ದಿಯಾಲಾ: ಶಿರಚ್ಛೇದದಂಥ ಕ್ರೌರ್ಯಕ್ಕೆ ಕುಖ್ಯಾತವಾಗಿರುವ ಇಸ್ಲಾಮಿಕ್‌ ಸ್ಟೇಟ್‌ ಉಗ್ರರ ಅಟ್ಟಹಾಸಕ್ಕೆ ಕೊನೆಯಿಲ್ಲದಂತಾಗಿದೆ.
ಸ್ಫೋಟಕಗಳ ಬಳಕೆ ಕುರಿತು ಇಸ್ಲಾಮಿಕ್‌ ಸ್ಟೇಟ್‌ ಸದಸ್ಯರಿಗೆ ತರಬೇತಿ ನೀಡಲು, ಮಗುವನ್ನು ಸ್ಫೋಟಿಸಿರುವ ಹೃದಯ ವಿದ್ರಾವಕ ಘಟನೆ ವರದಿಯಾಗಿದೆ.
ದಿಯಾಲಾ ಪ್ರಾಂತ್ಯದಲ್ಲಿ ಉಗ್ರರು ಜುಲೈ 10ರಂದು ಈ ನೀಚ ಕೃತ್ಯ ಎಸಗಿದ್ದಾರೆ ಎಂದು ಪ್ರಾಂತ್ಯದ ಭದ್ರತಾ ಸಮಿತಿ ಮುಖ್ಯಸ್ಥರು ತಿಳಿಸಿದ್ದಾರೆ.
ಮಗುವನ್ನು ದೂರದಲ್ಲಿ ಇರಿಸಿ ಸ್ಫೋಟಿಸಿದ ಘಟನೆಗೆ ಐಎಸ್‌ಐಎಸ್‌ನ ಹಲವಾರು ಉಗ್ರರು ಸಾಕ್ಷಿಯಾಗಿದ್ದಾರೆ. ಇದು ಅವರ ತರಬೇತಿಯ ಭಾಗವಾಗಿತ್ತು ಎಂದು ಹೇಳಲಾಗಿದೆ. ಇಸ್ಲಾಮಿಕ್‌ ಸ್ಟೇಟ್‌ ಸದಸ್ಯನನ್ನು ಕೊಂದ ಆರೋಪದ ಮೇಲೆ ಮಗುವಿನ ತಂದೆಯನ್ನು ಕಳೆದವಾರ ಉಗ್ರರು ಕೊಂದಿದ್ದರು.
ಕಂದಮ್ಮಗಳನ್ನು ತಿನ್ನಲು ಇದೆ ಅನುಮತಿ:
ಐಎಸ್‌ಐಎಸ್‌ ಇಂಥ ದುಷ್ಕೃತ್ಯ ಎಸಗಿರುವುದು ಇದೇ ಮೊದಲಲ್ಲ. ಈ ಹಿಂದೆ ಐದು ವರ್ಷದ ಬಾಲಕನ ದೇಹವನ್ನು ಉಗ್ರರು ಎರಡು ಭಾಗಗಳಾಗಿ ಕತ್ತರಿಸಿದ್ದರು. ಮತ್ತೊಂದು ಪ್ರಕರಣದಲ್ಲಿ, ಸಿರಿಯಾದಲ್ಲಿ ಬಸ್‌ ನಿಲ್ಲಿಸಿ 40 ದಿನದ ಹಸುಗೂಸಿನ ತಲೆ ತೆಗೆದಿದ್ದರು. ಪುಟ್ಟ ಕಂದಮ್ಮಗಳನ್ನು ಕೊಂದು ತಿನ್ನಲು ಅಲ್‌ ಬಾಗ್ದಾದಿ ತನ್ನ ಅನುಯಾಯಿಗಳಿಗೆ ಅನುಮತಿ ನೀಡಿದ್ದಾನೆ ಎಂದು ಮೂಲಗಳು ತಿಳಿಸಿವೆ.
