ಕ್ರೀಡೆ

ಮಳೆಯಿಂದ ಸ್ಥಗಿತಗೊಂಡಿದ್ದ ಭಾರತ-ಕಿವೀಸ್ ಕ್ಲೈಮ್ಯಾಕ್ಸ್ ! ಇಂದೇನಾಗಲಿದೆ….? ಮತ್ತೆ ಮಳೆ ಅಡ್ಡಿಯಾದರೆ…?

Pinterest LinkedIn Tumblr

ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾರತ ಹಾಗೂ ನ್ಯೂಜಿಲೆಂಡ್ ನಡುವಣ ನಡೆಯುತ್ತಿರುವ ಮೊದಲು ಸೆಮಿಫೈನಲ್ ಪಂದ್ಯವು ಮಳೆಯಿಂದಾಗಿ ಮಂಗಳವಾರದಂದು ಸ್ಥಗಿತಗೊಂಡಿರುವ ಹಿನ್ನಲೆಯಲ್ಲಿ ಬುಧವಾರಕ್ಕೆ ಮುಂದೂಡಲಾಗಿದೆ. ಸದ್ಯ ತಾಜಾ ಹವಾಮಾನ ವರದಿಯನ್ನು ಇಲ್ಲಿ ಕೊಡಲಾಗಿದೆ.

ಮ್ಯಾಂಚೆಸ್ಟರ್: ಇಂಗ್ಲೆಂಡ್ ಹಾಗೂ ವೇಲ್ಸ್‌ನಲ್ಲಿ ಸಾಗುತ್ತಿರುವ ಐಸಿಸಿ 2019 ಏಕದಿನ ವಿಶ್ವಕಪ್‌ನಲ್ಲಿ ಭಾರತ ಹಾಗೂ ನ್ಯೂಜಿಲೆಂಡ್ ನಡುವಣ ಮಂಳವಾರದಂದು ನಡೆದ ಮೊದಲ ಸೆಮಿಫೈನಲ್ ಪಂದ್ಯವು ಮಳೆಯಿಂದಾಗಿ ಸ್ಥಗಿತಗೊಂಡಿದ್ದು, ಬುಧವಾರದಂದು ನಿಗದಿತ ಅವಧಿಯ ವೇಳೆಗೆ ಮುಂದುವರಿಯಲಿದೆ.

ಟಾಸ್ ಗೆದ್ದು ಮೊದಲು ಬ್ಯಾಟಿಂಗ್ ನಡೆಸಿರುವ ನ್ಯೂಜಿಲೆಂಡ್, ಭಾರತದ ನಿಖರ ದಾಳಿಗೆ ಸಿಲುಕಿ 46.1 ಓವರ್‌ಗಳಲ್ಲಿ ಐದು ವಿಕೆಟ್ ನಷ್ಟಕ್ಕೆ 211 ರನ್ ಗಳಿಸಿದೆ. ನಾಯಕ ಕೇನ್ ವಿಲಿಯಮ್ಸನ್ 67 ರನ್ ಗಳಿಸಿ ಔಟಾದರೆ ಅಷ್ಟೇ ರನ್ ಗಳಿಸಿರುವ ರಾಸ್ ಟೇಲರ್ ಕ್ರೀಸಿನಲ್ಲಿದ್ದಾರೆ.

ನೈಜ ಪಂದ್ಯ ಪರಿಸ್ಥಿತಿ ಮುಂದುವರಿಯಲಿರುವುದರಿಂದ ನ್ಯೂಜಿಲೆಂಡ್ ಉಳಿದಿರುವ 3.5 ಓವರ್‌ಗಳಷ್ಟು ಬ್ಯಾಟಿಂಗ್ ನಡೆಸಲಿದೆ. ಬಳಿಕ ಭಾರತಕ್ಕೆ ಗುರಿ ನಿಗದಿಪಡಿಸಲಿದೆ.

ಈ ನಡುವೆ ಬುಧವಾರವು ಪಂದ್ಯಕ್ಕೆ ಮಳೆ ಅಡ್ಡಿಯಾಗುವ ಭೀತಿಯಿದೆ. ಬುಧವಾರವು ಮೋಡ ಕವಿದ ವಾತಾವರಣ ಮುಂದುವರಿದರೂ ಮಳೆಯಾಗುವ ಸಾಧ್ಯತೆ ಕಡಿಮೆ ಎನ್ನಲಾಗುತ್ತಿದೆ.

ಹವಾಮಾನ ಇಲಾಖೆಯ ಪ್ರಕಾರ ಸದ್ಯಕ್ಕೆ ಮಳೆಯಾಗುವ ಸಾಧ್ಯತೆ ಶೇಕಡಾ 20ರಷ್ಟಾಗಿದೆ. ಹಾಗಾಗಿ ಅಭಿಮಾನಿಗಳು ಭಾರತ ಹಾಗೂ ನ್ಯೂಜಿಲೆಂಡ್ ನಡುವೆ ನಿಕಟ ಪೈಪೋಟಿಯನ್ನು ನಿರೀಕ್ಷೆ ಮಾಡುತ್ತಿದ್ದಾರೆ.

ಹಾಗೊಂದು ವೇಳೆ ವರುಣ ದೇವರು ಕರುಣೆ ತೋರಿದರೆ ಸಂಪೂರ್ಣ 50 ಓವರ್‌ಗಳ ಪಂದ್ಯವನ್ನು ನಡೆಸಲಾಗುವುದು. ಒಂದು ವೇಳೆ ಮಳೆ ಅಡ್ಡಿಯಾದ್ದಲ್ಲಿ ಓವರ್‌ಗಳ ಸಂಖ್ಯೆಯನ್ನು ಇಳಿಸಲಾಗುವುದು.

ಸದ್ಯದ ಪರಿಸ್ಥಿತಿಯಲ್ಲೇ ನ್ಯೂಜಿಲೆಂಡ್ ಇನ್ನಿಂಗ್ಸ್ ಮುಕ್ತಾಯಗೊಂಡರೆ ಡಕ್ವರ್ತ್ ಲೂವಿಸ್ ನಿಮಯದಂತೆ ಭಾರತದ ಟಾರ್ಗೆಟ್ ಇಂತಿದೆ.

46 ಓವರ್‌ಗಳಲ್ಲಿ 237
40 ಓವರ್‌ಗಳಲ್ಲಿ 223
35 ಓವರ್‌ಗಳಲ್ಲಿ 209
30 ಓವರ್‌ಗಳಲ್ಲಿ 192
25 ಓವರ್‌ಗಳಲ್ಲಿ 172
20 ಓವರ್‌ಗಳಲ್ಲಿ 148

ಭಾರತೀಯ ಕಾಲಮಾನ ಬುಧವಾರ ಮಧ್ಯಾಹ್ನ 3 ಗಂಟೆಗೆ ಪಂದ್ಯ ಮುಂದುವರಿಯಲಿದೆ.

Comments are closed.