ಹೊಸ ಲಾಕ್‌ಡೌನ್ ನೀತಿ ಘೋಷಿಸಿದ ಪಂಜಾಬ್ ಸರ್ಕಾರ!

ಚಂಡೀಗಢ: ಮಹತ್ವದ ಬೆಳವಣಿಗೆಯೊಂದರಲ್ಲಿ ಪಂಜಾಬ್ ಸರ್ಕಾರ, ತುರ್ತು ಕ್ರಮಗಳ ಅಡಿಯಲ್ಲಿ ನೂತನ ಲಾಕ್‌ಡೌನ್ ನೀತಿಯನ್ನು ಘೋಷಿಸಿದೆ.

ಈ ಕುರಿತು ಮಾಹಿತಿ ನೀಡಿರುವ ಪಂಜಾಬ್ ಮುಖ್ಯಮಂತ್ರಿ ಕ್ಯಾ.ಅಮರೀಂದರ್ ಸಿಂಗ್, ಮಾರಕ ಕೊರೊನಾ ವೈರಸ್ ಹಾವಳಿ ತಪ್ಪಿಸಲು ಈ ತುರ್ತು ಕ್ರಮಗಳು ಅನಿವಾರ್ಯ ಎಂದು ಸ್ಷಷ್ಟಪಡಿಸಿದ್ದಾರೆ.

ಪ್ರಮುಖವಾಗಿ ನಿತ್ಯವೂ ರಾತ್ರಿ ಕರ್ಫ್ಯೂವನ್ನು ಹೇರಿರುವ ಪಂಜಾಬ್ ಸರ್ಕಾರ, ಸಂಜೆ ಏಳು ಗಂಟೆಯಿಂದ ಬೆಳಗ್ಗೆ 5 ಗಂಟೆವರೆಗೆ ನಿತ್ಯವೂ ಕಠಿಣ ಕರ್ಫ್ಯೂ ಇರಲಿದೆ ಎಂದು ಹೇಳಿದೆ.

ಅಲ್ಲದೇ ವಾರಾಂತ್ಯದಲ್ಲಿ ಕಡ್ಡಾಯ ಸಂಪೂರ್ಣ ಲಾಕ್‌ಡೌನ್ ಘೋಷಣೆ ಮಾಡಲಾಗಿದ್ದು, ರಾಜ್ಯದ ಎಲ್ಲಾ 167 ನಗರಗಳಲ್ಲಿ ಈ ಹೊಸ ಲಾಕ್‌ಡೌನ್ ನೀತಿ ನಾಳೆ(ಶುಕ್ರವಾರ)ಯಿಂದಲೇ ಜಾರಿಗೆ ಬರಲಿದೆ ಎಂದು ಸರ್ಕಾರ ಮಾಹಿತಿ ನೀಡಿದೆ.

ಈ ಹೊಸ ಲಾಕ್‌ಡೌನ್ ನೀತಿ ಇದೇ ಆಗಸ್ಟ್ 31ರವರೆಗೂ ಜಾರಿಯಲ್ಲಿರಲಿದ್ದು, ಮುಂದಿನ ಬೆಳವಣಿಗೆಗಳನ್ನು ಆಧರಿಸಿ ಸೂಕ್ತ ತೀರ್ಮಾನಗಳನ್ನು ಕೈಗೊಳ್ಳುವುದಾಗಿ ಕ್ಯಾ. ಅಮರೀಂದರ್ ಸಿಂಗ್ ಹೇಳಿದ್ದಾರೆ.

ಕೊರೊನಾ ಸೋಂಕು ಅಧಿಕ ಇರುವ ಐದು ಜಿಲ್ಲೆಗಳಲ್ಲಿ ಸಾರ್ವಜನಿಕ ಹಾಗೂ ಖಾಸಗಿ ಸಾರಿಗೆ ಸೇವೆ ನಿಷೇಧ, ಮದುವೆ ಹಾಗೂ ಅಂತ್ಯಸಂಸ್ಕಾರ ಹೊರತುಪಡಿಸಿ ಸಾರ್ವಜನಿಕರ ಗುಂಪು ಸೇರುವಿಕೆ ಹಾಗೂ ಶೇ.50 ರಷ್ಟು ಅಗತ್ಯ ಸೇವೆಗಳಲ್ಲದ ಅಂಗಡಿ ಮುಗ್ಗಟ್ಟುಗಳನ್ನು ಬಂದ್ ಮಾಡುವ ನಿರ್ಧಾರ ಕೈಗೊಳ್ಳಲಾಗಿದೆ.

ಕೊರೊನಾ ವೈರಸ್ ವಿರುದ್ಧದ ಹೋರಾಟದಲ್ಲಿರಾಜ್ಯ ಜಯ ಸಾಧಿಸಬೇಕಾದರೆ ಈ ಲಾಕ್‌ಡೌನ್ ಕ್ರಮಗಳನ್ನು ಎಲ್ಲರೂ ಕಡ್ಡಾಯವಾಗಿ ಅನುಸರಿಸಲೇಬೇಕು ಎಂದು ಕ್ಯಾ.ಅಮರೀಂದರ್ ಸಿಂಗ್ ಮನವಿ ಮಾಡಿದ್ದಾರೆ.

ರಾಜ್ಯದ ಆರ್ಥಿಕ ಸ್ಥಿತಿ ಮೇಲೆ ದುಷ್ಪರಿಣಾಮ ಬೀರದಂತೆ ಹೊಸ ಲಾಕ್‌ಡೌನ್ ನಿಯಮಾವಳಿಗಳನ್ನು ನಾವು ಜಾರಿಗೆ ತರಲಿದ್ದೇವೆ ಎಂದು ಕ್ಯಾ. ಅಮರೀಂದರ್ ಸಿಂಗ್ ಭರವಸೆ ನೀಡಿದ್ದಾರೆ.