ಬರ್ನ್‌/ನವದೆಹಲಿ: ವಿದೇಶಗಳಲ್ಲಿನ ಕಪ್ಪು ಹಣವನ್ನು ಸ್ವದೇಶಕ್ಕೆ ತರಲು ಯತ್ನಿಸುತ್ತಿರುವ ಭಾರತದ ಪ್ರಯತ್ನಗಳು ಸದ್ಯಕ್ಕೆ ಕೈಗೂಡುವ ಲಕ್ಷಣಗಳು ಕಾಣುತ್ತಿಲ್ಲ. ತನ್ನ ಪ್ರಜೆಗಳು ಸ್ವಿಟ್ಜರ್‌ಲೆಂಡ್‌ ಬ್ಯಾಂಕು-ಗಳಲ್ಲಿ ಹೊಂದಿರುವ ಖಾತೆಗಳ ವಿವರ ಪಡೆದುಕೊಳ್ಳುವುದಕ್ಕೆ ‘ಅನಿರ್ಬಂಧಿತ ಮಾಹಿತಿ ವಿನಿಮಯ ವ್ಯವಸ್ಥೆ’ಯಡಿ ೨೦೧೮ರವರೆಗೆ ಕಾಯಬೇಕಾಗುತ್ತದೆ.
ತೆರಿಗೆ ತಪ್ಪಿಸಿಕೊಳ್ಳುವಿಕೆ ಹಾಗೂ ವಂಚನೆಯ ವಿರುದ್ಧದ ಹೋರಾಟದಲ್ಲಿ ಪರಸ್ಪರ ನೆರವು ನೀಡುವುದಕ್ಕಾಗಿ ಅಂತರರಾಷ್ಟ್ರೀಯ ಸಂಸ್ಥೆಯಾದ ಒಇಸಿಡಿ, ‘ಅನಿರ್ಬಂಧಿತ ಮಾಹಿತಿ ವಿನಿಮಯ’ ವ್ಯವಸ್ಥೆ ರೂಪಿಸಿದೆ.
ಭಾರತ ಸೇರಿದಂತೆ ೪೦ಕ್ಕೂ ಹೆಚ್ಚು ದೇಶಗಳು ಈ ವ್ಯವಸ್ಥೆ ಜಾರಿಗೆ ಬಂದ ತಕ್ಷಣವೇ ಮೊದಲ ಹಂತದಲ್ಲಿ ಪರಸ್ಪರ ಮಾಹಿತಿ ವಿನಿಮಯ ಮಾಡಿಕೊಳ್ಳಲಿವೆ. ಈ ದೇಶಗಳು ೨೦೧೬ರಿಂದ ಮಾಹಿತಿ ಸಂಗ್ರಹಿಸಲು ಉದ್ದೇಶಿಸಿವೆ. ೨೦೧೭ರ ಸೆಪ್ಟೆಂಬರ್‌ನಲ್ಲಿ ಮಾಹಿತಿ ವಿನಿಮಯ ಪ್ರಕ್ರಿಯೆ ಆರಂಭಿಸಲಿವೆ ಎಂದು ಸ್ವಿಟ್ಜರ್‌ಲೆಂಡ್‌ ಸರ್ಕಾರದ ನೂತನ ವರದಿ ತಿಳಿಸಿದೆ.
೫೮ ದೇಶಗಳು ೨೦೧೭ ರಲ್ಲಿ ಹಾಗೂ ೩೫ ದೇಶಗಳು ೨೦೧೮ರಲ್ಲಿ ಮೊದಲ ಬಾರಿಗೆ ಮಾಹಿತಿ ವಿನಿಮಯ ಮಾಡಿಕೊಳ್ಳಲಿವೆ ಎಂದು
ವರದಿ ಹೇಳಿದೆ. ಭಾರತವು ೨೦೧೭ರ ಮೊದಲ ವಿನಿಮಯ ಗುಂಪಿನಲ್ಲಿದ್ದರೂ ಸ್ವಿಟ್ಜರ್‌ಲೆಂಡ್‌ನಿಂದ ಮಾಹಿತಿ ಪಡೆಯುವುದಕ್ಕೆ ೨೦೧೮ರವರೆಗೆ ಕಾಯಬೇಕು. ಸ್ವಿಟ್ಜರ್‌ಲೆಂಡ್‌ ೨೦೧೮ನೇ ವರ್ಷದ ಪಟ್ಟಿಯಲ್ಲಿ ಇರುವುದೇ ಇದಕ್ಕೆ ಕಾರಣ.
ವಿನಿಮಯ ಪ್ರಕ್ರಿಯೆ: ಯಾವುದೇ ಒಂದು ದೇಶದ ವ್ಯಕ್ತಿ ಇನ್ನೊಂದು ದೇಶದಲ್ಲಿ ಬ್ಯಾಂಕ್‌\ ಖಾತೆ ಹೊಂದಿದ್ದರೆ ಆ ಬ್ಯಾಂಕ್‌ ಮೊದಲು ತನ್ನ ದೇಶದ ಸಂಬಂಧಪಟ್ಟ ಅಧಿಕಾರಿಗಳಿಗೆ ಆತನ ಖಾತೆ ವಿವರಗಳನ್ನು ನೀಡುತ್ತದೆ. ನಂತರದಲ್ಲಿ ಈ ಅಧಿಕಾರಿಗಳು ಆ ವ್ಯಕ್ತಿಯ ದೇಶಕ್ಕೆ ಮಾಹಿತಿಯನ್ನು ರವಾನಿಸುತ್ತಾರೆ.
ಈ ವ್ಯವಸ್ಥೆಯ ಅಡಿಯಲ್ಲಿ ಬ್ಯಾಂಕ್‌ ಖಾತೆ ಸಂಖ್ಯೆ, ಹೆಸರು, ವಿಳಾಸ, ಹುಟ್ಟಿದ ದಿನಾಂಕ, ತೆರಿಗೆ ಗುರುತು ಸಂಖ್ಯೆ, ಬಡ್ಡಿ, ಲಾಭಾಂಶ… ಇತ್ಯಾದಿ ಮಾಹಿತಿಗಳನ್ನು ಹಂಚಿಕೊಳ್ಳಬಹುದು.
ತನಿಖೆಯಲ್ಲಿ ಸಿಇಐಬಿ
ಕಪ್ಪು ಹಣದ ತನಿಖೆ ಚುರುಕುಗೊಳಿಸುವ ಸಲುವಾಗಿ ವಿಶೇಷ ತನಿಖಾ ತಂಡವು ಕೇಂದ್ರೀಯ ಆರ್ಥಿಕ ಗುಪ್ತದಳದ (ಸಿಇಐಬಿ) ನೆರವು ಪಡೆಯುತ್ತಿದೆ. ವಿಶೇಷ ತನಿಖಾ ತಂಡದಲ್ಲಿರುವ (ಎಸ್‌ಐಟಿ) ಎಲ್ಲ ತನಿಖಾ ಹಾಗೂ ಜಾರಿ ಸಂಸ್ಥೆಗಳ ನಡುವೆ ಪ್ರಮುಖ ಸಂಯೋಜಕ ಸಂಸ್ಥೆಯಾಗಿ ಸಿಇಐಬಿ ಕೆಲಸ ಮಾಡಲಿದೆ.
