ಮಂಗಳೂರು,ನ.29 : ಇದು ರಾಜ್ಯದ ಎರಡನೇ ಅತಿ ದೊಡ್ಡ ವಿಜ್ಞಾನ ಕೇಂದ್ರ. ಸ್ವಚ್ಛಂದ, ಪ್ರಶಾಂತ ವಾತಾವರಣದಲ್ಲಿ ಸುಮಾರು 8.50 ಕೋಟಿ ವೆಚ್ಚದಲ್ಲಿ ನಿರ್ಮಾಣಗೊಂಡ ಈ ಕೇಂದ್ರಕ್ಕೆ ಒಮ್ಮೆ ಭೇಟಿ ಕೊಟ್ಟರೆ ಸಾಕು, ಕಲಿಕೆಯ ಆಸಕ್ತಿಗೆ ಹೊಸ ಮುನ್ನುಡಿ ಸಿಗುತ್ತದೆ, ವಿಜ್ಞಾನದ ಆಸಕ್ತಿ ತನ್ನಿಂತಾನೆ ತೆರೆದುಕೊಳ್ಳುತ್ತದೆ, ವಿಶ್ವದ ಕಡೆಗೊಂದು ಕೌತುಕ, ಅದನ್ನು ತಿಳಿಯುವ ಕುತೂಹಲ ಮತ್ತಷ್ಟು ಹೆಚ್ಚುತ್ತದೆ. ಉತ್ಸಾಹದಿಂದ ಪ್ರತಿಯೊಂದನ್ನು ಕೂಲಂಕಷವಾಗಿ ತಿಳಿಯುತ್ತ ಸಾಗುತ್ತಿದ್ದರೆ ಮೂರು ಗಂಟೆ ಕಳೆದದ್ದೇ ಗೊತ್ತಾಗುವುದಿಲ್ಲ.
ಕೆಂಪು ಕಲ್ಲಿನಿಂದ ಸುಂದರವಾಗಿ ಕಟ್ಟಿದ ಗೋಡೆಗಳು, ಹೆಂಚಿನ ಚಾವಣಿ ಶೋಭಿಸುವ ಆಕರ್ಷಕ ಕಟ್ಟಡ, ಅದರ ಎದುರಿರುವ ವಿಜ್ಞಾನ ಪಾರ್ಕ್ ದೂರದಿಂದಲೇ ಆಪ್ಯಾಯಮಾನವಾಗಿ ಸ್ವಾಗತಿಸುತ್ತದೆ. ಅದನ್ನು ದಾಟಿ ಒಳಹೋದಂತೆ ಅಲ್ಲಿ ತಂತ್ರಜ್ಞಾನ ಪ್ರದರ್ಶನಾಲಯ, ಮಹಾನಗರದ ಕಲ್ಪನೆ, ಮೆಟ್ರೋ ರೈಲು, ಅಂತರಿಕ್ಷಣ ಪ್ರಯಾಣ, ಪಶ್ಚಿಮಘಟ್ಟಗಳ ಜೀವ ವೈವಿಧ್ಯತೆ, ಮೋಜಿನ ವಿಜ್ಞಾನ, ವಿಜ್ಞಾನ ಪಾರ್ಕ್ ಸೇರಿದಂತೆ ಕೌತುಕಗಳು ತೆರೆದುಕೊಳ್ಳುತ್ತಾ ಹೋಗುತ್ತವೆ. ಜನ ಸಾಮಾನ್ಯರಲ್ಲೂ ವಿಜ್ಞಾನ ಚಟುವಟಿಕೆ ಕಡೆಗೆ ಸೆಳೆಯುತ್ತದೆ.
ತಂತ್ರಜ್ಞಾನದ ಕ್ಷೇತ್ರದ ಸಾರಿಗೆ, ಮಾಹಿತಿ ಮತ್ತು ತಂತ್ರಜ್ಞಾನ, ಬಾಹ್ಯಾಕಾಶ, ಜೈವಿಕ ತಂತ್ರಜ್ಞಾನ, ನ್ಯಾನೋ ತಂತ್ರಜ್ಞಾನ, ಕೃಷಿ ಇವೆಲ್ಲವನ್ನು ವಿಭಿನ್ನವಾಗಿ ವಿನ್ಯಾಸಗೊಳಿಸಲಾಗಿದೆ. ನಗರ ಕಲ್ಪನೆ, ಜಿಪಿ(ಗ್ಲೋಬಲ್ ಪೊಜಿಷನಿಂಗ್) ಸಿಸ್ಟಂ ಬಗ್ಗೆ ಮಾಹಿತಿ, ಜಲವಿದ್ಯುತ್ ಶಕ್ತಿ, ಸೌರವಿದ್ಯುತ್ ಶಕ್ತಿ, ವಿಂಡ್ ಪವರ್ ಬಗ್ಗೆ ಸಂಪೂರ್ಣವಾಗಿ ತಿಳಿದುಕೊಳ್ಳುವ ವ್ಯವಸ್ಥೆ ಇದೆ. ಇಂಧನ ಕೋಶಗಳು ಮತ್ತು ಸೌರಫಲಕಗಳಿಂದ ಭವಿಷ್ಯದ ಕಾರಿನ ಚಲನೆ, ಹೈಬ್ರಿಡ್ ಕಾರು ವಿನ್ಯಾಸ, ಚಲಿಸುವ ಮೆಟ್ರೋ ರೈಲು ಕಲ್ಪನೆಯೂ ಇಲ್ಲಿದೆ. ಎಂಆರ್ಐ ಸ್ಕ್ಯಾನ್ ಮತ್ತು ಎಂಡೋಸ್ಕೋಪಿಯಲ್ಲಿನ ಇತ್ತೀಚಿನ ಬೆಳವಣಿಗೆಗಳನ್ನು ಸ್ಥೂಲವಾಗಿ ಪರಿಚಯಿಸುವ ಪ್ರಯತ್ನ ಮಾಡಲಾಗಿದೆ. ಆಯಸ್ಕಾಂತದ ಚಲನೆಗೆ ಅನುಗುಣವಾಗಿ ಚಲಿಸುವ ಪ್ರದರ್ಶಿಕೆಗಳು ಇದೆ.
ಸುಮಾರು 550 ಚದರ ಮೀಟರ್ ವಿಸ್ತೀರ್ಣದಲ್ಲಿರುವ ಮೋಜಿನ ವಿಜ್ಞಾನ ಪ್ರದರ್ಶನಾಲಯದಲ್ಲಿ ಆಸಕ್ತಿಯನ್ನು ಕೆರಳಿಸುವ ವಿಜ್ಞಾನ ಮಾದರಿ ಆಟಿಕೆಗಳು ಇದೆ. ವಿದ್ಯಾರ್ಥಿಗಳನ್ನು ಅನ್ವೇಷಣೆ ಮತ್ತು ಪ್ರಯೋಗದತ್ತಕ್ಕೆ ಆಕರ್ಷಿಸಬಲ್ಲ ಹಲವಾರು ಪ್ರದರ್ಶಿಕೆಗಳಿವೆ. ಪ್ರವಾಸಿಗರಿಗೆ, ವಿದ್ಯಾರ್ಥಿಗಳಿಗೆ ಇದು ಮನೋರಂಜನೆಯ ಮೂಲಕ ವಿಜ್ಞಾನ ಕಲಿಕೆಗೆ ಪ್ರೇರಣೆ ನೀಡುತ್ತದೆ.
ವಿಜ್ಞಾನ ಕೇಂದ್ರದ ಹೊರಗೆ ಸುಂದರ ವಾತಾವರಣದಲ್ಲಿ ಈ ಪಾರ್ಕ್ ಇದೆ. ಇಲ್ಲಿ ಮಕ್ಕಳಿಗೆ ಆಟವಾಡುತ್ತಲೇ ವಿಜ್ಞಾನ ಕಲಿಯಬಹುದು. ಒಂದು ಮೂಲೆಯಲ್ಲಿರುವ ಶಿಲಾಬಾಲಿಕೆಯಲ್ಲಿ ಮಾತನಾಡಿದಾಗ ಮತ್ತೊಂದು ಮೂಲೆಯ ಶಿಲಾಬಾಲಿಕೆಯಲ್ಲಿ ಕೇಳುತ್ತದೆ. ನಳ್ಳಿ ವ್ಯವಸ್ಥೆಯೇ ಇಲ್ಲದ ಟ್ಯಾಪ್ನಲ್ಲಿ ನೀರು ಹರಿಸುವ ಕಲ್ಪನೆ, ಸುರಂಗದೊಳಗೆ ಸ್ವರ ವೈವಿಧ್ಯ, ಆಟಿಕೆ ವಸ್ತುಗಳು ತುಂಬಾ ಚೆನ್ನಾಗಿದೆ. ಪ್ರತಿಯೊಂದರಲ್ಲೂ ವಿಜ್ಞಾನ ಅಡಗಿದೆ ಎಂದು ಇಲ್ಲಿನ ಆಟಿಕೆಗಳು ಸಾಬೀತುಪಡಿಸುತ್ತದೆ.
ವಿದೇಶದಲ್ಲಿ ಆನ್ಲೈನ್ ಬುಕ್ಕಿಂಗ್ !: ಭಾರತೀಯರು ವಿಜ್ಞಾನಕ್ಕೆ ಒತ್ತು ಕೊಡಬೇಕು. ಅದರಲ್ಲೂ ಕರಾವಳಿ ಜನರು ಬುದ್ಧಿವಂತರು, ಇಲ್ಲೇ ಶಿಕ್ಷಣದ ಹಬ್ ಇದೆ. ಆದರೂ ಅಭಿವೃದ್ಧಿ ಹೊಂದಿದ ದೇಶಕ್ಕೆ ಹೋಲಿಕೆ ಮಾಡಿದಾಗ ನಾವಿನ್ನೂ ತುಂಬಾ ಹಿಂದೆ ಇದ್ದೇವೆ. ಅಭಿವೃದ್ಧಿ ಹೊಂದಿದ ದೇಶಗಳಲ್ಲಿ ವಿಜ್ಞಾನ ಕೇಂದ್ರಗಳಿಗೆ ಜನ ‘ಆನ್ಲೈನ್ನಲ್ಲಿ ಬುಕ್ಕಿಂಗ್’ ಮಾಡಿ ಹೋಗುವಂತಹ ಪರಿಸ್ಥಿತಿ. ಅದಕ್ಕೂ ವಾರಗಟ್ಟಲೆ ಕಾಯಬೇಕು. ಯಾವಾಗಲೂ ಅಷ್ಟು ಜನಸಂದಣಿಯಿಂದ ಕೂಡಿರುತ್ತದೆ. ಆ ದೇಶದಲ್ಲಿ ವಿದ್ಯಾರ್ಥಿಗಳು-ಪೋಷಕರು ವಿಜ್ಞಾನದ ಬಗ್ಗೆ ತಿಳಿಯಲು ಅಷ್ಟು ಉತ್ಸುಕರಾಗಿದ್ದಾರೆ ಎನ್ನುತ್ತಾರೆ ಪಿಲಿಕುಳ ಪ್ರಾದೇಶಿಕ ವಿಜ್ಞಾನ ಕೇಂದ್ರದ ನಿರ್ದೇಶಕ ಕೆ.ವಿ. ರಾವ್. ವಿದೇಶಕ್ಕೆ ಹೋಲಿಕೆ ಮಾಡಿದರೆ ನಮ್ಮ ದೇಶದಲ್ಲಿ ವಿಜ್ಞಾನದ ಬಗ್ಗೆ ಆಸಕ್ತಿ ಸಾಲದು. ರಜಾದಿನಗಳಲ್ಲಿ ಶಾಂಪಿಂಗ್ ಮಾಲ್ ಸಂಸ್ಕೃತಿ ಹೆಚ್ಚಾಗಿದೆ. ಇದಕ್ಕಿಂತಲ್ಲೂ ವಿದ್ಯಾರ್ಥಿ ಜೀವನದಲ್ಲಿ ಅವರಿಗೆ ಇಂತಹ ವಿಜ್ಞಾನ ಕೇಂದ್ರಗಳಿಗೆ ಹೋಗುವ ಪರಿಪಾಠ ಬೆಳೆಸಬೇಕು. ಇಲ್ಲಿ ಆಟದೊಂದಿಗೆ ವಿಜ್ಞಾನದ ಪಾಠ ಹೇಳಿಕೊಡಲಾಗುತ್ತದೆ ಎನ್ನುತ್ತಾರೆ ರಾವ್.
ಟಿಕೆಟ್ ದರ: ಶಿಕ್ಷಣ ಸಂಸ್ಥೆ ಮುಖಾಂತರ ಹೋಗುವವರು ಮೊದಲೇ ಬುಕ್ಕಿಂಗ್ ಮಾಡಬೇಕು. ಟಿಕೆಟ್ ದರ ಸಾರ್ವಜನಿಕರಿಗೆ 15 ರೂ., ಮಕ್ಕಳಿಗೆ 5 ರೂ., ಶಾಲೆಯಿಂದ ಬರುವ ವಿದ್ಯಾರ್ಥಿಗಳಿಗೆ 3 ರೂ., 3ಡಿ ಪ್ರದರ್ಶನಕ್ಕೆ ಸಾರ್ವಜನಿಕರಿಗೆ 10ರೂ., ಮಕ್ಕಳಿಗೆ 5ರೂ., ಶಾಲೆಯಿಂದ ಬರುವ ವಿದ್ಯಾರ್ಥಿಗಳಿಗೆ 3 ರೂ. ತಾರಾಮಂಡಲ ಪ್ರದರ್ಶನಕ್ಕೆ ಮಕ್ಕಳಿಗೆ, ವಿದ್ಯಾರ್ಥಿಗಳಿಗೆ ಯಾವುದೇ ಶುಲ್ಕವಿಲ್ಲ. ಹೋಗುವ ಮುನ್ನ ಗಮನಿಸಿ…: ಇದು ರಾಜ್ಯದ 2ನೇ ಪ್ರಾದೇಶಿಕ ವಿಜ್ಞಾನ ಕೇಂದ್ರ. ಅತಿದೊಡ್ಡ, ವ್ಯವಸ್ಥಿತ ವಿಜ್ಞಾನ ಕೇಂದ್ರ. ವಿಜ್ಞಾನ ಕೇಂದ್ರಕ್ಕೆ ಹೋಗುವಾಗ ಚಿಕ್ಕಮಕ್ಕಳು ಬೇಡ. ಸಾವಕಾಶವಾಗಿ ಹೋಗಿ ಪ್ರತಿಯೊಂದನ್ನು ಸೂಕ್ಷ್ಮವಾಗಿ ವೀಕ್ಷಿಸಿ. ಕನಿಷ್ಠ 2 ಗಂಟೆಯಾದರೂ ಮೀಸಲಿಡಿ ಶಾಲೆಗಳು ಇದನ್ನು ಪ್ರಮುಖ ತಾಣವಾಗಿ ಗುರುತಿಸಬೇಕು, ಅವಸರದಲ್ಲಿ ಬಂದು ಹೋದರೆ ಏನೂ ಪ್ರಯೋಜನವಿಲ್ಲ ಹೈಸ್ಕೂಲ್, ಪಿಯುಸಿ, ಕಾಲೇಜು, ತಾಂತ್ರಿಕ ವಿದ್ಯಾರ್ಥಿಗಳಿಗೆ ತಮ್ಮ ಭವಿಷ್ಯ ಮತ್ತು ಪ್ರತಿಭೆ ಮನದಟ್ಟು ಮಾಡಲು ಹೇಳಿ ಮಾಡಿದಂತಹ ಕೇಂದ್ರ ಬೆಳಗ್ಗೆ 10ರಿಂದ ಸಂಜೆ 5.30ರವರೆಗೆ ವಿಜ್ಞಾನಕೇಂದ್ರ ಸಾರ್ವಜನಿಕರ ವೀಕ್ಷಣೆಗೆ ಲಭ್ಯ
ಇನ್ನೇನಿದೆ ಇಲ್ಲಿ…: ವಿಜ್ಞಾನದ ಬಹುತೇಕ ಕೊಠಡಿಗಳು ಹವಾನಿಯಂತ್ರಿತ. ಪ್ರಯೋಗಗಳ ಪ್ರತ್ಯಕ್ಷ ದರ್ಶನ ‘ವಿಜ್ಞಾನ ಪ್ರಾತ್ಯಕ್ಷಿಕೆ’ ನಾನಾ ಸಮಸ್ಯಾತ್ಮಕ ವಿಜ್ಞಾನ ಆಟಿಕೆಗಳ ಮೂಲಕ ಸರಳ ಪ್ರಯೋಗ ಇರುವ ಮಕ್ಕಳ ವಿಭಾಗ. ಅಂತರ್ಜಾಲ, ಬಹುಮಾಧ್ಯಮ ಕಲಿಕಾ ವಿಧಾನಗಳ ಅನಾವರಣ ಮತ್ತು ಕಂಪ್ಯೂಟರ್ ಕೊಠಡಿ.