ಜೈಲಿನಲ್ಲಿರುವ ತಮ್ಮ ಪತಿಯರ ಭೇಟಿಗೆ ಸಹೋದರಿಯರಂತೆ ಸೋಗು ಹಾಕಿದ ಪತ್ನಿಯರು!

ಗ್ರೇಟರ್ ನೋಯಿಡಾ: ಭ್ರಾತೃತ್ವ ಬಾಂಧವ್ಯ ಸಾರುವ ರಕ್ಷಾಬಂಧನ ಹಬ್ಬವನ್ನೇ ಅಸ್ತ್ರವನ್ನಾಗಿಸಿಕೊಂಡ ಕೆಲ ಮಹಿಳೆಯರು, ಜೈಲಿನಲ್ಲಿರುವ ತಮ್ಮ ಪತಿಯರನ್ನು ಭೇಟಿಯಾಗಲು ಸಹೋದರಿಯರಂತೆ ಸೋಗು ಹಾಕಿಕೊಂಡು ಬಂದ ಘಟನೆ ಲುಕ್ಸಾರ್‌ನಲ್ಲಿ ಬೆಳಕಿಗೆ ಬಂದಿದೆ.

ಹಲವಾರು ವರ್ಷಗಳಿಂದ ಪತ್ನಿಯರನ್ನು ನೋಡದೆ ನೊಂದಿದ್ದ ಪತಿಯರು ಜೈಲ್ ಪಾರ್ಕ್ ಪ್ರದೇಶದಲ್ಲಿ ಅವರನ್ನು ನೋಡುತ್ತಲೇ ಭಾವೋದ್ವೇಗವನ್ನು ತಡೆಯಲಾಗದೆ ಗಟ್ಟಿಯಾಗಿ ತಬ್ಬಿಕೊಂಡಿದ್ದೇ ಅವರಿಗೆ ಮುಳುವಾಗಿ ಪರಿಣಮಿಸಿತು. ರಾಖಿ ಕಟ್ಟಲು ಬಂದವರಲ್ಲ, ಬದಲಾಗಿ ಹಬ್ಬದ ನೆಪದಲ್ಲಿ ಪತಿಯರನ್ನು ಭೇಟಿಯಾಗಲು ಬಂದ ಪತ್ನಿಯರಿವರು ಎಂದು ಜೈಲಿನ ಅಧಿಕಾರಿಗಳಿಗೆ ತಿಳಿದು ಹೋಯಿತು. ಹೀಗಾಗಿ ಸಹೋದರಿಯರ ವೇಷದಲ್ಲಿದ್ದ ಪತ್ನಿಯರನ್ನು ತಕ್ಷಣವೇ ಹೊರಗೆ ಕಳುಹಿಸಲಾಯಿತು.

ನಿಜವಾದ ಸಹೋದರಿಯರು ಸಹ ತಮ್ಮ ಸಹೋದರರನ್ನು ಕಾಣಲು ಜೈಲಿಗೆ ಬಂದಿದ್ದರು. ಅವರಲ್ಲಿ ಮುಸ್ಲಿಂ ಮಹಿಳೆಯರು ಸಹ ಇದ್ದರು. ಅವರೆಲ್ಲರು ರಾಖಿ ಕಟ್ಟಲು ಅಧಿಕಾರಿಗಳು ಅನುವು ಮಾಡಿಕೊಟ್ಟರು.

ಸಹೋದರ- ಸಹೋದರಿಯರ ಭೇಟಿಗೆ ಜೈಲು ಆವರಣದಲ್ಲಿ ಅವಕಾಶ ಮಾಡಿಕೊಡಲಾಗಿತ್ತು. ಭದ್ರತೆಗಾಗಿ ಹೆಚ್ಚಿನ ಸಿಬ್ಬಂದಿಯನ್ನು ನೇಮಿಸಲಾಗಿತ್ತು. ಭಾನುವಾರ ಸಂಜೆಯವರೆಗೆ ಸುಮಾರು 2000 ಮಹಿಳೆಯರು ಜೈಲಿಗೆ ಬಂದಿದ್ದರು. ಅದರಲ್ಲಿ 100ಕ್ಕೂ ಹೆಚ್ಚು ಮುಸ್ಲಿಂ ಮಹಿಳೆಯರಿದ್ದರು.

ಈ ಅವಕಾಶವನ್ನು ದುರುಪಯೋಗ ಪಡಿಸಿಕೊಂಡ ಕೆಲ ಮಹಿಳೆಯರು ಪತಿಯನ್ನು ಭೇಟಿಯಾಗಲು ಬಂದರು. ಈ ಬಗ್ಗೆ ಸಹ ಕೈದಿಗಳು ಅಧಿಕಾರಿಗಳಲ್ಲಿ ದೂರಿದ್ದರು. ಪರಿಶೀಲಿಸುತ್ತಿದ್ದ ಪೊಲೀಸರಿಗೆ ಪತಿ- ಪತ್ನಿ ಮೈಮರೆತು ತಬ್ಬಿಕೊಂಡಾಗ ಎಲ್ಲವೂ ಸ್ಪಷ್ಟವಾಯಿತು.