ಚೆಸ್ ಮಾಸ್ಟರ್‌ ಹರಿಕೃಷ್ಣಗೆ ಕಂಕಣಭಾಗ್ಯ; ಸರ್ಬಿಯಾ ಚೆಸ್‌ ಆಟಗಾರ್ತಿ ಜತೆ ವಿವಾಹ

ಹೈದರಾಬಾದ್‌: ಭಾರತದ ಅಗ್ರ ಶ್ರೇಯಾಂಕಿತ ಚೆಸ್‌ ಗ್ರ್ಯಾಂಡ್‌ ಮಾಸ್ಟಟ್‌ ಪೆಂಟಾಲ ಹರಿಕೃಷ್ಣಗೆ ಕಂಕಣಭಾಗ್ಯ ಕೂಡಿಬಂದಿದೆ.

ಸರ್ಬಿಯಾದ ಚೆಸ್‌ ಆಟಗಾರ್ತಿ ನಡ್ಜಾ ಜತೆ ಹರಿಕೃಷ್ಣ ದಾಂಪತ್ಯ ಜೀವನದ ನಡೆ ಇಡಲಿದ್ದಾರೆ.

ಮಾರ್ಚ್‌ 3ರಂದು ವಿವಾಹ ಮುಹೂರ್ತ ನಿಗದಿಯಾಗಿದೆ ಎಂದು ಹರಿಕೃಷ್ಣ ಅವರ ತಂದೆ ನಾಗೇಶ್ವರರಾವ್‌ ತಿಳಿಸಿದ್ದಾರೆ.

ಕಿರಿಯರ ಪಂದ್ಯಾವಳಿಗಳಲ್ಲಿ ಆಡುತ್ತಿದ್ದಾಗಿನಿಂದಲೂ ಹರಿಕೃಷ್ಣ ಮತ್ತು ನಡ್ಜಾ ಆತ್ಮೀಯರಾಗಿದ್ದರು. ಮೊದಲಿಗೆ ಸ್ನೇಹಿತರಾಗಿದ್ದ ಇಬ್ಬರಿಗೂ ನಂತರ ಪ್ರೇಮಾಂಕುರವಾಯಿತು. ಈಗ ತಮ್ಮ ಸಂಬಂಧವನ್ನು ಮತ್ತೊಂದು ಹಂತಕ್ಕೆ ಕೊಂಡೊಯ್ಯಲು ಇಬ್ಬರೂ ನಿರ್ಧರಿಸಿದ್ದಾರೆ.

ಇವರಿಬ್ಬರ ಪ್ರೇಮದ ಚದುರಂಗದಾಟಕ್ಕೆ ಮನೆಯವರೂ ಒಪ್ಪಿಗೆ ನೀಡಿದ್ದು, ಮದುವೆ ತಯಾರಿ ನಡೆಸಲಾಗುತ್ತಿದೆ.

ಈಗಾಗಲೇ ಕೆಲವು ಗಣ್ಯರು, ಆತ್ಮೀಯರು ಹಾಗೂ ಸ್ನೇಹಿತರಿಗೆ ಲಗ್ನ ಪತ್ರಿಕೆ ಕಳುಹಿಸಿಕೊಡಲಾಗಿದೆ ಎಂದು ಹರಿಕೃಷ್ಣ ತಂದೆ ತಿಳಿಸಿದ್ದಾರೆ.

31 ವರ್ಷದ ಹರಿಕೃಷ್ಣ ಆಂಧ್ರಪ್ರದೇಶದ ಗುಂಟೂರು ಜಿಲ್ಲೆಯರಾಗಿದ್ದು, ಹಲವಾರು ಪ್ರಶಸ್ತಿಗಳನ್ನು ಗೆದ್ದುಕೊಂಡಿದ್ದಾರೆ.

ವಿಶ್ವನಾಥನ್‌ ಆನಂದ್‌ ಮಾದರಿಯಲ್ಲಿ ಸಾಗಿರುವ ಹರಿಕೃಷ್ಣ 2001ರಲ್ಲಿ ಅತ್ಯಂತ ಕಿರಿಯ ಗ್ರ್ಯಾಂಡ್‌ ಮಾಸ್ಟರ್‌ ಆಗಿ ಹೊರಹೊಮ್ಮಿದ್ದರು. ನಂತರ ಪರಿರ್ಮಜನ್‌ ನೇಗಿ ಈ ದಾಖಲೆ ತಮ್ಮ ಹೆಸರಿಗೆ ಬರೆಸಿಕೊಂಡರು.

2011ರಲ್ಲಿ ಏಷ್ಯನ್‌ ವೈಯಕ್ತಿಕ ಚಾಂಪಿಯನ್‌ಷಿಪ್‌ ಗೆದ್ದುಕೊಂಡಿದ್ದ ಹರಿಕೃಷ್ಣ ನಂತರ ವಿಶ್ವ ಟೀಮ್‌ ಚಾಂಪಿಯನ್‌ಷಿಪ್‌ನಲ್ಲಿ ಕಂಚಿನ ಪದಕಕ್ಕೆ ಭಾಜರಾಗಿದ್ದರು.

ಹರಿಕೃಷ್ಣ ಬಾಳಿನ ಚದರಂಗದಾಟದಲ್ಲೀಗ ನಡ್ಜಾ ರೂಪದಲ್ಲಿ ಚೆಕ್‌’ಮೇಟ್‌’ ದೊರೆತಿದೆ.