ಜಿಯೋಗೆ ಸೆಡ್ಡು ಹೊಡೆದ ಏರ್‌ಟೆಲ್

ಇಂಟರ್‌ನೆಟ್ ಮಾರುಕಟ್ಟೆಯಲ್ಲಿ ಸಂಚಲನ ಮೂಡಿಸಿರುವ ರಿಲಯನ್ಸ್ ಜಿಯೋ ಗಿಗಾಫೈಬರ್ ಪ್ರವೇಶದ ಬೆನ್ನಲ್ಲೇ ಏರ್‌ಟೆಲ್ ಸ್ಪರ್ಧೆಗೆ ಸಿದ್ಧವಾಗಿದೆ.

ಸೋಮವಾರ ಏರ್‌ಟೆಲ್ ದೇಶದಲ್ಲಿ ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಸೇವೆಗಳಿಗೆ ಚಾಲನೆ ನೀಡಿದೆ.

ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಸೇವೆಗಳು ಲೈವ್ ಟಿವಿ, ವೀಡಿಯೋ, ಮ್ಯೂಸಿಕ್, ನ್ಯೂಸ್ ಮತ್ತು ಸ್ಪೋರ್ಟ್ಸ್ ಹಾಗೂ ಇತರ ಮಾಹಿತಿ, ಮನರಂಜನೆ ಸೇವೆಗಳನ್ನು ಒಟಿಟಿ ಸ್ಮಾರ್ಟ್ ಸ್ಟಿಕ್ ಮತ್ತು ಇಂಟರ್‌ನೆಟ್ ಆಧಾರಿತ ಸೆಟಪ್ ಬಾಕ್ಸ್ ಮೂಲಕ ಒದಗಿಸಲಿದೆ.

ಏರ್‌ಟೆಲ್ ಸೆಟಪ್‌ ಬಾಕ್ಸ್ ಕ್ರೋಮ್‌ಕಾಸ್ಟ್ ಹೊಂದಿದ್ದು, ರಿಲಯನ್ಸ್ ಜಿಯೋ ಗಿಗಾಫೈಬರ್‌ಗೆ ನೇರ ಸ್ಪರ್ಧೆ ಒಡ್ಡಲಿದೆ.

ಜಿಯೋಗೆ ಸ್ಪರ್ಧೆ
ರಿಲಯನ್ಸ್ ಜಿಯೋ ಮಾದರಿಯಲ್ಲಿಯೇ ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಸೇವೆಗಳು ಟಿವಿ ಚಾನಲ್, ಸಂಗೀತ, ಸಿನಿಮಾ ಸಹಿತ ವಿವಿಧ ಸೇವೆಗಳನ್ನು ಒದಗಿಸುತ್ತದೆ. ಟಿವಿ, ಕಂಪ್ಯೂಟರ್ ಮತ್ತು ಸ್ಮಾರ್ಟ್‌ಫೋನ್‌ಗಳಲ್ಲಿ ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಸೇವೆಗಳನ್ನು ಆನಂದಿಸಬಹುದಾಗಿದ್ದು, ಆಕರ್ಷಕ ಫೀಚರ್‌ಗಳನ್ನು ಹೊಂದಿದೆ.

ಬೆಲೆ ಮತ್ತು ಇತರ ವಿವರ
ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಬಾಕ್ಸ್ 3,999 ರೂ. ಬೆಲೆ ಹೊಂದಿದ್ದು, ಆರಂಭಿಕ ಕೊಡುಗೆಯಾಗಿ 999 ರೂ. ಮೌಲ್ಯದ ಒಂದು ವರ್ಷದ ಉಚಿತ ಚಂದಾ ಸೌಲಭ್ಯ ದೊರೆಯಲಿದೆ. ಜತೆಗೆ ಒಂದು ತಿಂಗಳ ಎಚ್‌ಡಿ ಡಿಟಿಎಚ್ ಪ್ಯಾಕ್ ಕೂಡ ಲಭ್ಯವಾಗಲಿದ್ದು, ಈಗಾಗಲೇ ಏರ್‌ಟೆಲ್ ಡಿಜಿಟಲ್ ಟಿವಿ ಬಳಸುತ್ತಿರುವ ಗ್ರಾಹಕರು ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಬಾಕ್ಸ್ ಕೊಳ್ಳುವುದಿದ್ದರೆ, 2,249 ರೂ. ಪಾವತಿಸಿದರೆ ಸಾಕಾಗುತ್ತದೆ.

500ಕ್ಕೂ ಅಧಿಕ ಚಾನಲ್‌ಗಳು, ಅಮೆಜಾನ್ ಪ್ರೈಮ್, ಯೂಟ್ಯೂಬ್ ಮತ್ತು ಏರ್‌ಟೆಲ್ ಸಮೂಹದ ಸೇವೆಗಳು ಇದರಲ್ಲಿ ಲಭ್ಯವಿದೆ. ಜತೆಗೆ ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಸ್ಟಿಕ್ ಬೆಲೆ 3,999 ರೂ. ಗೆ ಲಭ್ಯವಿದೆ.

ಏರ್‌ಟೆಲ್ ಎಕ್ಸ್‌ಸ್ಟ್ರೀಮ್ ಬಾಕ್ಸ್ ವೈ-ಫೈ ಮತ್ತು ಬ್ಲೂಟೂತ್, ಕ್ರೋಮ್‌ಕಾಸ್ಟ್ ಹೊಂದಿದೆ. ಅಲ್ಲದೆ ಯುನಿವರ್ಸಲ್ ರಿಮೋಟ್, ಗೂಗಲ್ ವಾಯ್ಸ್ ಅಸಿಸ್ಟೆಂಟ್ ಕೂಡ ಇದರ ವಿಶೇಷತೆಯಾಗಿದೆ.