ನವದೆಹಲಿ: ಫೆಬ್ರುವರಿ ತಿಂಗಳಿನಲ್ಲಿ ತೈಲ ಬೆಲೆಯಲ್ಲಿ ಎರಡನೇ ಬಾರಿಗೆ ಏರಿಕೆಯಾಗಿದ್ದು, ಪೆಟ್ರೋಲ್‌ ಪ್ರತಿ ಲೀಟರ್‌ಗೆ ರೂ. 3.18 ಹಾಗೂ ಡೀಸೆಲ್‌ ರೂ. 3.09ರಷ್ಟು ತುಟ್ಟಿಯಾಗಿದೆ. ಹೊಸ ದರ ಶನಿವಾರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬಂದಿದೆ.
ಕಳೆದ ಆಗಸ್ಟ್ ನಿಂದ ಪೆಟ್ರೋಲ್‌ ದರವನ್ನು 10 ಸಲ ಪರಿಷ್ಕರಿಸಿ ಒಟ್ಟಾರೆ ಲೀಟರ್‌ಗೆ ರೂ. 17.11 ಇಳಿಸಲಾಗಿತ್ತು. ಡೀಸೆಲ್‌ ದರ ಅಕ್ಟೋಬರ್‌ನಿಂದ ಆರು ಬಾರಿ ಇಳಿಕೆಯಾಗಿದ್ದು, ರೂ. 12.96 ರಷ್ಟು ಕಡಿಮೆಯಾಗಿತ್ತು.
‘ಅಂತರರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ಕಚ್ಚಾ ತೈಲ ದುಬಾರಿಯಾಗಿದೆ. ರೂಪಾಯಿ–ಡಾಲರ್‌ ವಿನಿಮಯ ದರದ ಬದಲಾವಣೆಯೂ ಇದಕ್ಕೆ ಕಾರಣ’ ಎಂದು ಇಂಡಿಯನ್‌ ಆಯಿಲ್‌ ಕಾರ್ಪೊರೇಷನ್‌(ಐಒಸಿ) ತಿಳಿಸಿದೆ.
‘ತೈಲ ಬೆಲೆ ಕಡಿಮೆ ಮಾಡುವ ಅವಕಾಶ ಇತ್ತು. ಆದರೆ ಅಬಕಾರಿ ಸುಂಕವನ್ನು ಸತತ ನಾಲ್ಕು ಬಾರಿ ಏರಿಸಿದ್ದರಿಂದ ಬೆಲೆ ಹೆಚ್ಚಳ ಅನಿವಾರ್ಯವಾಗಿದೆ’ ಎಂದು ಐಒಸಿ ಮೂಲಗಳು ಹೇಳಿವೆ.
ಗಾಯದ ಮೇಲೆ ಉಪ್ಪು ಸವರಿದಂತೆ: ತೈಲ ಬೆಲೆ ಏರಿಕೆಗೆ ತೀಕ್ಷ್ಣವಾಗಿ ಪ್ರತಿಕ್ರಿಯಿಸಿರುವ ಕಾಂಗ್ರೆಸ್‌ ಪಕ್ಷ, ಬಜೆಟ್‌ನಲ್ಲಿನ ಏರಿಕೆಯ ಜತೆಗೆ ಜನಸಾಮಾನ್ಯರ ಗಾಯದ ಮೇಲೆ ಉಪ್ಪು ಸವರಿದಂತೆ ಆಗಿದೆ ಎಂದು ಟೀಕಿಸಿದೆ.
ಪೆಟ್ರೋಲ್‌ , ಡೀಸೆಲ್‌ ದುಬಾರಿ: ಗ್ರಾಹಕನ ಜೇಬಿಗೆ ಕತ್ತರಿ
ಬೆಂಗಳೂರು: ನಗರದಲ್ಲಿ ಶನಿವಾರ ಮಧ್ಯರಾತ್ರಿಯಿಂದಲೇ ಜಾರಿಗೆ ಬರುವಂತೆ ಪೆಟ್ರೋಲ್‌ ದರದಲ್ಲಿ ಪ್ರತಿ ಲೀಟರ್‌ಗೆ ರೂ. 3.37 ಮತ್ತು ಡೀಸೆಲ್‌ ದರ ರೂ. 3.34 ಏರಿಕೆಯಾಗಿದೆ. ನಗರದ ಒಳಭಾಗದ ಬಂಕ್‌ಗಳಲ್ಲಿ ಈ ಹಿಂದೆ ಪೆಟ್ರೋಲ್‌ ದರ ಲೀಟರ್‌ಗೆ ರೂ. 62.81 ಇತ್ತು. ಇದೀಗ ಬೆಲೆ ಏರಿಕೆಯಿಂದ ಪರಿಷ್ಕೃತ ದರ ರೂ. 66.18 ಆಗಿದೆ.
ನಗರದ ಹೊರಭಾಗದ ಬಂಕ್‌ಗಳಲ್ಲಿ ರೂ. 62.26 ಇದ್ದ ಪೆಟ್ರೋಲ್‌ ಬೆಲೆ ಇದೀಗ ರೂ. 65.63ಕ್ಕೆ ಏರಿಕೆಯಾಗಿದೆ. ಅದೇ ರೀತಿ ನಗರದ ಒಳಭಾಗದ ಬಂಕ್‌ಗಳಲ್ಲಿ ಪ್ರತಿ ಲೀಟರ್‌ಗೆ ರೂ. 50.72 ಇದ್ದ ಡೀಸೆಲ್‌ ದರ ಈಗ ರೂ. 54.06ಕ್ಕೆ ಏರಿಕೆಯಾಗಿದೆ. ಹೊರಭಾಗದ ಬಂಕ್‌ಗಳಲ್ಲಿ ರೂ. 50.67 ಇದ್ದ ಡೀಸೆಲ್‌ ಬೆಲೆ ಇದೀಗ ರೂ. 54.01 ಆಗಿದೆ.
ಆಟೊ ಎಲ್‌ಪಿಜಿ ದರ ಪ್ರತಿ ಲೀಟರ್‌ಗೆ ರೂ. 1.91 ಹೆಚ್ಚಳವಾಗಿದೆ. ಈ ಹಿಂದೆ ರೂ. 37.69 ಇದ್ದ ಆಟೊ ಎಲ್‌ಪಿಜಿ ದರ ಈಗ ರೂ. 39.60 ಆಗಿದೆ.
