್ತಾರೆ. ಐಪಿಎಲ್ನ 13 ಸೀಸನ್ ಮೂಲಕ ಮೂವರು ಕ್ರಿಕೆಟಿಗರು 100 ಕೋಟಿಗೂ ಅಧಿಕ ಸಂಪಾದಿಸಿದ್ದಾರೆ. ಈ ಮೂವರೊಂದಿಗೆ ಈಗ ಮತ್ತೋರ್ವ ದೇಶಿಯ ಕ್ರಿಕೆಟಿಗ ಸೇರಿಕೊಂಡಿದ್ದಾನೆ.
ಈ ಮೂವರು ಕ್ರಿಕೆಟಿಗರು ಭಾರತೀಯ ಆಟಗಾರರು ಎಂಬುದು ವಿಶೇಷ. ಇದೀಗ ಈ ಪಟ್ಟಿಗೆ ಮತ್ತೋರ್ವ ಆಟಗಾರ ಕೂಡ ಸೇರ್ಪಡೆಯಾಗಲಿದ್ದಾರೆ. ಅವರು ಮತ್ಯಾರೂ ಅಲ್ಲ ಸುರೇಶ್ ರೈನಾ.
ಈ ಬಾರಿ ಚೆನ್ನೈ ಸೂಪರ್ ಕಿಂಗ್ಸ್ ಪರ ಕಣಕ್ಕಿಳಿಯುವ ಮೂಲಕ ಸುರೇಶ್ ರೈನಾ ಕೂಡ 100 ಕೋಟಿಗೆ ಸಂಭಾವನೆ ಪಡೆದ ಪಟ್ಟಿಗೆ ಎಂಟ್ರಿ ಕೊಡಲಿದ್ದಾರೆ. ಹಾಗಿದ್ರೆ ಐಪಿಎಲ್ನಲ್ಲಿ ಸಂಭಾವನೆ ವಿಷಯದಲ್ಲಿ ಯಾರು ನಂಬರ್ 1 ಎಂದು ನೋಡೋಣ.
ಸುರೇಶ್ ರೈನಾ: ಕಳೆದ ಐಪಿಎಲ್ ಸೀಸನ್ನಿಂದ ಹೊರಗುಳಿದಿದ್ದ ಸುರೇಶ್ ರೈನಾ ಅವರನ್ನು ಸಿಎಸ್ಕೆ ಈ ಬಾರಿ ಕೂಡ ತಂಡದಲ್ಲೇ ಉಳಿಸಿಕೊಂಡಿದ್ದಾರೆ. ಪ್ರಸ್ತುತ ರೈನಾ ಅವರ ಸಂಭಾವನೆ 11 ಕೋಟಿ ರೂ. ಮುಂದಿನ ಸೀಸನ್ನಲ್ಲೂ ಇದೇ ಮೊತ್ತ ಪಡೆಯುವುದರೊಂದಿಗೆ 13 ಆವೃತ್ತಿಗಳಲ್ಲಿ ರೈನಾ 110 ಕೋಟಿ ರೂ. ಸಂಭಾವನೆ ಪಡೆದ ಆಟಗಾರ ಎನಿಸಿಕೊಳ್ಳಲಿದ್ದಾರೆ. ಅಲ್ಲದೆ 100 ಕೋಟಿ ಸಂಭಾವನೆ ಪಡೆದ ನಾಲ್ಕನೇ ಆಟಗಾರ ಎಂಬ ಹೆಗ್ಗಳಿಕೆಗೆ ಪಾತ್ರರಾಗಲಿದ್ದಾರೆ.
ವಿರಾಟ್ ಕೊಹ್ಲಿ: ರಾಯಲ್ ಚಾಲೆಂಜರ್ಸ್ ಬೆಂಗಳೂರು ತಂಡದ ನಾಯಕ ವಿರಾಟ್ ಕೊಹ್ಲಿ ಅವರ ಪ್ರಸ್ತುತ ಸಂಭಾವನೆ 17 ಕೋಟಿ ರೂ. ಕಳೆದ 13 ಸೀಸನ್ಗಳಿಂದ ಆರ್ಸಿಬಿ ಪರ ಕಣಕ್ಕಿಳಿದ ಕೊಹ್ಲಿ ಒಟ್ಟಾರೆ ಪಡೆದಿರುವ ಮೊತ್ತ 126.2 ಕೋಟಿ ರೂ.
ರೋಹಿತ್ ಶರ್ಮಾ: ಹಿಟ್ಮ್ಯಾನ್ ಖ್ಯಾತಿಯ ರೋಹಿತ್ ಶರ್ಮಾ ಐಪಿಎಲ್ನಲ್ಲಿ ಡೆಕ್ಕನ್ ಚಾರ್ಜರ್ಸ್ ಹೈದರಾಬಾದ್ ಹಾಗೂ ಮುಂಬೈ ಇಂಡಿಯನ್ಸ್ ತಂಡವನ್ನು ಪ್ರತಿನಿಧಿಸಿದ್ದಾರೆ. ಐದು ಬಾರಿ ಮುಂಬೈ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿರುವ ರೋಹಿತ್ ಶರ್ಮಾ ಅವರ ಪ್ರಸ್ತುತ ಸಂಭಾವನೆ 15 ಕೋಟಿ ರೂ. ಅಲ್ಲದೆ ಕಳೆದ 13 ಸೀಸನ್ ಮೂಲಕ ರೋಹಿತ್ ಶರ್ಮಾ ಪಡೆದಿರುವ ಸಂಭಾವನೆ 131.6 ಕೋಟಿ ರೂ. ಈ ಮೂಲಕ ಅತೀ ಹೆಚ್ಚು ಸಂಭಾವನೆ ಪಡೆದ ಆಟಗಾರರ ಪಟ್ಟಿಯಲ್ಲಿ 2ನೇ ಸ್ಥಾನದಲ್ಲಿದ್ದಾರೆ.
ಮಹೇಂದ್ರ ಸಿಂಗ್ ಧೋನಿ: ಕೂಲ್ ಕ್ಯಾಪ್ಟನ್ ಖ್ಯಾತಿಯ ಧೋನಿ ಚೆನ್ನೈ ಸೂಪರ್ ಕಿಂಗ್ಸ್ ಹಾಗೂ ರೈಸಿಂಗ್ ಪುಣೆ ಜೈಂಟ್ಸ್ ತಂಡಗಳ ಪರ ಆಡಿದ್ದಾರೆ. ಅದರಲ್ಲೂ ಆರಂಭದಿಂದಲೂ ಸಿಎಸ್ಕೆ ತಂಡದ ನಾಯಕರಾಗಿರುವ ಧೋನಿ 3 ಬಾರಿ ತಂಡವನ್ನು ಚಾಂಪಿಯನ್ ಪಟ್ಟಕ್ಕೇರಿಸಿದ್ದರು. ಪ್ರಸ್ತುತ ಧೋನಿ ಪಡೆಯುತ್ತಿರುವ ಸಂಭಾವನೆ 15 ಕೋಟಿ. ಕಳೆದ 13 ಸೀಸನ್ಗಳಿಂದ ಕೂಲ್ ಕ್ಯಾಪ್ಟನ್ ಪಡೆದಿರುವ ಒಟ್ಟಾರೆ ಸಂಭಾವನೆ ಬರೋಬ್ಬರಿ 137.8 ಕೋಟಿ ರೂ. ಈ ಮೂಲಕ ಐಪಿಎಲ್ ಇತಿಹಾಸದಲ್ಲೇ ಅತೀ ಹೆಚ್ಚು ಸಂಭಾವನೆ ಪಡೆದ ಆಟಗಾರ ಎಂಬ ದಾಖಲೆ ಧೋನಿ ಹೆಸರಿನಲ್ಲಿದೆ.
Comments are closed.