ರಾಜಸ್ಥಾನ ನಂತರ, ಆಂಧ್ರ ಪ್ರದೇಶದಲ್ಲೂ ತೈಲ ಬೆಲೆ ಇಳಿಕೆ

ಅಮರಾವತಿ: ತೈಲ ಬೆಲೆ ಏರಿಕೆ ವಿರೋಧಿಸಿ ಬಂದ್ ನಡೆಸುತ್ತಿರುವಂತೆಯೇ ಪೆಟ್ರೋಲ್‌ ಮತ್ತು ಡೀಸೆಲ್‌ ಮೇಲಿನ ವ್ಯಾಟ್‌ ಅನ್ನು ರಾಜಸ್ಥಾನ ಸರಕಾರವು ಶೇ. 4ರಷ್ಟು ಇಳಿಕೆ ಮಾಡಿದ್ದು, ಅದರ ಬೆನ್ನಲ್ಲೇ ಆಂ‍ಧ್ರ ಪ್ರದೇಶ ಸಿಎಂ ಚಂದ್ರಬಾಬು ನಾಯ್ಡು ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ತೆರಿಗೆಯನ್ನು ಪ್ರತಿ ಲೀಟರ್‌ಗೆ 2 ರೂ ಕಡಿಮೆ ಮಾಡಿದ್ದಾರೆ.

ರಾಜಸ್ಥಾನ ಸಿಎಂ ವಸುಂಧರಾ ರಾಜೆ ಅವರು ಪೆಟ್ರೋಲ್ ಮತ್ತು ಡೀಸೆಲ್ ಮೇಲಿನ ಪ್ರಸ್ತುತ ಶೇ. 30ರಷ್ಟಿರುವ ವ್ಯಾಟ್‌ ಅನ್ನು ಶೇ. 26ಕ್ಕೆ ಇಳಿಕೆ ಮಾಡಿದ್ದರು. ಇದರಿಂದ ಪ್ರತಿ ಲೀ. ತೈಲಕ್ಕೆ 2.50 ರೂ. ದರ ಇಳಿಕೆಯಾಗಿತ್ತು. ಆದರೆ ಸರಕಾರಕ್ಕೆ ವಾರ್ಷಿಕ 2000 ಕೋಟಿ ರೂ. ಹೊರೆಯಾಗಲಿದೆ.
ರಾಜಸ್ಥಾನದಲ್ಲೂ ತೈಲ ಬೆಲೆ ಇಳಿಕೆ

ಚಂದ್ರಬಾಬು ನಾಯ್ಡು ಕೂಡ ವ್ಯಾಟ್ ದರ ಇಳಿಕೆ ಮಾಡಿರುವುದರಿಂದ ಆಂಧ್ರ ಪ್ರದೇಶ ಸರಕಾರಕ್ಕೆ ವಾರ್ಷಿಕ 1,120 ಕೋಟಿ ರೂ. ಹೊರೆ ಬೀಳಲಿದೆ. ಮತ್ತೊಂದೆಡೆ ಕೇಂದ್ರ ಸರಕಾರ ಪೆಟ್ರೋಲ್, ಡೀಸೆಲ್ ಬೆಲೆ ಕಡಿಮೆ ಮಾಡಲು ಯಾವುದೇ ಕ್ರಮ ತೆಗೆದುಕೊಂಡಿಲ್ಲ ಎಂದು ಟೀಕಿಸಿದ್ದಾರೆ.

ಮಹಾರಾಷ್ಟ್ರದಲ್ಲೂ ಇಂಧನ ದರ ಇಳಿಕೆಯ ಮಾರ್ಗಗಳ ಬಗ್ಗೆ ಚಿಂತನೆ ನಡೆಸಿರುವುದಾಗಿ ಮುಖ್ಯಮಂತ್ರಿ ದೇವೇಂದ್ರ ಫಡ್ನವಿಸ್‌ ಹೇಳಿದ್ದಾರೆ.