ಕರ್ನಾಟಕ

2ನೇ ಪತ್ನಿಯಿಂದ ಸೀಟ್​ಬೆಲ್ಟ್​ ಸುತ್ತಿ ಉದ್ಯಮಿ ಪ್ರಭಾಕರ್ ರೆಡ್ಡಿ ಕೊಲೆಯತ್ನ

Pinterest LinkedIn Tumblr


ಬೆಂಗಳೂರು (ಸೆ. 24): ಆಸ್ತಿ ವಿಷಯಕ್ಕೆ ಉದ್ಯಾನನಗರಿ ಬೆಂಗಳೂರಿನ ಉದ್ಯಮಿ ಪ್ರಭಾಕರ ರೆಡ್ಡಿ ಅವರನ್ನು ಪ್ರೇಯಸಿಯೇ ಕೊಲೆ ಮಾಡಲು ಪ್ರಯತ್ನಿಸಿದ ಘಟನೆ ಎಲೆಕ್ಟ್ರಾನಿಕ್​ ಸಿಟಿಯಲ್ಲಿ ನಡೆದಿದೆ.

ಕಳೆದ ಶುಕ್ರವಾರ ನೈಸ್​ ರೋಡ್​ನಿಂದ ಎಲೆಕ್ಟ್ರಾನಿಕ್ ಸಿಟಿಯ ಕಡೆಗೆ ತನ್ನ ಪ್ರೇಯಸಿಯೊಂದಿಗೆ ಕಾರಿನಲ್ಲಿ ಹೊರಟಿದ್ದಾಗ ಈ ಘಟನೆ ನಡೆದಿದೆ. ಈ ವೇಳೆ ಉದ್ಯಮಿ ಪ್ರಭಾಕರ್ ರೆಡ್ಡಿ ಮತ್ತು ಪ್ರೇಯಸಿ ಪವಿತ್ರಾ ನಡುವೆ ಕಾರಿನಲ್ಲೇ ವಾಗ್ವಾದ ಶುರುವಾಗಿದೆ. ಆಸ್ತಿಯನ್ನು ತನ್ನ ಹೆಸರಿಗೆ ವರ್ಗಾಯಿಸುವಂತೆ ಪವಿತ್ರಾ ಜಗಳ ಮಾಡಿದ್ದಾರೆ. ಅದಕ್ಕೆ ಪ್ರಭಾಕರ್ ರೆಡ್ಡಿ ಒಪ್ಪದಿದ್ದಾಗ ಕೋಪಗೊಂಡ ಪವಿತ್ರಾ ಕಾರಿನ ಸೀಟ್​ಬೆಲ್ಟ್​ನಿಂದ ಅವರ ಕುತ್ತಿಗೆ ಬಿಗಿದು ಕೊಲ್ಲಲು ಯತ್ನಿಸಿದ್ದಾಳೆ.

ಬಹಳ ದಿನಗಳಿಂದ ಆಸ್ತಿಯನ್ನು ತನ್ನ ಹೆಸರಿಗೆ ಬರೆದುಕೊಡುವಂತೆ ಪವಿತ್ರಾ ಕೇಳುತ್ತಿದ್ದಳು. ಇದೇ ವಿಷಯವನ್ನು ಮಾತನಾಡಲು ಪ್ರಭಾಕರ್ ರೆಡ್ಡಿ ಪವಿತ್ರಾಳನ್ನು ಬರಲು ಹೇಳಿದ್ದರು. ಆಸ್ತಿಯನ್ನು ವರ್ಗಾಯಿಸಲು ಸಾಧ್ಯವಿಲ್ಲ ಎಂದು ಸ್ಪಷ್ಟಪಡಿಸಿದ ಪ್ರಭಾಕರ್ ರೆಡ್ಡಿಯನ್ನು ಸೀಟ್​ಬೆಲ್ಟ್​ನಿಂದ ಕೊಲ್ಲಲು ಪ್ರಯತ್ನಿಸಿದಾಗ ಆಕೆಯಿಂದ ಬಿಡಿಸಿಕೊಂಡ ರೆಡ್ಡಿ ಜೋರಾಗಿ ಕಿರುಚಿಕೊಂಡಿದ್ದರು. ಕಾರಿನ ಕಿಟಕಿ ಗ್ಲಾಸ್​ ಇಳಿದಿದ್ದರಿಂದ ಪ್ರಭಾಕರ್ ರೆಡ್ಡಿಯ ಕಿರುಚಾಟ ಕೇಳಿ ಜನರು ಧಾವಿಸಿ ಬಂದಾಗ ಪವಿತ್ರಾ ಓಡಿಹೋಗಿದ್ದಾಳೆ.

ಪವಿತ್ರಾಳನ್ನು 2ನೇ ಪತ್ನಿ ಎಂದು ಹೇಳಿಕೊಂಡಿದ್ದ ಪ್ರಭಾಕರ್ ರೆಡ್ಡಿ ಆಕೆಯೊಂದಿಗೆ ಲಿವ್ ಇನ್ ರಿಲೇಷನ್​ಶಿಪ್​ನಲ್ಲಿದ್ದರು. ಪವಿತ್ರಾಳಿಗಾಗಿ ಆರ್​ಆರ್​ ನಗರದಲ್ಲಿ ಐಷಾರಾಮಿ ಮನೆಯನ್ನೂ ಕಟ್ಟಿಸಿಕೊಟ್ಟಿದ್ದರು. ತಮ್ಮ ಮೇಲಾದ ಹಲ್ಲೆಯ ಬಗ್ಗೆ ಎಲೆಕ್ಟ್ರಾನಿಕ್ ಸಿಟಿ ಪೊಲೀಸ್ ಠಾಣೆಗೆ ಪ್ರಭಾಕರ್ ರೆಡ್ಡಿ ದೂರು ನೀಡಿದ್ದಾರೆ. ಭೂಕಬಳಿಕೆ , ವಂಚನೆ ಹಿನ್ನಲೆ ಪ್ರಭಾಕರ್ ರೆಡ್ಡಿ ಮನೆ ಮೇಲೆ ಸಿಸಿಬಿ ಅಧಿಕಾರಿಗಳು ದಾಳಿ ನಡೆಸಿದ್ದರು. ಆಗ ರೆಡ್ಡಿಯ ಪ್ರೇಯಸಿ ಪವಿತ್ರಾ ತಮ್ಮ ಕರ್ತವ್ಯಕ್ಕೆ ಅಡ್ಡಿಪಡಿಸಿದ್ದಳೆಂದು ಆರ್​ಆರ್​ ನಗರ ಪೊಲೀಸರು ಆಕೆಯನ್ನು ಬಂಧಿಸಿದ್ದರು. ಸದ್ಯಕ್ಕೆ ಪೊಲೀಸರು ನಾಪತ್ತೆಯಾಗಿರುವ ಪವಿತ್ರಾಳ ಹುಡುಕಾಟ ನಡೆಸಿದ್ದಾರೆ.

Comments are closed.