ಲಾಕ್‌ಡೌನ್‌ ಸಡಿಲಿಕೆ ಬೆನ್ನಲ್ಲೇ ಸಿಮೆಂಟ್‌, ಕಬ್ಬಿಣ ದರ ದಿಢೀರ್‌ ಏರಿಕೆ

ಆತ್ಮನಿರ್ಭರ್‌ ಭಾರತಕ್ಕಾಗಿ 20 ಲಕ್ಷ ಕೋಟಿ ಪ್ಯಾಕೇಜ್‌ನಲ್ಲಿ ರಿಯಲ್‌ ಎಸ್ಟೇಟ್‌, ಸ್ವಂತ ಮನೆ ನಿರ್ಮಾಣಕ್ಕೆ ಸಾಕಷ್ಟು ಕೊಡುಗೆಗಳನ್ನು ನೀಡಲಾಗಿದೆ. ಆದರೆ, ಅದರ ಜತೆಗೇ ನಿರ್ಮಾಣ ಸಲಕರಣೆಗಳ ಬೆಲೆ ಒಮ್ಮೆಲೇ ಗಗನಕ್ಕೇರಿದೆ.

ಕಟ್ಟಡ ನಿರ್ಮಾಣದ ಸಲಕರಣೆಗಳಾದ ಸಿಮೆಂಟ್‌ ಮತ್ತು ಸ್ಟೀಲ್‌ ಬೆಲೆ ಏರಿಕೆಯಿಂದಾಗಿ ಅರೆಬರೆ ಕಟ್ಟಿದ್ದ ಮನೆಗಳನ್ನು ಬೇಗ ಮುಗಿಸಿಕೊಂಡು ನೆಮ್ಮದಿ ಕಾಣುವ ದಾವಂತದಲ್ಲಿರುವವರಿಗೆ ಬೆಲೆ ಬಿಸಿ ತಾಕಿದೆ.

ಸಿಮೆಂಟ್‌ 100 ರೂ. ಏರಿಕೆ: ಲಾಕ್‌ಡೌನ್‌ಗೂ ಮುಂಚೆ ಎಲ್ಲ ಕಂಪನಿಗಳ ಎ ಗ್ರೇಡ್‌ ಸಿಮೆಂಟ್‌ ಬೆಲೆ 280-300 ಬೆಲೆಯಿತ್ತು. ಲಾಕ್‌ಡೌನ್‌ ಸಡಿಲಿಕೆ ನಂತರ ಇದೇ ಎ ಗ್ರೇಡ್‌ ಸಿಮೆಂಟ್‌ ಪ್ರತಿ ಚೀಲಕ್ಕೆ 400 ರಿಂದ 420 ರೂ.ಗೆ ಏರಿಸಲಾಗಿದೆ. 240 ರಿಂದ 250 ರೂ. ಇದ್ದ ಬಿ ಮತ್ತು ಸಿ ಗ್ರೇಡ್‌ ಸಿಮೆಂಟ್‌ ಬೆಲೆ ಈಗ 360 ರಿಂದ 380 ರೂ. ಆಗಿದೆ. ಸಿಮೆಂಟ್‌ ಬೆಲೆ ಇದ್ದಕ್ಕಿದ್ದಂತೆ ನೂರು ರೂ.ಗಿಂತ ಹೆಚ್ಚು ಏರಿಕೆ ಆಗಿರುವುದು ನಿರ್ಮಾಣ ಕಾರ್ಯದಲ್ಲಿ ತೊಡಗಿರುವವರ ಅಸಮಾಧಾನಕ್ಕೆ ಕಾರಣ ಆಗಿದೆ.

ಹಾಗೆ ಕಟ್ಟಡ ಕಟ್ಟಲು ಮುಖ್ಯ ಸಲಕರಣೆಯಾದ ಕಬ್ಬಿಣದ ಬೆಲೆ ಕೂಡ ಏರಿಕೆಯಾಗಿದೆ. ಲಾಕ್‌ಡೌನ್‌ಗೂ ಮುಂಚೆ ಎಲ್ಲ ಕಂಪನಿಗಳ ಸ್ಟೀಲ್‌ ರೇಟ್‌ 46ರಿಂದ 62 ರೂ. ಇದ್ದ ಬೆಲೆ 48ರಿಂದ 64 ರೂ. ಆಗಿದೆ. ಪ್ರತಿ ಟನ್‌ಗೆ 2500ರೂ. ನಿಂದ 3000 ರೂ. ಏರಿಕೆಯಾಗಿದೆ.

ಟ್ರಾನ್ಸ್‌ಪೋರ್ಟ್‌ ಸಮಸ್ಯೆ: ಲಾಕ್‌ಡೌನ್‌ ಸಡಿಲಿಕೆ ಬಳಿಕ ಉತ್ಪಾದನೆ ಆರಂಭ ಆಗಿದ್ದರೂ ಕಚ್ಚಾ ವಸ್ತುಗಳು, ಟ್ರಾನ್ಸ್‌ಪೋರ್ಟ್‌, ಕಾರ್ಮಿಕರ ಕೊರತೆ, ಒಂದೇ ಶಿಫ್ಟ್‌ ಕೆಲಸ ಇನ್ನಿತರ ಸಮಸ್ಯೆಗಳಿವೆ. ಹಾಗಾಗಿ ಬೆಲೆ ಏರಿಸಲಾಗಿದೆ, ಯಾವುದೇ ಡಿಸ್ಕೌಂಟ್‌ ಕೂಡ ಇಲ್ಲಎಂದು ಉತ್ಪಾದನಾ ಕಂಪನಿಗಳು ಹೇಳುತ್ತಿವೆ. ಕೆಲ ಕಂಪನಿಗಳ ಸಿಮೆಂಟ್‌ ನೆರೆಯ ತಮಿಳುನಾಡು ಮತ್ತು ಆಂಧ್ರ ಪ್ರದೇಶದಿಂದ ರಾಜ್ಯಕ್ಕೆ ರವಾನೆ ಆಗಬೇಕಿದೆ. ರಾಜ್ಯದಲ್ಲಿಯೂ ಕೆಲ ಕಂಪನಿಗಳಿದ್ದು ದಾವಣಗೆರೆ ಜಿಲ್ಲೆಗೆ ನೆರೆಯ ಬಳ್ಳಾರಿ, ಕಲಬುರಗಿಯಿಂದಲೂ ಉತ್ಪನ್ನ ಬರುತ್ತದೆ. ಬೆಲೆ ಏರಿಕೆಯಿಂದ ಏಜೆನ್ಸಿಯವರು ಮತ್ತು ಹಾರ್ಡ್‌ವೇರ್‌ ಅಂಗಡಿಯವರು ಅಸಮಾಧಾನ ವ್ಯಕ್ತಪಡಿಸುತ್ತಿದ್ದು, ಗ್ರಾಹಕರನ್ನು ಸಮಾಧಾನ ಪಡಿಸಲು ಹರ ಸಾಹಸ ಪಡುತ್ತಿದ್ದಾರೆ.

ಜನರ ಅಸಮಾಧಾನ
ದೊಡ್ಡ ಸಣ್ಣ ಕಂಟ್ರಾಕ್ಟರ್‌, ಬಿಲ್ಡರ್‌ಗಳಿಗೆ ಇದು ಹೆಚ್ಚಿನ ಹೊರೆಯಲ್ಲದಿದ್ದರೂ ಬ್ಯಾಂಕ್‌ಗಳಲ್ಲಿ ಸಾಲ ಮಾಡಿ ನೆತ್ತಿ ಮೇಲೊಂದು ಸೂರು ಕಟ್ಟಿಕೊಳ್ಳಲು ಹೊರಟ ಮಧ್ಯಮ, ಬಡ ಮಧ್ಯಮ ವರ್ಗದ ಮಂದಿ, ನೌಕರರು ಮಾತ್ರ ಬೆಲೆ ಏರಿಕೆಯಿಂದ ತತ್ತರಿಸಲಿದ್ದಾರೆ. ಕೊರೊನಾ ಲಾಕ್‌ಡೌನ್‌ನಿಂದ ಕೆಲಸವಿಲ್ಲದೆ ಎಷ್ಟೋ ಮಂದಿ ತತ್ತರಿಸುತ್ತಿದ್ದಾರೆ. ಇಂತಹ ಹೊತ್ತಲ್ಲಿಅರ್ಧಕ್ಕೆ ನಿಂತಿದ್ದ ತಮ್ಮ ಮನೆಗಳನ್ನು ಬೇಗ ಮುಗಿಸಿಕೊಂಡು ಹೊಸ ಮನೆ ಸೇರುವ ಧಾವಂತದಲ್ಲಿರುವವರು ದುಬಾರಿ ಬೆಲೆ ತೆರುವಂತಾಗಿದೆ. ಕೆಲವರು ಮನೆ ನಿರ್ಮಾಣವನ್ನೇ ನಿಲ್ಲಿಸಿದ್ದಾರೆ.

ಸಿಮೆಂಟ್‌ಗೆ ಈ ಹಿಂದೆ ಕಂಪನಿಗಳು ಅನೇಕ ಡಿಸ್ಕೌಂಟ್‌ ನೀಡುತ್ತಿದ್ದವು. ಈಗ ಅದನ್ನೆಲ್ಲಾ ನಿಲ್ಲಿಸಲಾಗಿದೆ. ಬೆಲೆ ಕೂಡ ಏರಿಕೆಯಾಗಿದೆ, ನಾವು ಗ್ರಾಹಕರಿಗೆ ಮನವರಿಕೆ ಮಾಡುತ್ತಿದ್ದೇವೆ.
– ಅರವಿಂದ್‌, ಸಿಮೆಂಟ್‌ ಅಸೋಸಿಯೇಷನ್‌ ಅಧ್ಯಕ್ಷ, ದಾವಣಗೆರೆ

ಲಾಕ್‌ಡೌನ್‌ ನಂತರ ಸ್ಟೀಲ್‌ ಬೆಲೆ ಹೆಚ್ಚಾಗಿದ್ದು, ಕಂಪನಿಗಳು ಅನಿವಾರ್ಯ ಎನ್ನುತ್ತಿವೆ. ನಾವು ಗ್ರಾಹಕರಿಗೆ ಇದನ್ನೇ ಹೇಳಿ ಸಮಾಧಾನ ಮಾಡುತ್ತಿದ್ದೇವೆ. ಅವರಿಗೂ ಖರೀದಿ ಅನಿವಾರ್ಯ.
– ನಾರಪ್ಪ, ಹಾರ್ಡ್‌ವೇರ್‌ ಅಂಗಡಿ, ದಾವಣಗೆರೆ

ನಿವೃತ್ತಿಯಿಂದ ಬಂದ ಹಣದಲ್ಲಿ ಮನೆ ಕಟ್ಟುತ್ತಿದ್ದೇನೆ. ಬೆಲೆ ಏರಿಕೆಯಿಂದ ವೆಚ್ಚ ಹೆಚ್ಚಾಗುತ್ತದೆ. ಸದ್ಯ ಕೆಲಸವನ್ನೇ ನಿಲ್ಲಿಸಿದ್ದೇನೆ. ಬೆಲೆ ಏರಿಕೆ ಬಗ್ಗೆ ಸರಕಾರ ಗಮನ ಹರಿಸಬೇಕು.
– ಡಾ. ಮಲ್ಲಿಕಾರ್ಜುನ್‌, ನಿವೃತ್ತ ವೈದ್ಯ