ರಾಷ್ಟ್ರೀಯ

ಬಿಜೆಪಿ ಚುನಾವಣೆ ಸಭೆಯಲ್ಲಿ ರಾಹುಲ್ ಗಾಂಧಿಗೆ ಪಪ್ಪು ಎಂದ ನಾಯಕರಿಗೆ ಮಹಿಳೆಯಿಂದ ತರಾಟೆ!

Pinterest LinkedIn Tumblr
Kota: Congress President Rahul Gandhi 

ನವದೆಹಲಿ: ಬಿಜೆಪಿ ಸಭೆಗಳಲ್ಲಿ ಕಾಂಗ್ರೆಸ್​ ಅಧ್ಯಕ್ಷ ರಾಹುಲ್​ ಗಾಂಧಿ ಅವರಿಗೆ ‘ಪಪ್ಪು’ ಎನ್ನುವ ಶಬ್ದ ಬಳಕೆ ಮಾಡಿದರೆ ಸಿಳ್ಳೆ-ಚಪ್ಪಾಳೆಗಳು ಬೀಳುವುದು ಸಾಮಾನ್ಯ. ಆದರೆ, ಇತ್ತೀಚೆಗೆ ನಡೆದ ಬಿಜೆಪಿ ಚುನಾವಣೆ ಸಭೆಯಲ್ಲಿ ಈ ವಿಚಾರ ಸುಳ್ಳಾಗಿದೆ. ರಾಹುಲ್​ಗೆ ಪಪ್ಪು ಎಂದ ಬಿಜೆಪಿ ನಾಯಕರಿಗೆ ಮಹಿಳೆಯೊಬ್ಬಳು ತರಾಟೆ ತೆಗೆದುಕೊಂಡಿದ್ದಾಳೆ. ಈ ವಿಡಿಯೋ ಈಗ ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ.

ಮಥುರಾದ ಹಳ್ಳಿಯೊಂದರಲ್ಲಿ ಬಿಜೆಪಿ ಚುನಾವಣಾ ಸಭೆ ನಡೆಸುತ್ತಿತ್ತು. ಬಿಜೆಪಿ ಮುಖಂಡರೊಬ್ಬರು ಕಾಂಗ್ರೆಸ್​ ಪಕ್ಷವನ್ನು ತೆಗಳುವ ಕಾರ್ಯದಲ್ಲಿ ನಿರತರಾಗಿದ್ದರು. ಈ ವೇಳೆ ಆ ಮುಖಂಡ ರಾಹುಲ್​ ಗಾಂಧಿಗೆ ‘ಪಪ್ಪು’ ಎನ್ನುವ ಶಬ್ದ ಬಳಕೆ ಮಾಡಿದ್ದಾರೆ. ಅಲ್ಲಿದ್ದ ಮಹಿಳೆಯೋರ್ವಳು ಇದನ್ನು ಖಂಡಿಸಿದ್ದಾಳೆ. ಅಷ್ಟೇ ಅಲ್ಲ, ಪಪ್ಪು ಎಂದ ನಾಯಕನಿಗೆ ತರಾಟೆ ತೆಗೆದುಕೊಂಡಿದ್ದಾಳೆ.

ಬಿಜೆಪಿ ಸಭೆಯಲ್ಲಿದ್ದ ಮಹಿಳೆ ಕಾಂಗ್ರೆಸ್​​ನವಳಿರಬಹುದು ಎನ್ನುವ ಅನುಮಾನ ಅನೇಕರಲ್ಲಿ ಕಾಡಿತ್ತು. ಆದರೆ, ಇದಕ್ಕೂ ಆಕೆ ಸ್ಪಷ್ಟನೆ ನೀಡಿದ್ದಾಳೆ! “ನರೇಂದ್ರ ಮೋದಿ ಅವರು ನಮ್ಮ ದೇಶದ ಪ್ರಧಾನಿ. ಅವರು ಪ್ರಧಾನಿಯಾಗೇ ಮುಂದುವರಿಯಬೇಕು. ಅದಕ್ಕೆ ನನ್ನ ತಕರಾರು ಇಲ್ಲ. ಆದರೆ, ರಾಹುಲ್​ ಗಾಂಧಿಗೆ ನೀವು ಪಪ್ಪು ಎನ್ನುವ ಶಬ್ದ ಏಕೆ ಬಳಕೆ ಮಾಡಿದಿರಿ?,” ಎಂದು ಪ್ರಶ್ನಿಸಿದ್ದಾಳೆ ಆ ಮಹಿಳೆ.

ಇದಕ್ಕೆ ಬಿಜೆಪಿ ನಾಯಕ, “ಎಲ್ಲರೂ ರಾಹುಲ್​ಗೆ ಪಪ್ಪು ಎಂದು ಕರೆಯುತ್ತಾರೆ. ಇದೇ ಕಾರಣಕ್ಕೆ ನಾನು ಕೂಡ ಪಪ್ಪು ಎಂದು ಹೇಳಿದೆ. ಅದರಲ್ಲೇನಿದೆ,” ಎಂದು ಉತ್ತರಿಸುವ ಮೂಲಕ ನುಣುಚಿಕೊಳ್ಳಲು ಪ್ರಯತ್ನಿಸಿದರು. ಆದರೆ, ಇದಕ್ಕೆ ಜಗ್ಗದ ಮಹಿಳೆ, ತಮ್ಮ ವಾದ ಮುಂದುವರಿಸಿದಳು. “ರಾಹುಲ್​ ಕೂಡ ಪ್ರಧಾನಿ ಸ್ಥಾನಕ್ಕಾಗಿ ಸ್ಪರ್ಧಿಸುತ್ತಿರುವ ಅಭ್ಯರ್ಥಿ. ಹೀಗಿರುವಾಗ ನಾವು ಹೇಗೆ ಅವರಿಗೆ ಪಪ್ಪು ಎನ್ನುವ ಶಬ್ದ ಬಳಕೆ ಮಾಡಲು ಸಾಧ್ಯ,” ಎಂದರು.

ಈ ವೇಳೆ ಅಲ್ಲಿ ನೆರೆದಿದ್ದವರೆಲ್ಲರೂ ಮೋದಿ ಪರ ಘೋಷಣೆ ಕೂಗುವ ಮೂಲಕ ಪರಿಸ್ಥಿತಿ ನಿಯಂತ್ರಿಸಲು ಮುಂದಾದರು. ಆದರೆ, ಯಾವುದೇ ಪ್ರಯೋಜನವಾಗಲಿಲ್ಲ. ಪಪ್ಪು ಎಂದು ಹೇಳಿದ ನಾಯಕನ ಬಳಿ ಕ್ಷಮೆಯಾಚಿಸುವಂತೆ ಮಹಿಳೆ ವಾದ ಮುಂದುವರಿಸಿದಳು.

Comments are closed.