ಒಂದೇ ತಿಂಗಳಲ್ಲಿ 4 ಸಾವಿರ ಅಶ್ಲೀಲ ವಿಡಿಯೋಗಳ ಮೇಲೆ ನಿಷೇಧ..!

ಭಾರತದಲ್ಲಿ ಪೋರ್ನ್​ ವೆಬ್​ಸೈಟ್​ಗಳ ಬ್ಯಾನ್ ವಿಚಾರದಿಂದ ಮತ್ತೊಮ್ಮೆ ನೀಲಿ ಲೋಕದ ಅಂಕಿ ಅಂಶಗಳು ಹೊರ ಬರುತ್ತಿದೆ. 827 ಅಶ್ಲೀಲ ವಿಡಿಯೋಗಳನ್ನು ಹೊಂದಿರುವ ವೆಬ್​ಸೈಟ್‌ಗಳನ್ನು ಬ್ಲಾಕ್‌ ಮಾಡುವಂತೆ ಇಂಟರ್ನೆಟ್‌ ಸೇವಾ ಸಂಸ್ಥೆಗಳಿಗೆ ಕೇಂದ್ರ ಸರ್ಕಾರ ಇತ್ತೀಚೆಗೆ ಸೂಚನೆ ನೀಡಿತ್ತು.

ಇದರಿಂದ ಸಾಮಾಜಿಕ ಜಾಲತಾಣಗಳಲ್ಲಿ ಪರ ವಿರೋಧಗಳ ಭಾರೀ ಚರ್ಚೆ ಹುಟ್ಟಿಕೊಂಡಿದೆ. ವಿಶ್ವದಲ್ಲೇ ಪೋರ್ನ್​ ವೀಕ್ಷಣೆಯಲ್ಲಿ ಮೂರನೇ ಸ್ಥಾನ ಪಡೆದಿರುವ ಭಾರತದಲ್ಲಿ ಅಶ್ಲೀಲ ವೆಬ್​ಸೈಟ್​ಗಳನ್ನು ನಿರ್ಬಂಧಿಸಿದರೆ ಬ್ಲೂ ಫಿಲಂ ಮಾರುಕಟ್ಟೆಗೆ ಭಾರೀ ಹೊಡೆತ ಬೀಳಲಿದೆ ಎಂಬ ಲೆಕ್ಕಾಚಾರಗಳು ಪ್ರಾರಂಭವಾಗಿದೆ.

ಆದರೆ ಭಾರತಕ್ಕೂ ಮೊದಲು ಸಂಪೂರ್ಣ ಪೋರ್ನ್​ ವೆಬ್​ಸೈಟ್​ ನಿಷೇಧಿಸಿದ ಕೀರ್ತಿ ಚೀನಾ ದೇಶದ ಪಾಲಾಗಿದೆ. ಈಗಾಗಲೇ 22 ಸಾವಿರಕ್ಕೂ ಹೆಚ್ಚಿನ ಅಶ್ಲೀಲ ವಿಡಿಯೋ ಸೈಟ್​ಗಳನ್ನು ಚೀನಾದಲ್ಲಿ ಬ್ಲಾಕ್ ಮಾಡಲಾಗಿದೆ. ಅಚ್ಚರಿ ಎಂದರೆ ಕಳೆದ ಒಂದು ತಿಂಗಳಲ್ಲೇ ಬರೋಬ್ಬರಿ 4 ಸಾವಿರ ಪೋರ್ನ್​ ವೆಬ್​ಸೈಟ್​ಗಳನ್ನು ಚೀನಾ ಸರ್ಕಾರ ನಿರ್ಬಂಧಿಸಿದೆ.

ಭಾರತದಲ್ಲೂ ಶೀಘ್ರದಲ್ಲೇ ಪೋರ್ನ್ ವೆಬ್​ಸೈಟ್​ ಬ್ಯಾನ್ ಆಗಲಿದ್ದು, ರಿಯಲನ್ಸ್ ಜೀಯೊ ಈಗಾಗಲೇ ಪೋರ್ನ್​ ವೆಬ್​ಸೈಟ್​ನ್ನು ಬ್ಲಾಕ್ ಮಾಡಿದೆ. ಏರ್​ಟೆಲ್, ವಡಫೋನ್ ಸೇರಿದಂತೆ ಎಲ್ಲ ಸಿಮ್ ನೆಟ್​ವರ್ಕ್​ನಲ್ಲಿ ಅಶ್ಲೀಲ ವಿಡಿಯೋಗಳ ವೆಬ್​ಸೈಟ್​ಗಳನ್ನು ಶೀಘ್ರದಲ್ಲೇ ನಿರ್ಬಂಧಿಸಲಾಗುತ್ತದೆ ಎನ್ನಲಾಗಿದೆ. ಇತ್ತೀಚೆಗೆ ಉತ್ತರಾಖಂಡ ಹೈಕೋರ್ಟ್‌ ನೀಡಿರುವ ಆದೇಶದ ಹಿನ್ನೆಲೆಯಲ್ಲಿ ಟೆಲಿಕಾಂ ಕಂಪನಿಗಳಿಗೆ ಪೋರ್ನ್​ ವೆಬ್​ಸೈಟ್​ ಬ್ಯಾನ್ ಮಾಡುವಂತೆ ಸರ್ಕಾರ ಸೂಚಿಸಿದೆ.