ಹೊಸದಿಲ್ಲಿ: ಬೆಂಗಳೂರಿನಲ್ಲಿ ದಾಳಿ ನಡೆಸುವುದು ಸೇರಿದಂತೆ ದಕ್ಷಿಣ ಭಾರತದಲ್ಲಿ ವಿಧ್ವಂಸಕ ಕೃತ್ಯಗಳನ್ನು ನಡೆಸಲು ಸಂಚು ರೂಪಿಸಿದ ಆರೋಪ ಎದುರಿಸುತ್ತಿರುವ ಪಾಕಿಸ್ತಾನದ ರಾಜತಾಂತ್ರಿಕ ಅಧಿಕಾರಿ ಅಮಿರ್ ಜುಬೇರ್ ಸಿದ್ದಿಕಿ ಹೆಸರನ್ನು ರಾಷ್ಟ್ರೀಯ ತನಿಖಾ ದಳ (ಎನ್ಐಎ) ‘ಮೋಸ್ಟ್ ವಾಂಟೆಡ್’ ಪಟ್ಟಿಗೆ ಸೇರಿಸಿದೆ. ಭಾರತವು ಮೋಸ್ಟ್ ವಾಂಟೆಡ್ ಪಾತಕಿಗಳ ಪಟ್ಟಿಗೆ ಪಾಕ್ನ ರಾಜತಾಂತ್ರಿಕ ಮಟ್ಟದ ಅಧಿಕಾರಿಯನ್ನು ಸೇರಿಸಿರುವುದು ಇದೇ ಮೊದಲು ಎಂದು ಮೂಲಗಳು ಹೇಳಿವೆ.
ಇಂಥದ್ದೇ ಆರೋಪದಲ್ಲಿ ಎನ್ಐಎ ಈಗಾಗಲೇ ಪಾಕ್ ಗುಪ್ತಚರ ಸಂಸ್ಥೆ ಐಎಸ್ಐನ ಮೇಜರ್ ಸಮೀರ್ ಅಲಿ ಹಾಗೂ ಮೇಜರ್ ಸಾಜಿದ್ ಮೀರ್ನನ್ನು ವಾಂಟೆಡ್ ಲಿಸ್ಟ್ಗೆ ಸೇರಿಸಿದ್ದು, ಈಗ ಅದರ ಸಾಲಿಗೆ ಸಿದ್ದಿಕಿ ಹೆಸರು ಹೊಸದಾಗಿ ಸೇರಿದೆ. ಈ ಮೂವರು ಅಧಿಕಾರಿಗಳ ವಿರುದ್ಧ ರೆಡ್ ಕಾರ್ನರ್ ನೋಟಿಸ್ ಜಾರಿಗೊಳಿಸುವಂತೆ ಇಂಟರ್ಪೋಲ್ಗೆ ಕೋರಿಕೊಳ್ಳುವ ಸಿದ್ಧತೆ ನಡುವೆ ಈ ಬೆಳವಣಿಗೆ ನಡೆದಿದೆ. ಸಿದ್ದಿಕಿ ಅವರನ್ನು ವಾಂಟೆಡ್ ಪಟ್ಟಿಗೆ ಸೇರಿಸಿರುವ ಕುರಿತು ಎನ್ಐಎ ತನ್ನ ವೆಬ್ಸೈಟ್ನಲ್ಲಿಯೂ ಮಾಹಿತಿ ನೀಡಿದೆ.
ಸಿದ್ದಿಕಿ 2009ರಿಂದ 2016ರವರೆಗೆ ಶ್ರೀಲಂಕಾದಲ್ಲಿ ಪಾಕ್ ಹೈಕಮಿಷನ್ ಕಚೇರಿಯಲ್ಲಿ ವೀಸಾ ಕೌನ್ಸೆಲರ್ ಆಗಿ ಕಾರ್ಯನಿರ್ವಹಿಸಿದ್ದರು. ಈ ಅವಧಿಯಲ್ಲಿ ಅವರು ಬೆಂಗಳೂರಿನಲ್ಲಿರುವ ಇಸ್ರೇಲ್ ಕಾನ್ಸುಲೇಟ್, ಚೆನ್ನೈನಲ್ಲಿರುವ ಅಮೆರಿಕದ ಕಾನ್ಸುಲೇಟ್ ಹಾಗೂ ವಿಶಾಖಪಟ್ಟಣಂನಲ್ಲಿರುವ ಪೂರ್ವ ನೌಕಾ ಕಮಾಂಡ್, ಬಂದರು ಹಾಗೂ ಪ್ರಮುಖ ಸೇನಾ ಮತ್ತು ಅಣು ಸ್ಥಾವರಗಳ ಮೇಲೆ 26/11 ಶೈಲಿಯಲ್ಲಿ ದಾಳಿ ನಡೆಸಲು ಸಂಚು ರೂಪಿಸಿದ್ದರು ಎಂದು ಎನ್ಐಎ ಕಳೆದ ಫೆಬ್ರವರಿಯಲ್ಲಿ ಸಲ್ಲಿಸಿದ್ದ ದೋಷಾರೋಪ ಪಟ್ಟಿಯಲ್ಲಿ ಹೇಳಿತ್ತು. ಪಾಕ್ ಪರ ಗೂಢಚಾರಿಕೆ ನಡೆಸುತ್ತಿದ್ದ ಮೊಹಮ್ಮದ್ ಝಾಕೀರ್ ಹುಸೇನ್, ತಮೀಮ್ ಅನ್ಸಾರಿ, ಅರುಣ್ ಸೆಲ್ವರಾಜ್, ಶಿವಬಾಲನ್ನನ್ನು ತಮಿಳುನಾಡು ಪೊಲೀಸ್ ವಿಭಾಗದ ಸಿಐಡಿ ಬಂಧಿಸಿ ವಿಚಾರಣೆಗೊಳಪಡಿಸಿದಾಗ ಅವರೆಲ್ಲರೂ ಸಿದ್ದಿಕಿ ಪರ ಕೆಲಸ ಮಾಡುತ್ತಿದ್ದುದನ್ನು ಬಾಯಿಬಿಟ್ಟಿದ್ದರು.
ಆಪರೇಷನ್ ವೆಡ್ಡಿಂಗ್ ಹಾಲ್
ಹುಸೇನ್ ಕೊಲಂಬೊದಲ್ಲಿ ಹಲವು ಬಾರಿ ಸಿದ್ದಿಕಿಯನ್ನು ಭೇಟಿಯಾಗಿದ್ದ. ಮಾಲ್ಡೀವ್ಸ್ನಿಂದ ಇಬ್ಬರು ಪಾಕ್ ಉಗ್ರರು ಭಾರತ ಪ್ರವೇಶಿಸಲು ನಕಲಿ ಪಾಸ್ಪೋರ್ಟ್ ವ್ಯವಸ್ಥೆ ಮಾಡುವಂತೆ ಹಾಗೂ ಭಾರತೀಯ ಸೇನೆಯ ಚಲನವಲನ, ಅಣು ಸ್ಥಾವರಗಳ ಬಗ್ಗೆ ಇಂಚಿಂಚು ಮಾಹಿತಿ ಕಲೆ ಹಾಕಿ ರವಾನಿಸುವಂತೆ ಹುಸೇನ್ ನೇತೃತ್ವದ ತಂಡಕ್ಕೆ ಸೂಚಿಸಲಾಗಿತ್ತು. ಚೆನ್ನೈನಲ್ಲಿರುವ ಅಮೆರಿಕ ಕಾನ್ಸುಲೇಟ್ ಕಚೇರಿ ಮೇಲೆ ದಾಳಿ ನಡೆಸುವ ಯೋಜನೆಗೆ ‘ವೆಡ್ಡಿಂಗ್ ಹಾಲ್’ ಹಾಗೂ ಬಳಸುವ ಬಾಂಬ್ಗಳಿಗೆ ‘ಸ್ಪೈಸ್’ ಎಂಬ ರಹಸ್ಯ ಹೆಸರಿಡಲಾಗಿತ್ತು ಎಂದು ಮೂಲಗಳು ಹೇಳಿವೆ.
ಎಲ್ಲೆಲ್ಲಿ ದಾಳಿಗೆ ಸಂಚು?
– ಬೆಂಗಳೂರಿನಲ್ಲಿರುವ ಇಸ್ರೇಲ್ ಕಾನ್ಸುಲೇಟ್
– ಚೆನ್ನೈನಲ್ಲಿರುವ ಅಮೆರಿಕದ ಕಾನ್ಸುಲೇಟ್
– ವಿಶಾಖಪಟ್ಟಣಂನಲ್ಲಿರುವ ಪೂರ್ವ ನೌಕಾ ಕಮಾಂಡ್
– ಪ್ರಮುಖ ಬಂದರು, ಸೇನಾ ಮತ್ತು ಅಣು ಸ್ಥಾವರಗಳು
Comments are closed.