ಮುಜಪ್ಫರ್‌ನಗರ: ಒಂದಲ್ಲ, ಎರಡು ಹೆಣ್ಣು ಹೆತ್ತಿದ್ದೀಯ ಎಂದು ಪತಿ ಪದೇ ಪದೇ ಅವಹೇಳನ ಮಾಡುತ್ತಿದ್ದಕ್ಕೆ ನೊಂದ ಪತ್ನಿ ತನ್ನಿಬ್ಬರು ಅವಳಿ ಶಿಶುಗಳನ್ನು ನೀರಲ್ಲಿ ಮುಳುಗಿಸಿ ಕೊಂದ ಕರಾಳ ಘಟನೆ ಉತ್ತರ ಪ್ರದೇಶದಲ್ಲಿ ನಡೆದಿದೆ. ಅದು ಕೂಡ ಮಗಳ ದಿನವಾದ ಸೆಪ್ಟೆಂಬರ್ 22ರಂದು.
ಮತ್ತೀಗ ಈ ಕೃತ್ಯಕ್ಕೆ ಕಾರಣನಾದ ಪತಿಯೊಂದಿಗೆ ಆಕೆ ಕಂಬಿ ಎಣಿಸುತ್ತಿದ್ದಾಳೆ.
ಪೊಲೀಸರ ಪ್ರಕಾರ ಭಿಕ್ಕಿ ಎಂಬ ಗ್ರಾಮದಲ್ಲಿ ಈ ಕೃತ್ಯ ನಡೆದಿದ್ದು, ಆರೋಪಿಯನ್ನು ನಜ್ಮಾ ಎಂದು ಗುರುತಿಸಲಾಗಿದೆ. ತನ್ನ ಮಕ್ಕಳಿಬ್ಬರು ಕಾಣೆಯಾಗಿದ್ದಾರೆ. ನಾನು ಮೂತ್ರ ವಿಸರ್ಜನೆಗೆ ಹೋದಾಗ ಯಾರೋ ಬಂದು ಅಪಹರಿಸಿಕೊಂಡು ಹೋಗಿದ್ದಾರೆ ಎಂದಾಕೆ ಗೋಳಾಡುತ್ತಿದ್ದುದನ್ನು ಕೇಳಿದ ನೆರೆಹೊರೆಯವರು ಪೊಲೀಸರಿಗೆ ಮಾಹಿತಿ ನೀಡಿದ್ದರು. ಸ್ಥಳಕ್ಕಾಗಮಿಸಿದ ಪೊಲೀಸರು ಅಪಹರಣ ಪ್ರಕರಣ ದಾಖಲಿಸಿಕೊಂಡು ತನಿಖೆಯನ್ನು ಆರಂಭಿಸಿದ್ದು ಆಕೆಯ ಉತ್ತರಗಳು ಗೊಂದಲಕಾರಿ ಎನಿಸಿದೆ.
ಅನುಮಾನಗೊಂಡ ಪೊಲೀಸರು ಪತಿ ಮತ್ತು ಪತ್ನಿಯನ್ನು ಪ್ರತ್ಯೇಕವಾಗಿ ವಿಚಾರಣೆಗೊಳಪಡಿಸಿದ್ದಾರೆ. ಕೊನೆಗೂ ತನ್ನ ತಪ್ಪನ್ನು ಒಪ್ಪಿಕೊಂಡ ಮಹಿಳೆ ಮಕ್ಕಳನ್ನು ನೀರಿಗೆ ಎಸೆದಿರುವುದಾಗಿ ಹೇಳಿದ್ದಾಳೆ.
ಈ ಇಬ್ಬರು ಅವಳಿ ಮಕ್ಕಳು ಹುಟ್ಟಿದಾಗಿನಿಂದ ಪತಿ ಸದಾ ಮಾನಸಿಕವಾಗಿ ಹಿಂಸಿಸುತ್ತಿದ್ದರು. ಹೀಗಾಗಿ ಇಂತಹ ನಿರ್ಧಾರಕ್ಕೆ ಬಂದೆ ಎಂದಾಕೆ ಬಾಯ್ಬಿಟ್ಟಿದ್ದಾಳೆ.
ನಾಲ್ಕು ವರ್ಷದ ಹಿಂದೆ ಅವರಿಬ್ಬರಿಗೆ ವಿವಾಹವಾಗಿತ್ತು ಅವರಿಬ್ಬರಿಗೆ 1 ವರ್ಷದ ಮಗುವಿದ್ದು, ಇತ್ತೀಚಿಗೆ ಕೂಲಿ ಕೆಲಸ ಮಾಡಿಕೊಂಡಿದ್ದ ವಾಸೀಂ ಕಳೆದ ಕೆಲ ದಿನಗಳಿಂದ ಕೆಲಸಕ್ಕೂ ಹೋಗುತ್ತಿರಲಿಲ್ಲ. ಸದಾ ಪತ್ನಿಯೊಂದಿಗೆ ಜಗಳವಾಡುತ್ತ, ಹೆಣ್ಣು ಹೆತ್ತಿರುವೆ ಎಂದು ಕಿಚಾಯಿಸುತ್ತಿದ್ದ, ಎಂದು ಪೊಲೀಸರು ಹೇಳಿದ್ದಾರೆ.
Comments are closed.