ಟೈಮ್ಸ್‌ ಡಿಜಿಟಲ್‌ ಆನ್‌ಲೈನ್‌ ಸಮೀಕ್ಷೆ: ಈಗಲೇ ಚುನಾವಣೆ ನಡೆದರೆ ಮೋದಿಗೆ ಬಹುಮತ

ಹೊಸದಿಲ್ಲಿ: ಇಡೀ ದೇಶದಲ್ಲಿ ಅತ್ಯಂತ ಜನಪ್ರಿಯ ರಾಜಕೀಯ ನಾಯಕ ಯಾರು ಎಂದರೆ ಅದಕ್ಕೆ ಉತ್ತರ ಒಂದೇ – ಪ್ರಧಾನಿ ನರೇಂದ್ರ ಮೋದಿ.

ವಿಜಯ ಕರ್ನಾಟಕ ಡಾಟ್‌ ಕಾಮ್‌ ಸೇರಿದಂತೆ ಟೈಮ್ಸ್ ಸಮೂಹ ಸಂಸ್ಥೆಯ ಹತ್ತು ಸುದ್ದಿ ಜಾಲತಾಣಗಳು 9 ಭಾಷೆಗಳಲ್ಲಿ ಏಕಕಾಲಕ್ಕೆ ನಡೆಸಿದ ಆನ್‌ಲೈನ್ ಸಮೀಕ್ಷೆಯಲ್ಲಿ ಈ ಜನಾಭಿಪ್ರಾಯ ವ್ಯಕ್ತವಾಗಿದೆ.

ನೋಟು ಬ್ಯಾನ್‌, ಜಿಎಸ್‌ಟಿ ಸೇರಿದಂತೆ ಹಲವಾರು ಆರ್ಥಿಕ ಸುಧಾರಣಾ ಕ್ರಮಗಳ ಬಗ್ಗೆ ಜನ ಬೇಸರ ಮಾಡಿಕೊಂಡಿದ್ದಾರೆ ಎಂಬ ವದಂತಿ ಇದ್ದರೂ, ಈಗಲೇ ಚುನಾವಣೆ ನಡೆದರೆ ತಾವು ಮೋದಿಗೇ ಮತ ನೀಡುವುದಾಗಿ ನಾಲ್ಕನೇ ಮೂರಂಶ ಮಂದಿ ಪ್ರತಿಕ್ರಿಯಿಸಿದ್ದಾರೆ.

ಮೂರು ದಿನಗಳ ಕಾಲ (ಡಿಸೆಂಬರ್‌ 12 ರಿಂದ 15ರವರೆಗೆ) ಸರಣಿಯಲ್ಲಿ 16 ಪ್ರಶ್ನೆಗಳನ್ನು ಕೇಳಲಾಗಿತ್ತು. 5 ಲಕ್ಷಕ್ಕೂ ಹೆಚ್ಚು ಆನ್‌ಲೈನ್‌ ಓದುಗರು ತಮ್ಮ ಮತ ಚಲಾಯಿಸಿದ್ದರು.

ಲೋಕಸಭೆಗೆ ಕ್ಷಿಪ್ರ ಚುನಾವಣೆಗಳು ನಡೆದರೆ ಯಾರಿಗೆ ಬೆಂಬಲ ನೀಡುತ್ತೀರಿ ಎಂಬ ಪ್ರಶ್ನೆಗೆ ಶೇಕಡ 79ರಷ್ಟು ಮಂದಿ ಮೋದಿ ಪರ ಮತ ಚಲಾಯಿಸಿದ್ದಾರೆ. ಒಂದು ವೇಳೆ 2019ರಲ್ಲಿ ಚುನಾವಣೆ ನಡೆದರೂ ಮೋದಿಗೇ ಜೈ ಎಂದಿದ್ದಾರೆ ಆನ್‌ಲೈನ್ ಓದುಗರು.

ಪ್ರಧಾನಿ ನರೇಂದ್ರ ಮೋದಿ ಹಾಗೂ ಕಾಂಗ್ರೆಸ್ ನಿಯೋಜಿತ ಅಧ್ಯಕ್ಷ ರಾಹುಲ್ ಗಾಂಧಿ ಜತೆ ನೇರ ಹಣಾಹಣಿ ಏರ್ಪಟ್ಟ ಸಂದರ್ಭದಲ್ಲಿ, ಶೇಕಡ 20ರಷ್ಟು ಮಂದಿ ಮಾತ್ರ ಕಾಂಗ್ರೆಸ್‌ ಹಾಗೂ ರಾಹುಲ್‌ ಗಾಂಧಿ ಪರ ಓಟು ಮಾಡುವುದಾಗಿ ಹೇಳಿದ್ದಾರೆ.

ಆದರೂ, ರಾಹುಲ್ ಗಾಂಧಿಗೂ ಆಶಾವಾದವಿದೆ. ಮತದಾರರೊಂದಿಗೆ ಸಂಪರ್ಕ ಸಾಧಿಸುವ ಅವರ ಪ್ರಯತ್ನಕ್ಕೆ ಆನ್‌ಲೈನ್ ಓದುಗರಿಂದ ಬೆಂಬಲವೂ ವ್ಯಕ್ತವಾಗಿದೆ.

ಶೇಕಡ 58 ಮಂದಿಗೆ ಇನ್ನೂ ರಾಹುಲ್‌ ನಾಯಕತ್ವದ ಬಗ್ಗೆ ವಿಶ್ವಾಸ ಇಲ್ಲ. ಆದರೆ, ಗಾಂಧಿ ಕುಟುಂಬದ ಕುಡಿ ಹೊಸ ಮತದಾರರನ್ನು ಸೆಳೆಯುವಲ್ಲಿ ಯಶಸ್ವಿಯಾಗುತ್ತಿದ್ದಾರೆ ಎಂದು ಶೇಕಡ 34 ಮಂದಿ ಅಭಿಪ್ರಾಯ ವ್ಯಕ್ತಪಡಿಸಿದ್ದಾರೆ.

ಆದರೆ, ಕಾಂಗ್ರೆಸ್‌ಗೆ ಹಿನ್ನಡೆಯುಂಟು ಮಾಡಬಲ್ಲ ವಿಚಾರವೆಂದರೆ, ರಾಹುಲ್‌ ಗಾಂಧಿಗೆ ಅಧ್ಯಕ್ಷ ಪಟ್ಟ ನೀಡಿದ ನಂತರ ಆ ಪಕ್ಷವನ್ನು ಪರ್ಯಾಯ ಪ್ರತಿಪಕ್ಷವಾಗಿ ಪರಿಗಣಿಸುವುದಿಲ್ಲ ಎಂದು ಉತ್ತರಿಸಿದವರ ಸಂಖ್ಯೆ ಶೇಕಡ 73.

ಅಂದರೆ ರಾಹುಲ್‌ ಗಾಂಧಿಗೆ ಪ್ರಮುಖ ಹುದ್ದೆ ನೀಡದಿದ್ದರೆ ಪಕ್ಷ ಅಭಿವೃದ್ಧಿ ಹೊಂದಬಹುದೇ? ಈ ಪ್ರಶ್ನೆಗೂ ಹೆಚ್ಚಿನ ಮತದಾರರ ಉತ್ತರ ನೋ.

ಗಾಂಧಿ ಕುಟುಂಬದ ಕುಡಿ ಬದಲಿಗೆ ಬೇರೆಯವರಿಗೆ ಪಟ್ಟಾಭಿಷೇಕ ಮಾಡಿದರೆ ಕಾಂಗ್ರೆಸ್‌ಗೆ ನಾವು ಮತ ಚಲಾಯಿಸುತ್ತೇವೆ ಎಂದು ಶೇಕಡ 37 ಮಂದಿ ಹೇಳಿದ್ದರೆ, ಗಾಂಧಿ ಕುಟುಂಬದ ಕುಡಿಯೇ ನಮಗೆ ಇರಬೇಕು ಎನ್ನುವವರ ಸಂಖ್ಯೆ ಶೇಕಡ 38.

ಆನ್‌ಲೈನ್‌ ಸಮೀಕ್ಷೆಯಲ್ಲಿ ರಾಹುಲ್‌ ವರ್ಸಸ್ ಮೋದಿ ಬಂದರೆ ಬಹುತೇಕರ ಅಭಿಪ್ರಾಯ ಮೋದಿ ಪರವಾಗಿಯೇ ಇದೆ. ಒಂದು ವೇಳೆ ಮೋದಿ ಪ್ರಮುಖ ಸ್ಥಾನ ಹೊಂದಿರದಿದ್ದರೆ ಬಿಜೆಪಿಗೆ ಮತ ಹಾಕುವುದಿಲ್ಲ ಎಂದು ಹೇಳಿದವರು ಶೇಕಡ 31 ಮಂದಿ. ಇದರರ್ಥ ಬಿಜೆಪಿಯ ಮೂಲ ಬೆಂಬಲ ಮಾತ್ರ ಗಟ್ಟಿಯಾಗಿಯೇ ಇದ್ದು, ಶೇ. 48 ಮಂದಿ ಮೋದಿ ಇದ್ದರೂ ಇಲ್ಲದಿದ್ದರೂ ಬಿಜೆಪಿಗೇ ಮತ ಚಲಾಯಿಸುವುದಾಗಿ ಹೇಳಿದ್ದಾರೆ. ಅದರೆ, ಮೋದಿಯೇ ಬಿಜೆಪಿಯ ಪ್ರಮುಖ ಬ್ರ್ಯಾಂಡ್‌ ಆಗಿದ್ದಾರೆ ಮತ್ತು ಬಿಜೆಪಿ ಬ್ಯಾಂಕ್ ಮತ್ತಷ್ಟು ಗಟ್ಟಿಯಾಗಲು ಸಹಕರಿಸುತ್ತಿದ್ದಾರೆ ಎಂಬ ಅಂಶ ಆನ್‌ಲೈನ್ ಸಮೀಕ್ಷೆಯಲ್ಲಿ ಸ್ಪಷ್ಟವಾಗಿ ತಿಳಿದುಬಂದಿದೆ.

ಟೈಮ್ಸ್ ನೌ ವಾಹಿನಿಯಲ್ಲಿ ಈ ಕುರಿತ ನೇರ ಪ್ರಸಾರದ ಚರ್ಚೆ ನಡೆಯುತ್ತಿದೆ, ವೀಕ್ಷಿಸಿ

ಸಮೀಕ್ಷೆ ನಡೆದ ರೀತಿ: ಡಿಸೆಂಬರ್‌ 12ರಿಂದ 15ರವರೆಗೆ ಸುಮಾರು 72 ಗಂಟೆಗಳ ಕಾಲ ಟೈಮ್ಸ್ ಬಳಗದ 10 ಜಾಲತಾಣಗಳು 9 ಭಾಷೆಗಳಲ್ಲಿ ಆನ್‌ಲೈನ್ ಸಮೀಕ್ಷೆ ನಡೆಸಿತ್ತು. ಪ್ರತಿ ಅಭಿಪ್ರಾಯವನ್ನು ಆಯಾ ರಾಜ್ಯ, ನಗರಕ್ಕೆ ಸಂಬಂಧಿಸಿದಂತೆ ಜಿಯೋ ಟ್ಯಾಗ್ ಮಾಡಲಾಗಿತ್ತು.