ಪುದುಚೆರಿ: ನಿನ್ನೆಯಷ್ಟೇ ಕರ್ನಾಟಕ ಎಸ್ಎಸ್ಎಲ್ಸಿ ಫಲಿತಾಂಶ ಪ್ರಕಟವಾಗಿದೆ. ಈ ಬಾರಿಯ ರಾಜ್ಯ ಶೇ. 73.70ರಷ್ಟು ಫಲಿತಾಂಶ ಪಡೆದುಕೊಂಡಿದೆ. ಇದಕ್ಕೂ 1 ದಿನ ಮೊದಲು ತಮಿಳುನಾಡು ಎಸ್ಎಸ್ಎಲ್ಸಿ ಫಲಿತಾಂಶ ಕೂಡ ಪ್ರಕಟವಾಗಿದ್ದು, ಅಲ್ಲಿಯೂ ಉತ್ತಮ ಫಲಿತಾಂಶ ದಾಖಲಾಗಿದೆ. ಅದಕ್ಕೂ ಮುಖ್ಯವಾಗಿ ಪುದುಚೆರಿಯಲ್ಲಿ ಒಂದೇ ಕುಟುಂಬದ ಇಬ್ಬರು ತೇರ್ಗಡೆಯಾಗಿದ್ದು, ಮನೆಯಲ್ಲಿ ಸಂತೋಷ ದುಪ್ಪಟ್ಟಾಗಿದೆ.
ಮಕ್ಕಳು ಪರೀಕ್ಷೆಯಲ್ಲಿ ಪಾಸ್ ಆದರೆ ಅಪ್ಪ-ಅಮ್ಮನಿಗೆ ಅದಕ್ಕಿಂತ ಖುಷಿ ಕೊಡುವ ಸಂಗತಿ ಮತ್ತೊಂದಿಲ್ಲ. ಆದರೆ, ಆ ಖುಷಿ, ಪರೀಕ್ಷೆಯ ಫಲಿತಾಂಶ ಏನಾಗುವುದೋ ಎಂಬ ಭಯವನ್ನು ತಾವೂ ಅನುಭವಿಸುವಂತಾದರೆ ಹೇಗಿರುತ್ತದೆ? ಮಕ್ಕಳು ಫಲಿತಾಂಶದ ಸಂದರ್ಭದಲ್ಲಿ ಅನುಭವಿಸುವ ಚಡಪಡಿಕೆ ಈ ಬಾರಿ ವಿದ್ಯಾರ್ಥಿನಿಯೊಬ್ಬಳ ಅಪ್ಪನಿಗೂ ಆಗಿತ್ತು.
ಒಂದೇ ಮನೆಯ ಇಬ್ಬರು ತೇರ್ಗಡೆಯಾಗಿದ್ದಾರೆ ಎಂದಮಾತ್ರಕ್ಕೆ ಅವರು ಅಕ್ಕ-ತಮ್ಮಂದಿರೋ, ಅಣ್ಣ- ತಂಗಿಯರೋ ಇರಬೇಕೆಂದು ನೀವು ಭಾವಿಸಬಹುದು. ಆದರೆ, ಮಗಳ ಜೊತೆಗೆ ಪರೀಕ್ಷೆ ಬರೆದಿದ್ದ ಅಪ್ಪನೂ ಪಾಸ್ ಆಗಿರುವುದು ವಿಶೇಷ. ಕೇಂದ್ರಾಡಳಿತ ಪ್ರದೇಶವಾದ ಪುದುಚೇರಿಯ ಎಸ್ಎಸ್ಎಲ್ಸಿ ಪರೀಕ್ಷೆಯಲ್ಲಿ 46 ವರ್ಷದ ಸುಬ್ರಹ್ಮಣ್ಯ ಹಾಗೂ ಅವರ ಮಗಳು ತಿರಿಗುಣ ಒಟ್ಟಿಗೇ ಎಸ್ಎಸ್ಎಲ್ಸಿ ಪರೀಕ್ಷೆ ಕಟ್ಟಿದ್ದರು.ಇದೀಗ ಅವರಿಬ್ಬರೂ ಪಾಸಾಗಿದ್ದಾರೆ.
ಇದೇನಪ್ಪ? ಮಗಳು ಪರೀಕ್ಷೆ ಬರೆಯುವ ಸಮಯದಲ್ಲಿ ಅಪ್ಪನಿಗೇಕೆ ಬೇಕಿತ್ತು ಪರೀಕ್ಷೆ ಉಸಾಬರಿ ಅಂತೀರಾ? ಅದಕ್ಕೆ ಕಾರಣವೂ ಇದೆ. ಸುಬ್ರಹ್ಮಣ್ಯ ಅವರು ಕೆಲವು ವರ್ಷಗಳ ಹಿಂದೆ ಸಹಾನುಭೂತಿ ಆಧಾರದ ಮೇಲೆ ಫೀಲ್ಡ್ ಇನ್ಸ್ಪೆಕ್ಟರ್ ಆಗಿ ಸರ್ಕಾರಿ ಉದ್ಯೋಗಕ್ಕೆ ಸೇರಿಕೊಂಡಿದ್ದರು. ಆ ಕೆಲಸದಲ್ಲಿ ಪ್ರಮೋಷನ್ ಬೇಕೆಂದರೆ ಅವರಿಗೆ 10ನೇ ತರಗತಿ ಸರ್ಟಿಫಿಕೆಟ್ ಬೇಕಾಗಿತ್ತು. ಆದ್ದರಿಂದ 2017ರಲ್ಲೇ ಖಾಸಗಿಯಾಗಿ ಎಸ್ಎಸ್ಎಲ್ಸಿ ಪರೀಕ್ಷೆ ಕಟ್ಟಿದ್ದರು. 2018ರಲ್ಲಿ ಮೊದಲ ಬಾರಿಗೆ ಸುಬ್ರಹ್ಮಣ್ಯ ಎಕ್ಸಾಂ ಬರೆದಿದ್ದಾಗ ಗಣಿತ ಸೇರಿ 3 ವಿಷಯಗಳಲ್ಲಿ ಫೇಲ್ ಆಗಿದ್ದರು. ಮತ್ತೆ ಸಪ್ಲಿಮೆಂಟರಿ ಎಕ್ಸಾಂ ಬರೆದರೂ ಯಾವುದೇ ಪ್ರಯೋಜನ ಆಗಿರಲಿಲ್ಲ. ಇದೀಗ 3ನೇ ಬಾರಿ ಪರೀಕ್ಷೆ ಕಟ್ಟಿದ್ದ ಸುಬ್ರಹ್ಮಣ್ಯ ಎಲ್ಲ ವಿಷಯಗಳಲ್ಲೂ ಪಾಸಾಗಿದ್ದಾರೆ. ಮಗಳು ಒಂದೇ ಬಾರಿಗೆ ಎಲ್ಲ ವಿಷಯಗಳಲ್ಲೂ ತೇರ್ಗಡೆಯಾದರೆ ಅಪ್ಪ 3 ಬಾರಿ ಪ್ರಯತ್ನಿಸಿ ಇದೀಗ ಯಶಸ್ವಿಯಾಗಿದ್ದಾರೆ.
Comments are closed.