ಧೋನಿ ದಾಖಲೆ ಮುರಿದ ಕೊಹ್ಲಿ

ಇಂಧೋರ್: ಪ್ರವಾಸಿ ಬಾಂಗ್ಲಾದೇಶ ವಿರುದ್ಧದ ಮೊದಲ ಟೆಸ್ಟ್ ಪಂದ್ಯವನ್ನು ಭಾರಿ ಅಂತರದಿಂದ ಗೆಲ್ಲುವುದರ ಮೂಲಕ ಭಾರತ ತನ್ನ ಗೆಲುವಿನ ನಾಗಲೋಟವನ್ನು ಮುಂದುವರಿಸಿದೆ.

ಇಂಧೋರ್ ನ ಹೋಳ್ಕರ್ ಮೈದಾನದಲ್ಲಿ ನಡೆದ ಪಂದ್ಯದಲ್ಲಿ ಬಾಂಗ್ಲಾ ಹುಲಿಗಳನ್ನು ಕಟ್ಟಿಹಾಕಿದ ಭಾರತ ತಂಡ ಇನ್ನಿಂಗ್ಸ್ ಮತ್ತು 130 ರನ್ ಗಳ ಅಂತರದಿಂದ ಗೆದ್ದು ಸರಣಿಯಲ್ಲಿ 1-0 ಅಂತರದ ಮುನ್ನಡೆ ಸಾಧಿಸಿತು.

ಕನ್ನಡಿಗ ಮಯಾಂಕ್ ಅಗರ್ವಾಲ್ ಮೊದಲ ಇನ್ನಿಂಗ್ಸ್ ನಲ್ಲಿ ಬಾರಿಸಿದ್ದ 243 ರನ್ ಕೂಡಾ ಬಾಂಗ್ಲಾ ತಂಡಕ್ಕೆ ಹೆಚ್ಚಾದಂತಿತ್ತು. ಯಾಕೆಂದರೆ ದ್ವಿತೀಯ ಇನ್ನಿಂಗ್ಸ್ ನಲ್ಲಿ ಬಾಂಗ್ಲಾ ಗಳಿಸಿದ್ದು 213 ರನ್ ಮಾತ್ರ.

ಈ ಇನ್ನಿಂಗ್ಸ್ ಜಯದೊಂದಿಗೆ ವಿರಾಟ್ ಕೊಹ್ಲಿ ಅತೀ ಹೆಚ್ಚು ಇನ್ನಿಂಗ್ಸ್ ಅಂತರದ ಜಯ ಸಾಧಿಸಿದ ನಾಯಕ ಎಂಬ ದಾಖಲೆಗೆ ಪಾತ್ರರಾದರು. ಕೊಹ್ಲಿ ನಾಯಕತ್ವದಲ್ಲಿ 10 ಸಲ ಭಾರತ ಇನ್ನಿಂಗ್ಸ್ ಜಯ ಸಾಧಿಸಿದರೆ, ಮಾಜಿ ನಾಯಕ ಮಹೇಂದ್ರ ಸಿಂಗ್ ಧೋನಿ ನಾಯಕತ್ವದಲ್ಲಿ 9 ಸಲ ಇನ್ನಿಂಗ್ಸ್ ಅಂತರದ ಜಯ ಭಾರತದ್ದಾಗಿತ್ತು.

ದಕ್ಷಿಣ ಆಫ್ರಿಕಾ ವಿರುದ್ಧ ಎರಡು ಮತ್ತು ಇಂದಿನ ಜಯ ಸೇರಿ ಸತತ ಮೂರು ಇನ್ನಿಂಗ್ಸ್ ಜಯ ಸಾಧಿಸಿದ ಭಾರತ 26 ವರ್ಷಗಳ ನಂತರ ಈ ಸಾಧನೆ ತೋರಿತು. 1993-94ರಲ್ಲೂ ಭಾರತ ಸತತ ಮೂರು ಇನ್ನಿಂಗ್ಸ್ ಜಯ ಸಾಧಿಸಿತ್ತು.