ಬೆಂಗಳೂರು(ಫೆ. 11): ಹೆಬ್ಬಾಳ, ಬೀದರ್ ಹಾಗೂ ದೇವದುರ್ಗದಲ್ಲಿ ಮತದಾನಕ್ಕೆ ಇನ್ನು ಎರಡೇ ದಿನ ಬಾಕಿ. ಇವತ್ತು ಗುರುವಾರ ಈ ಕ್ಷೇತ್ರಗಳಲ್ಲಿ ಬಹಿರಂಗ ಪ್ರಚಾರಕ್ಕೆ ತೆರೆ ಬಿದ್ದಿದೆ.
ಹೆಬ್ಬಾಳದಲ್ಲಿ ಗುರುವಾರ ಭರ್ಜರಿ ಪ್ರಚಾರ ನಡೆಯಿತು. ಬಿಜೆಪಿ ಪರವಾಗಿ ಕೇಂದ್ರ ಸಚಿವ ವೆಂಕಯ್ಯ ನಾಯ್ಡು ಹಾಗೂ ಮಾಜಿ ಸಿಎಂ ಡಿವಿ ಸದಾನಂದಗೌಡ ಹೆಬ್ಬಾಳದಲ್ಲಿ ಬೈಕ್ ರ್ಯಾಲಿ ನಡೆಸಿದರು. ಈ ವೇಳೆ ಡಿವಿಎಸ್ ಸಿಎಂ ವಿರುದ್ಧ ವಾಗ್ದಾಳಿ ನಡೆಸಿದರು.
ಅತ್ತ ಸಿಎಂ ಸಿದ್ದರಾಮಯ್ಯ ತಮ್ಮ ಸಚಿವ ಸಂಪುಟದ ಸಹೋದ್ಯೋಗಿಗಳ ಜತೆ ರೋಡ್ ಶೋ ನಡೆಸಿ, ಬಿಜೆಪಿ ವಿರುದ್ಧ ಕೆಂಡಕಾರಿದರು.
ಬಹಿರಂಗ ಪ್ರಚಾರದ ಕೊನೆ ದಿನದಂದು ಹೆಬ್ಬಾಳ, ಬೀದರ್, ದೇವದುರ್ಗ ಈ ಮೂರೂ ಕಡೆಯೂ ಜೆಡಿಎಸ್’ನ ಘಟಾನುಘಟಿ ನಾಯಕರು ಪ್ರಚಾರದ ಕಣಕ್ಕಿಳಿದಿರಲಿಲ್ಲ. ಇತರ ಪಕ್ಷಗಳ ಅಭ್ಯರ್ಥಿಗಳಂತೂ ಕೊನೆಯ ದಿನದಂದು ಮತದಾರರನ್ನು ಸೆಳೆಯಲು ಭಾರೀ ಕಸರತ್ತು ನಡೆಸಿದರು.
ನಾಳೆ ಶುಕ್ರವಾರ ಅಭ್ಯರ್ಥಿಗಳು ಮನೆಮನೆ ಪ್ರಚಾರ ಮಾಡುವ ಅವಕಾಶ ನಡೆಯಲಿದ್ದು, ಫೆ. 13ರಂದು (ಶನಿವಾರ) ಮತದಾರ ಅಭ್ಯರ್ಥಿಗಳ ಭವಿಷ್ಯ ಬರೆಯಲಿದ್ದಾನೆ.
