ವಾಷಿಂಗ್ಟನ್ / ತೆಹ್ರಾನ್ / ಬಾಗ್ದಾದ್: ಇರಾನ್ ಸೇನಾ ಮುಖ್ಯಸ್ಥರ ಹತ್ಯೆ ಬಳಿಕ ಉಂಟಾಗಿರುವ ಮಧ್ಯಪ್ರಾಚ್ಯ ಬಿಕ್ಕಟ್ಟಿನ ಹಿನ್ನೆಲೆಯಲ್ಲಿ, ಅಮೆರಿಕ ಪಡೆಗಳು ದೇಶ ತೊರೆಯಬೇಕೆಂಬ ಇರಾಕ್ ಸಂಸತ್ತಿನ ನಿರ್ಣಯಕ್ಕೆ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಸಡ್ಡು ಹೊಡೆದಿದ್ದಾರೆ. ಒಂದು ವೇಳೆ ಅಮೆರಿಕ ಪಡೆಗಳನ್ನು ಬಲವಂತದಿಂದ ಹೊರಹಾಕಿದರೆ, ಇರಾಕ್ ಮೇಲೆ ಹಿಂದೆಂದೂ ಕಂಡಿರದಂತಹ ನಿರ್ಬಂಧ ಹೇರುತ್ತೇವೆ ಎಂದು ಎಚ್ಚರಿಸಿದ್ದಾರೆ.
ಒಂದು ವೇಳೆ ಅಮೆರಿಕದ ಸೇನಾ ಪಡೆಗಳು ಇರಾಕ್ ತೊರೆಯಬೇಕೆಂದರೆ, ಅಲ್ಲಿನ ಅನ್ಬರ್ ಪ್ರಾಂತ್ಯದಲ್ಲಿರುವ ಮಿಲಿಟರಿ ವಾಯುನೆಲೆಗೆ ಅಮೆರಿಕ ಮಾಡಿರುವ ಖರ್ಚು ವೆಚ್ಚಗಳನ್ನು ಇರಾಕ್ ಭರಿಸಿಕೊಡಬೇಕು ಎಂದು ಹೇಳಿದ್ದಾರೆ.
‘‘ಇರಾಕ್ನಲ್ಲಿ ನಾವು ಅತ್ಯಾಧುನಿಕ ಮತ್ತು ಅತಿ ದುಬಾರಿ ವಾಯುನೆಲೆಯನ್ನು ನಿರ್ಮಿಸಿದ್ದೇವೆ. ಅದನ್ನು ನಿರ್ಮಿಸಲು ನೂರಾರು ಕೋಟಿ ಹಣವನ್ನು ಅಮೆರಿಕ ಸರಕಾರ ವ್ಯಯಿಸಿದೆ. ಇದನ್ನು ಮರುಪಾವತಿಸದೇ ನಮ್ಮ ಪಡೆಗಳು ಇರಾಕ್ ತೊರೆಯುವ ಮಾತೇ ಇಲ್ಲ. ಒಂದು ವೇಳೆ ಸ್ನೇಹ ಪೂರ್ವಕವಲ್ಲದ ನಡೆ ಅನುಸರಿಸಿ ಅಮೆರಿಕ ಪಡೆಗಳನ್ನು ಇರಾಕ್ನಿಂದ ಹೊರ ಹಾಕಿದ್ದಾದರೆ, ಅತ್ಯಂತ ಕಠಿಣ ನಿರ್ಬಂಧವನ್ನು ಇರಾಕ್ ಮೇಲೆ ಹೇರಬೇಕಾಗುತ್ತದೆ. ಅದು ಸ್ವಲ್ಪ ಮಟ್ಟಿಗೆ ಇರಾನ್ ಮೇಲಿನ ನಿರ್ಬಂಧದಂತೇ ಇರುತ್ತದೆ,’’ಎಂದು ಟ್ರಂಪ್ ಗುಡುಗಿದ್ದಾರೆ.
ಟ್ರಂಪ್ ಅಧಿಕಾರಕ್ಕೆ ಅಂಕುಶ?
ಇರಾನ್ ಮೇಲೆ ಯುದ್ಧ ಹೂಡುವ ಸಂಬಂಧ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರ ಅಧಿಕಾರವನ್ನು ಮೊಟುಕುಗೊಳಿಸಲು ಪ್ರತಿಪಕ್ಷಗಳು ಮುಂದಾ ಗಿವೆ. ಈ ಸಂಬಂಧ ನಿರ್ಣಯವನ್ನು ಅಮೆರಿಕದ ಜನಪ್ರತಿನಿಧಿಗಳ ಸಭೆಯಲ್ಲಿ ಮುಂದಿನ ವಾರ ಮಂಡಿಸಲು ತೀರ್ಮಾನಿಸಲಾಗಿದೆ. ಜನಪ್ರತಿನಿಧಿ ಸಭೆಯ ಸ್ಪೀಕರ್ ನ್ಯಾನ್ಸಿ ಪೆಲೋಪ್ಸಿ ಅವರು ಈ ವಿಷಯ ಖಚಿತಪಡಿಸಿದ್ದಾರೆ. ಇರಾನ್ ಮೇಲೆ ದಾಳಿ ನಡೆಸುವ ಮುನ್ನ ಪ್ರತಿಪಕ್ಷ ಡೆಮಾಕ್ರಟರನ್ನು ವಿಶ್ವಾಸಕ್ಕೆ ತೆಗೆದುಕೊಳ್ಳದ ಟ್ರಂಪ್ ನಡೆಯಿಂದ ಆಕ್ರೋಶ ಗೊಂಡು ಪ್ರತಿಪಕ್ಷ ನಾಯಕರು ಈ ನಡೆಗೆ ಮುಂದಾಗಿದ್ದಾರೆ.
ಪರಮಾಣು ಒಪ್ಪಂದ ರದ್ದು: ಅಮೆರಿಕ ದಾಳಿ ಬಳಿಕ ಯುದ್ಧ ಭೀತಿ ತೀವ್ರಗೊಂಡ ಬೆನ್ನಲ್ಲೇ, ಇರಾನ್ 2015ರಲ್ಲಿ ತಾನು ಸಹಿ ಮಾಡಿದ ಪರಮಾಣು ಒಪ್ಪಂದದಿಂದ ಹೊರಬರುವುದಾಗಿ ಘೋಷಿಸಿದೆ. ಈ ಒಪ್ಪಂದಕ್ಕೆ ಸಹಿ ಹಾಕುವ ಮೂಲಕ ಯುರೇನಿಯಂ ಉತ್ಪಾದನೆ ಮತ್ತು ಯುರೇನಿಯಂ ಸಾಮರ್ಥ್ಯ ಹೆಚ್ಚಳಕ್ಕೆ ಇರಾನ್ ನಿರ್ಬಂಧ ವಿಧಿಸಿಕೊಂಡಿತ್ತು. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಕಳೆದ ವರ್ಷವೇ ಈ ಒಪ್ಪಂದದಿಂದ ಹೊರಬಂದಿದ್ದರು. ಈಗ ಇರಾನ್ ಸಹ ಹೊರನಡೆದಿರುವುದು ಜಾಗತಿಕ ಮಟ್ಟದಲ್ಲಿ ಆತಂಕ ಮೂಡಿಸಿದೆ.
ಈ ಮಧ್ಯೆ, ಜರ್ಮನಿ, ಫ್ರಾನ್ಸ್ ಮತ್ತು ಬ್ರಿಟನ್ ಸೇರಿದಂತೆ ಹಲವು ದೇಶಗಳು ಈ ಒಪ್ಪಂದದಿಂದ ಹೊರಬರುವ ನಿರ್ಧಾರ ಮರುಪರಿಶೀಲನೆ ಮಾಡುವಂತೆ ಇರಾನ್ಗೆ ಮನವಿ ಮಾಡಿವೆ.
ನ್ಯಾಟೊ ರಾಯಭಾರಿಗಳ ಸಭೆ: ಇರಾನ್ ಬಿಕ್ಕಟ್ಟಿನ ಬಗ್ಗೆ ಚರ್ಚಿಸಲು ನ್ಯಾಟೊ ದೇಶಗಳ ರಾಯಭಾರಿಗಳು ಸೋಮವಾರ ಸಭೆ ನಡೆಸಿದ್ದಾರೆ. ಇರಾಕ್ನಲ್ಲಿರುವ ಅಮೆರಿಕ ಪಡೆಗಳು ನ್ಯಾಟೊನ ಭಾಗವೇ ಆಗಿದ್ದು, ಅಲ್ಲಿನ ಸ್ಥಳೀಯ ಯೋಧರಿಗೆ ತರಬೇತಿ ನೀಡುವ ಮತ್ತು ಐಸಿಸ್ ಉಗ್ರರ ವಿರುದ್ಧ ಹೋರಾಟ ನಡೆಸುವ ಉದ್ದೇಶಕ್ಕಾಗಿ ಅಲ್ಲಿ ನಿಯೋಜನೆಗೊಂಡಿವೆ. ಅಮೆರಿಕ ಪಡೆಗಳನ್ನು ಹೊರಹಾಕುವುದಾಗಿ ಇರಾಕ್ ಘೋಷಿಸಿರುವ ಹಿನ್ನೆಲೆಯಲ್ಲಿಈ ಸಭೆ ಮಹತ್ವ ಪಡೆದಿದೆ.
Comments are closed.