ಯುಬಿಯಲ್ಲಿ ವಿಜಯ್ ಮಲ್ಯ ಷೇರು ಮಾರಾಟ ಸಂಭವ

ಮುಂಬಯಿ: ಯುನೈಟೆಡ್‌ ಬ್ರೇವರೀಸ್‌ನಲ್ಲಿರುವ ಉದ್ಯಮಿ ವಿಜಯ್‌ ಮಲ್ಯ ಅವರ ಸುಮಾರು 4,000 ಕೋಟಿ ರೂ. ಮೌಲ್ಯದ 4 ಕೋಟಿ ಷೇರುಗಳನ್ನು ಮಾರಾಟ ಮಾಡುವ ಬಗ್ಗೆ ಜಾರಿ ನಿರ್ದೇಶನಾಲಯ (ಇಡಿ) ಪರಿಶೀಲಿಸುತ್ತಿದೆ. 4,000 ಕೋಟಿ ಎಂದರೆ ಮಲ್ಯ ಅವರ ಕಂಪನಿಗಳ ಸುಸ್ತಿ ಸಾಲದಲ್ಲಿ ಸುಮಾರು ಅರ್ಧದಷ್ಟು ಆಗಬಹುದು.

ಅಕ್ರಮ ಹಣ ವರ್ಗಾವಣೆ ತಡೆ ಕಾಯಿದೆಯ ಅಡಿಯಲ್ಲಿ (ಪಿಎಂಎಲ್‌ಎ) ಮಲ್ಯರ ಷೇರುಗಳನ್ನು ಜಾರಿ ನಿರ್ದೇಶನಾಲಯಕ್ಕೆ ವರ್ಗಾಯಿಸಲಾಗಿತ್ತು. ಉಳಿದಿರುವ 27 ಲಕ್ಷ ಷೇರುಗಳೂ ಶೀಘಃ್ರ ವರ್ಗಾವಣೆಯಾಗುವ ನಿರೀಕ್ಷೆ ಇದೆ. ಈ ಕುರಿತ ಪ್ರಶ್ನೆಗಳಿಗೆ ಮಲ್ಯ ಅವರು ಪ್ರತಿಕ್ರಿಯಿಸಿಲ್ಲ.ಪಿಎಂಎಲ್‌ಎ ಕಾಯಿದೆಯ ಅಡಿಯಲ್ಲಿ ಷೇರುಗಳ ಮಾರಾಟ ನಡೆಯಲಿದೆ ಎಂದು ಜಾರಿ ನಿರ್ದೇಶನಾಲಯದ ಅಧಿಕಾರಿಯೊಬ್ಬರು ಹೇಳಿದ್ದಾರೆ.

ಯುನೈಟೆಡ್‌ ಬ್ರೇವರೀಸ್‌ ಪ್ರತಿ ಷೇರು ದರ ಸುಮಾರು 1080 ರೂ.ಗಳಿದ್ದು, ಈ ಲೆಕ್ಕದಲ್ಲಿ 4 ಕೋಟಿ ಷೇರುಗಳ ಮಾರುಕಟ್ಟೆ ಮೌಲ್ಯ ಅಂದಾಜು 4,300 ಕೋಟಿ ರೂ.ಗಳಾಗಿದೆ. ಜಾರಿ ನಿರ್ದೇಶನಾಲಯವು ಈ ಹಿಂದೆ ಸತ್ಯಂ ಕಂಪ್ಯೂಟರ್ಸ್‌ ಸ್ಥಾಪಕ ರಾಮ ಲಿಂಗ ರಾಜು ಅವರ ಕೆಲವು ಹೂಡಿಕೆಗಳನ್ನೂ ಮಾರಾಟ ಮಾಡಿತ್ತು. ವಿಜಯ್‌ ಮಲ್ಯ ಅವರು ಯುನೈಟೆಡ್‌ ಬ್ರೇವರೀಸ್‌ನಲ್ಲಿ 7.79 ಕೋಟಿ ಷೇರುಗಳನ್ನು (ಶೇ.29.46) ಹೊಂದಿದ್ದಾರೆ. ಇದರಲ್ಲಿ 3.52 ಕೋಟಿ ಷೇರುಗಳನ್ನು ಬ್ಯಾಂಕ್‌ಗಳಲ್ಲಿ ಅಡಮಾನ ಇಟ್ಟಿದ್ದಾರೆ.