ಗಣರಾಜ್ಯೋತ್ಸವ: ಬಿಎಸ್ಸೆಫ್‌ನ ಮಹಿಳಾ ತಂಡ ‘ಸೀಮಾ ಭವಾನಿ’ ಮೈ ನವಿರೇಳಿಸುವ ಸಾಹಸ

ಹೊಸದಿಲ್ಲಿ: ಗಡಿ ಭದ್ರತಾ ಪಡೆಯ (ಬಿಎಸ್‌ಎಫ್‌) ಮಹಿಳಾ ಯೋಧರ ತುಕಡಿಯೊಂದು 69ನೇ ಗಣರಾಜ್ಯೋತ್ಸವ ಪರೇಡ್‌ನಲ್ಲಿ ಮೈನವಿರೇಳಿಸುವ ಸಾಹಸ ಪ್ರದರ್ಶನ ನೀಡಿದೆ.

ಗಣರಾಜ್ಯೋತ್ಸವದಂದು ಮಹಿಳಾ ಯೋಧರ ತಂಡವೊಂದು ಬೈಕ್‌ ಮೇಲಿನ ಸಾಹಸ ಪ್ರದರ್ಶನ ನೀಡಿರುವುದು ಇದೇ ಮೊದಲು. 2015ರಲ್ಲಿ ಭೂಸೇನೆ, ನೌಕಾಪಡೆ ಮತ್ತು ವಾಯುಪಡೆಯ ಮಹಿಳಾ ಯೋಧರ ತಂಡ ಮೊದಲ ಬಾರಿಗೆ ಗಣರಾಜ್ಯೋತ್ಸವ ಪರೇಡ್‌ನಲ್ಲಿ ಪಾಲ್ಗೊಂಡಿತ್ತು. ಆದರೆ ಬೈಕ್‌ ಸಾಹಸದ ಪ್ರದರ್ಶನ ನೀಡುವುದು ಇದೇ ಮೊದಲು.

ಸಬ್‌ ಇನ್‌ಸ್ಪೆಕ್ಟರ್‌ ಸ್ಟಾನ್‌ಝಿನ್‌ ನೊರಿಯಾಂಗ್‌ ನೇತೃತ್ವದ 113 ಮಹಿಳಾ ಯೋಧರ ತಂಡ ‘ಸೀಮಾ ಭವಾನಿ’ ಈ ಪ್ರದರ್ಶನ ನೀಡಿತು.

ವಿಶೇಷ ಮಹಿಳಾ ತಂಡದ ಡ್ರೈವಿಂಗ್ ಕೌಶಲ್ಯ ಈ ಬಾರಿಯ ಗಣರಾಜ್ಯೋತ್ಸವದ ವಿಶೇಷ ಆಕರ್ಷಣೆಯಾಗಿತ್ತು. ಈ ತಂಡ 350 ಸಿಸಿ ರಾಯಲ್‌ ಎನ್‌ಫೀಲ್ಡ್‌ ಬುಲೆಟ್‌ ಮೋಟರ್‌ ಸೈಕಲ್‌ಗಳಲ್ಲಿ 16 ಬಗೆಯ ಸಾಹಸ ಪ್ರದರ್ಶನಗಳನ್ನು (ಡೇರ್‌ಡೆವಿಲ್‌ ಸ್ಟಂಟ್ಸ್‌) ನೀಡಿತು.

ರಾಷ್ಟ್ರಪತಿಗಳಿಗೆ ಸೆಲ್ಯೂಟ್‌ ಮಾಡುವುದು, ಫಿಶ್‌ ರೈಡಿಂಗ್‌, ಶಕ್ತಿಮಾನ್‌ ಇತ್ಯಾದಿ ಸಾಹಸ ಪ್ರದರ್ಶನ ಮಾಡಲಾಯಿತು.

LIVE: Get to know what is fish-riding, side-riding, faulaad, Prachand Baalay Shaktiman, Mobile PT, Bullfighting, Peacock, Saptarishi, Brahma Yog Guldasta, Wind Mill Formation & more – showcased by the all-woman Daredevil riders of @BSF_India https://t.co/N2TSVZzKUL #RepublicDay
— PIB India (@PIB_India) January 26, 2018

ತೆಂಕಾಪುರದ ಬಿಎಸ್‌ಎಫ್‌ ಅಕಾಡೆಮಿಯ ಸೆಂಟ್ರಲ್‌ ಸ್ಕೂಲ್‌ ಆಫ್‌ ಮೋಟಾರ್‌ ಟ್ರಾನ್ಸ್‌ಪೋರ್ಟ್‌ನಿಂದ ‘ಸೀಮಾ ಭವಾನಿ’ ತಂಡವನ್ನು ಆರಿಸಲಾಗಿದೆ.

25ರಿಂದ 30 ವರ್ಷದೊಳಗಿನ ಬಿಎಸ್‌ಎಫ್‌ ತರಬೇತುದಾರರಿಂದ ಈ ತಂಡದ ಸದಸ್ಯರನ್ನು ಆಯ್ಕೆ ಮಾಡಲಾಗಿದೆ. ಪಡೆಯ ವಿವಿಧ ಶ್ರೇಣಿಗಳಿಂದ ಅವರನ್ನು ಆಯ್ಕೆ ಮಾಡಲಾಗಿದೆ.