ಹೊಸದಿಲ್ಲಿ: ದೇಶದ ಇಂಟರ್ನೆಟ್ ಮತ್ತು ಮೊಬೈಲ್ ಬಳಕೆದಾರರನ್ನು ಗುರಿಯಾಗಿಸಿ ನಡೆಸುವ ಸೈಬರ್ ದಾಳಿಯಲ್ಲಿ ಹೆಚ್ಚಳವಾಗಿದ್ದು, ಪ್ರಸಕ್ತ ವರ್ಷದ ಜನವರಿಯಿಂದ ಜೂನ್ವರೆಗೆ 6.95 ಲಕ್ಷಕ್ಕೂ ಅಧಿಕ ಸೈಬರ್ ದಾಳಿಗಳು ಭಾರತದ ಬಳಕೆದಾರರ ಮೇಲೆ ನಡೆದಿವೆ ಎಂದು ಸೈಬರ್ ಭದ್ರತೆ ಒದಗಿಸುವ ಎಫ್-ಸೆಕ್ಯೂರ್ ಹೇಳಿದೆ.
ರಷ್ಯಾ, ಅಮೆರಿಕ, ಚೀನಾ ಮತ್ತು ನೆದರ್ಲೆಂಡ್ನಿಂದ ಅತ್ಯಂತ ಹೆಚ್ಚಿನ ಸಂಖ್ಯೆಯ ಸೈಬರ್ ದಾಳಿ ಭಾರತದ ಮೇಲೆ ನಡೆದಿದೆ. ಇದೇ ಸಂದರ್ಭದಲ್ಲಿ ದೇಶದ ಹ್ಯಾಕರ್ಗಳು ಆಸ್ಟ್ರಿಯಾ, ನೆದರ್ಲೆಂಡ್, ಇಂಗ್ಲೆಂಡ್, ಜಪಾನ್ ಮತ್ತು ಉಕ್ರೇನ್ ಬಳಕೆದಾರರನ್ನು ಗುರಿಯಾಗಿಸಿ 35,563 ಸೈಬರ್ ದಾಳಿಗಳನ್ನು ನಡೆಸಿದ್ದಾರೆ.
ಎಫ್-ಸೆಕ್ಯೂರ್ ಸಂಸ್ಥೆ ಜಗತ್ತಿನಾದ್ಯಂತ 41ಕ್ಕೂ ಅಧಿಕ ಹನಿಪಾಟ್ಗಳನ್ನು ಇರಿಸಿ, ಸೈಬರ್ ದಾಳಿಯ ಮೂಲವನ್ನು ಹುಡುಕುತ್ತಿದೆ. ಅವು ವಿವಿಧ ಮಾದರಿಯ ಸೈಬರ್ ದಾಳಿ, ಹ್ಯಾಕರ್ಗಳ ನೂತನ ತಂತ್ರಗಳ ಕುರಿತು ಮಾಹಿತಿ ಸಂಗ್ರಹಿಸುತ್ತದೆ.
ನೋಡಲು ಸಂಸ್ಥೆಯೊಂದರ ಸರ್ವರ್ನಂತೆ ಮತ್ತು ಕ್ಷೀಣವಾಗಿರುವಂತೆ ಕಾಣಿಸುವ ಹನಿಪಾಟ್ ಸರ್ವರ್, ಹ್ಯಾಕರ್ಗಳಿಗೆ ತಿಳಿಯದಂತೆ ಅವರ ಕಣ್ಣಿಗೆ ಮಣ್ಣೆರಚುತ್ತದೆ. ಅದರ ಮೂಲಕ ವಿವಿಧ ಮಾದರಿಯ ಸೈಬರ್ ದಾಳಿಯ ತಂತ್ರಗಳ ಮಾಹಿತಿ ಪಡೆಯುತ್ತದೆ.
ಭಾರತವನ್ನು ಗುರಿಯಾಗಿಸಿ ರಷ್ಯಾ 2,55,589 ಸೈಬರ್ ದಾಳಿ ನಡೆಸಿದ್ದರೆ, ಅಮೆರಿಕ 1,03.458 ಸೈಬರ್ ದಾಳಿ ನಡೆಸಿದೆ. ದೇಶದ ಮೇಲೆ ನಡೆದ ದಾಳಿ ಸಂಖ್ಯೆಯ ಪ್ರಕಾರ ಭಾರತ ಜಾಗತಿಕವಾಗಿ 21ನೇ ಸ್ಥಾನ ಪಡೆದಿದ್ದರೆ, ಭಾರತ ನಡೆಸಿದ ದಾಳಿಯ ಪ್ರಕಾರ 13ನೇ ಸ್ಥಾನ ಪಡೆದಿದೆ.
Comments are closed.