ಮಡಿಲಲ್ಲಿ ಮಗು ಕೂರಿಸಿಕೊಂಡು ಸುದ್ದಿ ಓದಿದ ಆ್ಯಂಕರ್

ಹೊಸದಿಲ್ಲಿ: ಪಾಕಿಸ್ತಾನದ ವಾರ್ತಾ ವಾಚಕಿಯೊಬ್ಬರು ತನ್ನ ಪುಟ್ಟ ಮಗುವನ್ನು ತನ್ನ ಮಡಿಲಲ್ಲಿ ಕೂರಿಸಿಕೊಂಡು ಸುದ್ದಿ ಓದುವ ಮೂಲಕ ಇಡೀ ಜಗತ್ತಿನ ಗಮನಸೆಳೆದಿದ್ದಾರೆ. ಅಪ್ತಾಪ್ತ ಬಾಲಕಿ ಮೇಲೆ ಅತ್ಯಾಚಾರ ಎಸಗಿ, ಭೀಕರವಾಗಿ ಹತ್ಯೆ ಮಾಡಿದ ಘಟನೆ ಖಂಡಿಸಿ ಪಾಕ್‍ನ ಪ್ರಮುಖ ಮಹಿಳಾ ನಿರೂಪಕಿಯರಲ್ಲಿ ಒಬ್ಬರಾದ ಕಿರಣ್ ನಾಜ್ ಈ ರೀತಿ ಮಾಡಿದ್ದಾರೆ.

ಪಶ್ಚಿಮ ಪಾಕಿಸ್ತಾನದ ಕಸೂರ್ ಪ್ರದೇಶದಲ್ಲಿ ಕಳೆದ ವಾರ ಜೈನಬ್ ಅನ್ಸಾರಿ ಎಂಬ ಏಳು ವರ್ಷದ ಮಗು ಕಾಣೆಯಾಗಿತ್ತು. ಖುರಾನ್ ಕಲಿಯಲು ಹೋಗಿದ್ದಾಗ ಆ ಮಗುವನ್ನು ಅಪಹರಿಸಿದ್ದರು. ಮಗುವಿನಾಗಿ ಹುಡುಕಾಡಿದ ಬಂಧುಗಳಿಗೆ ಕಸೂರ್‌ನಲ್ಲಿ ಕಸ ಎಸೆಯುವ ಜಾಗದಲ್ಲಿ ಶವವಾಗಿ ಪತ್ತೆಯಾಗಿದ್ದಳು. ಮುಗ್ಧ ಮಗುವಿನ ಮೇಲೆ ಅತ್ಯಾಚಾರ ಎಸಗಿ ಅತ್ಯಂತ ಭೀಕರವಾಗಿ ಹತ್ಯೆ ಮಾಡಲಾಗಿತ್ತು.

ಮಗುವಿನ ಹತ್ಯೆ ಬಗ್ಗೆ ಆಕ್ರೋಶಗೊಂಡಿದ್ದ ಕಸೂರ್ ನಿವಾಸಿಗಳು ಪ್ರತಿಭಟಿಸಿದ್ದರು. ಪೊಲೀಸ್ ಠಾಣೆ ಮೇಲೆ ದಾಳಿ ಮಾಡಿದ್ದರು. ಜೈನಬ್ ಮೇಲೆ ಅತ್ಯಾಚಾರ ಎಸಗಿ, ಹತ್ಯೆ ಮಾಡಿದ ಘಟನೆ ಕಿರಣ್ ನಾಜ್‌ರನ್ನು ತೀವ್ರ ಆಲೋಚನೆಗೆ ಹಚ್ಚಿತು. ಹಾಗಾಗಿ ತನ್ನ ಮಗುವಿನ ಭದ್ರತೆಯನ್ನು ದೃಷ್ಟಿಯಲ್ಲಿಟ್ಟುಕೊಂಡು ಸ್ಟುಡಿಯೋಗೆ ಕರೆದುಕೊಂಡು ಬಂದಿದ್ದಾರೆ. ತನ್ನ ಮಗುವನ್ನು ಮಡಿಲಲ್ಲಿ ಕೂರಿಸಿಕೊಂಡು ಸುದ್ದಿ ಓದಿದ್ದಾರೆ.

‘ಎಂದಿನಂತೆ ಸುದ್ದಿ ಓದುವ ನಿಮ್ಮ ಕಿರಣ್ ಅಲ್ಲ. ನಾನೊಬ್ಬ ತಾಯಿ. ಹಾಗಾಗಿಯೇ ನನ್ನ ಮಗುವಿನ ಜತೆ ಕುಳಿತಿದ್ದೇನೆ’ ಎಂದು ನಾಜ್ ವೀಕ್ಷಕರನ್ನು ಉದ್ದೇಶಿಸಿ ಭಾವೋದ್ವೇಗದಿಂದ ಹೇಳಿದ್ದಾರೆ. ಇಂದು ಮಾನವೀಯತೆಗೆ ಅಂತ್ಯಕ್ರಿಯೆ ನಡೆಯುತ್ತಿದೆ ಎಂದು ನಾಜ್ ಹೇಳುತ್ತಿದ್ದರೆ ಆ ಮಾತುಗಳು ಜನರನ್ನು ತೀವ್ರ ಚಿಂತನೆಗೆ ಹಚ್ಚಿವೆ.