ಹೊಸದಿಲ್ಲಿ: ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ ವಂಚನೆ ಪ್ರಕರಣದ ಪ್ರಮುಖ ಆರೋಪಿ, ಉದ್ಯಮಿ ನೀರವ್ ಮೋದಿ ಅವರಿಂದ ಕಾಂಗ್ರೆಸ್‌ ಮುಖಂಡ ಅಭಿಷೇಕ್‌ ಸಿಂಘ್ವಿ ಅವರ ಪತ್ನಿ 1.5 ಕೋಟಿ ರೂ. ಮೊತ್ತದ ರತ್ನಗಳನ್ನು ಖರೀದಿಸಿರುವುದು ತನಿಖೆಯ ವೇಳೆ ಬಯಲಾಗಿದೆ.
ಸಿಂಘ್ವಿ ಅವರ ಪತ್ನಿ ಅನಿತಾ ಸಿಂಘ್ವಿ ಅವರು ಈ ರತ್ನ ಖರೀದಿ ವ್ಯವಹಾರ ನಡೆಸಿದ್ದು, ಈ ಬಗ್ಗೆ ತನಗೆ ಏನೂ ಗೊತ್ತಿಲ್ಲ ಎಂದು ಸಿಂಘ್ವಿ ಅವರು ಪ್ರತಿಕ್ರಿಯಿಸಿದ್ದಾರೆ. ಈ ಹೇಳಿಕೆಯನ್ನು ಒಪ್ಪಿಕೊಳ್ಳುವ ಪ್ರಶ್ನೆಯೇ ಇಲ್ಲ ಎಂದು ಅವರು ಹೇಳಿದ್ದಾರೆ.
2014ರ ಮೇ, ಆಗಸ್ಟ್‌, 2015ರ ಜನವರಿಯಲ್ಲಿ ಅನಿತಾ ಅವರು ರತ್ನಗಳ ಖರೀದಿ ನಡೆಸಿರುವುದು ನೀರವ್ ಮೋದಿ ಅವರು ನಿರ್ವಹಿಸುತ್ತಿರುವ ಕಡತಗಳಲ್ಲಿ ದಾಖಲಾಗಿದೆ. ಈ ವ್ಯವಹಾರಗಳಲ್ಲಿ ಅವರು ಪಾನ್‌ ಸಂಖ್ಯೆ ನಮೂದಿಸಿದ್ದು, ಚೆಕ್‌ಗಳಲ್ಲಿಯೇ ಹಣ ಪಾವತಿಸಿದ್ದಾರೆ.
ನೀರವ್ ಮತ್ತು ಅವರ ತಂಡವು ನಿರ್ವಹಿಸುತ್ತ ಬಂದಿರುವ ಕಂಪ್ಯೂಟರ್‌ ದಾಖಲೆಗಳ ಪರಿಶೀಲನೆಯಲ್ಲಿ ಲೆಕ್ಕಪತ್ರದ ವ್ಯಾಪ್ತಿಗೊಳಪಡದೆ 4.8 ಕೋಟಿ ರೂ. ವ್ಯವಹಾರ ನಡೆಸಿರುವುದು ಕೂಡ ಪತ್ತೆಯಾಗಿದೆ.
ಅನಿತಾ ಅವರು ಆಭರಣ ಖರೀದಿಸಿರುವುದಕ್ಕೆ ಸಂಬಂಧಿಸಿದಂತೆ ನನಗೆ ಏನೂ ಗೊತ್ತಿಲ್ಲ. ನೀವು ಯಾರದೋ ಕಂಪ್ಯೂಟರ್‌ನಲ್ಲಿ ಹೇಳಿಕೆ ನೋಡಿದ್ದೀರಿ. ಅದನ್ನು ನಿಜವೆಂದು ಒಪ್ಪಿಕೊಳ್ಳಲು ಸಾಧ್ಯವಿಲ್ಲ. ನೀವು ಹೇಳುತ್ತಿರುವ ವಿಚಾರ ಈಗ ಉದ್ಭವಿಸಿರುವ ಸಮಸ್ಯೆಗಿಂತ ಬೇರೆಯಾಗಿದೆ. ಸಂಪೂರ್ಣ ಅಸಮರ್ಪಕ, ಮೊದಲ ಬಾರಿಗೆ ಇಂಥ ಹೇಳಿಕೆಗಳನ್ನು ಕೇಳುತ್ತಿರುವುದಾಗಿ ಸಿಂಘ್ವಿ ಹೇಳಿದ್ದಾರೆ.
ಪಂಜಾಬ್‌ ನ್ಯಾಷನಲ್‌ ಬ್ಯಾಂಕ್‌ನಲ್ಲಿ 11,300 ಕೋಟಿ ರೂ. ಅಕ್ರಮ ವಹಿವಾಟು ನಡೆಸಿರುವ ಆರೋಪಿಗಳಲ್ಲಿ ಖ್ಯಾತ ಆಭರಣ ವಿನ್ಯಾಸಕ ನೀರವ್ ಮೋದಿ ಹೆಸರಿದ್ದು, ದೇಶ ತೊರೆದು ನ್ಯೂಯಾರ್ಕ್‌ನ ಪ್ರತಿಷ್ಠಿತ ಹೋಟೆಲ್‌ನಲ್ಲಿದ್ದಾರೆ.
Comments are closed.