ತಮಿಳುನಾಡು ಡಿಎಂಕೆ ಶಾಸಕ ಕೊರೊನಾಗೆ ಅನ್ಬಳಗನ್ ಬಲಿ!

ಚೆನ್ನೈ: ಆಘಾತಕಾರಿ ಬೆಳವಣಿಗೆಯೊಂದರಲ್ಲಿ ಮಾರಕ ಕೊರೊನಾ ವೈರಸ್‌ಗೆ ತಮಿಳುನಾಡಿನ ಡಿಎಂಕೆ ಶಾಸಕ ಜೆ. ಅನ್ಬಳಗನ್ ಬಲಿಯಾಗಿದ್ದಾರೆ.

ಕೊರೊನಾ ವೈರಸ್ ಸೋಂಕಿಗೆ ತುತ್ತಾಗಿದ್ದ ಜೆ ಅನ್ಬಳಗನ್ ಅವರನ್ನು ಕಳೆದ ಜೂನ್ 2ರಂದು ಆಸ್ಪತ್ರೆಗೆ ದಾಖಲಿಸಲಾಗಿತ್ತು. ಆದರೆ ಚಿಕಿತ್ಸೆ ಫಲಕಾರಿಯಾಗದೇ 61 ವರ್ಷದ ಅನ್ಬಳಗನ್ ಇಂದು ಬೆಳಗ್ಗೆ ಮೃತಪಟ್ಟಿದ್ದಾರೆ.

ಈ ಕುರಿತು ಮಾಹಿತಿ ನೀಡಿರುವ ಡಾ. ರೆಲಾ ಇನ್ಸ್ಟಿಟ್ಯೂಟ್ ಮತ್ತು ಮೆಡಿಕಲ್ ಸೆಂಟರ್, ತೀವ್ರ ಉಸಿರಾಟದ ತೊಂದರೆ ಹಾಗೂ ನ್ಯುಮೋನಿಯಾ ಉಲ್ಬಣದ ಪರಿಣಾಮವಾಗಿ ಜೆ. ಅನ್ಬಳಗನ್ ಕೊನೆಯುಸಿರೆಳೆದರು ಎಂದು ಸ್ಪಷ್ಟಪಡಿಸಿದೆ.

ಕೃತಕ ಉಸಿರಾಟದ ವ್ಯವಸ್ಥೆ ಹಾಗೂ ನಿರಂತರ ಚಿಕಿತ್ಸೆ ಬಳಿಕವೂ ಜೆ. ಅನ್ಬಳಗನ್ ಅಸುನೀಗಿದ್ದಾರೆ ಎಂದು ವೈದ್ಯರು ಖಚಿತಪಡಿಸಿದ್ದಾರೆ. ಜೆ. ಅನ್ಬಳಗನ್ ಕೊರೊನಾ ವೈರಸ್‌ಗೆ ಬಲಿಯಾದ ತಮಿಳುನಾಡಿನ ಮೊದಲ ರಾಜಕೀಯ ಮುಖಂಡ.

ಇನ್ನು ಜೆ. ಅನ್ಬಳಗನ್ ಸಾವಿಗೆ ಸಂತಾಪ ಸೂಚಿಸಿರುವ ಮುಖ್ಯಮಂತ್ರಿ ಇ. ಪಳನಿಸ್ವಾಮಿ, ಅನ್ಬಾಜಗನ್ ಕುಟುಂಬಕ್ಕೆ ಸಾಂತ್ವನ ಹೇಳಿದ್ದಾರೆ.

ಇನ್ನು ಅನ್ಬಳಗನ್ ಸಾವಿಗೆ ತೀವ್ರ ಸಂತಾಪ ಸೂಚಿಸಿರುವ ಡಿಎಂಕೆ ಸಚಿವ ಎಂ.ಕೆ ಸ್ಟಾಲಿನ್, ಪಕ್ಷದ ಕಚೇರಿಗಳಲ್ಲಿ ಮೂರು ದಿನಗಳ ಕಾಲ ಶೋಕಾಚರಣೆ ನಡೆಸುವಂತೆ ಆದೇಶ ನೀಡಿದ್ದಾರೆ.