ಬೆಂಗಳೂರು(ನ.27): ಇತ್ತೀಚೆಗೆ ಆನ್ಲೈನ್ ವಂಚನೆ ಪ್ರಕರಣಗಳು ಹೆಚ್ಚಾಗುತ್ತಿವೆ. ಅದರಲ್ಲೂ ಸಿಲಿಕಾನ್ ಸಿಟಿಯಲ್ಲಿ ಒಂದು ಮೋಸದ ಜಾಲವೇ ಇದೆ. ಇಂಥಹ ಪ್ರಕರಣಗಳು ಪ್ರತಿದಿನ ಬೆಳಕಿಗೆ ಬರುತ್ತವೆ. ಯುವತಿಯೊಬ್ಬಳು ಆನ್ಲೈನ್ಲ್ಲಿ ಡ್ರೆಸ್ ಖರೀದಿಸಲು ಹೋಗಿ ಮೋಸ ಹೋಗಿರುವ ಘಟನೆ ಬೆಂಗಳೂರಿನಲ್ಲಿ ನಡೆದಿದೆ.
ದಕ್ಷಿಣ ಬೆಂಗಳೂರಿನ ಗೊಟ್ಟಿಗೆರೆ ನಿವಾಸಿ ಶ್ರವಣ ಮೋಸ ಹೋದ ಯುವತಿ. ಆನ್ಲೈನ್ಲ್ಲಿ 800 ರೂಪಾಯಿಯ ಕುರ್ತಾ ಖರೀದಿಸಲು ಹೋಗಿ 80 ಸಾವಿರ ಹಣ ಕಳೆದುಕೊಂಡಿದ್ದಾಳೆ. ಇ-ಕಾಮರ್ಸ್ ಆ್ಯಪ್ ಮೂಲಕ ನವೆಂಬರ್ 8ರಂದು ಕುರ್ತಾ ಒಂದನ್ನು ಆರ್ಡರ್ ಮಾಡಿದ್ದಳು. ಅದರ ಬೆಲೆ 800 ರೂ.ಮಾತ್ರ. ಆದರೆ ಆರ್ಡರ್ ಮಾಡಿದ್ದ ಕುರ್ತಾ ಆಕೆಯ ಕೈ ತಲುಪಿರಲಿಲ್ಲ. ಹೀಗಾಗಿ ಯುವತಿ ಆ್ಯಪ್ನಲ್ಲಿ ಲಭ್ಯವಿದ್ದ ಕಸ್ಟಮರ್ ಕೇರ್ ಸೆಲ್ಗೆ ಕರೆ ಮಾಡಿದ್ದಳು.
ಕರೆ ಸ್ವೀಕರಿಸಿದ ಕಸ್ಟಮರ್ ಕೇರ್ ಎಕ್ಸಿಕ್ಯೂಟಿವ್, ನಿಮ್ಮ ಆರ್ಡರ್ ಕ್ಯಾನ್ಸಲ್ ಮಾಡುತ್ತೇವೆ, ನಾವು ಆನ್ಲೈನ್ನಲ್ಲಿ ಕಳಿಸಿವ ಲಿಂಕ್ ಕ್ಲಿಕ್ ಮಾಡಿ, ಅಲ್ಲಿ ಬರುವ ಅಫ್ಲಿಕೇಶನ್ ಭರ್ತಿ ಮಾಡಿ ಎಂದು ಹೇಳಿದ್ದರು. ಅದರಂತೆಯೇ ಯುವತಿ ಅಫ್ಲಿಕೇಶನ್ ಪೂರ್ಣ ಮಾಡಿ, ಅಲ್ಲಿ ಕೇಳಿದ್ದ ಬ್ಯಾಂಕ್ ಖಾತೆಯ ಮಾಹಿತಿಯನ್ನು ನೀಡಿದ್ದಳು.
ಬಳಿಕ ಆಕೆಯ ಮೊಬೈಲ್ಗೆ ಒಟಿಪಿ(OTP) ನಂಬರ್ ಬಂದಿತ್ತು. ಕಸ್ಟಮರ್ ಕೇರ್ ಎಕ್ಸಿಕ್ಯೂಟಿವ್ OTP ನಂಬರ್ ಶೇರ್ ಮಾಡುವಂತೆ ಮಹಿಳೆಗೆ ಹೇಳಿದ್ದ. ಅದರಂತೆಯೇ ಆಕೆ OTP ನಂಬರ್ ಕೊಟ್ಟಿದ್ದಳು. ನಂಬರ್ ಶೇರ್ ಮಾಡಿದ ಕೆಲವೇ ಕ್ಷಣಗಳಲ್ಲಿ 79,600 ರೂಪಾಯಿ ಮಹಿಳೆಯ ಬ್ಯಾಂಕ್ ಖಾತೆಯಿಂದ ಕಡಿತಗೊಂಡಿರುವ ಮೆಸೇಜ್ ಬಂದಿದೆ.
ಸದ್ಯ ಯುವತಿ ಶ್ರವಣ ಕೋಣನಕುಂಟೆ ಪೊಲೀಸರಿಗೆ ದೂರು ನೀಡಿದ್ದು, ಮೋಸ ಹೋದ ಪರಿಯನ್ನು ದೂರಿನಲ್ಲಿ ಉಲ್ಲೇಖಿಸಿದ್ದಾಳೆ. ಪೊಲೀಸರು ಆರೋಪಿಗಳ ಪತ್ತೆಗಾಗಿ ಹುಡುಕಾಟ ನಡೆಸಿದ್ದಾರೆ.
Comments are closed.